Media-icmal 05.12.19

Əhalinin sosial müdafiəsinin gücləndirilməsi, mənzil bazarında bahalanma ehtimalı, parlamentin buraxılması forması ilə bağlı müzakirələr və s. məsələlər medianın aparıcı mövzularındandır...

Sosial rifah güclənir    

“Azərbaycan” qəzeti “İslahatlar əhalinin sosial rifahının yüksəlməsini sürətləndirir” sərlövhəli məqalədə əhalinin sosial rifahının gücləndirilməsini dəyərləndirir.

Müəllif deyir ki, son illər ölkədə iqtisadi-sosial sahəni əhatə edən islahatlar həyata keçirilir, aparılan islahatlarda əhalinin sosial müdafiəsi xüsusi yer tutur, elə islahatların əsas məqsədi  Azərbaycan vətəndaşının rifah halının yaxşılaşdırılmasıdır.

Müəllif əlavə edir ki, dövlət başçısı tərəfindən qəbul edilən qərarlara əsasən, əhalinin sosial müdafiəsi gücləndirilib, şəhid ailələrinə və müharibə əlillərinə ötən il nəzərdə tutulduğundan üç dəfə çox, yəni 626 mənzil təqdim edilib, cari ildə isə bundan da 50 faiz çox olmaqla, 934 mənzil və fərdi ev verilməsi planlaşdırılıb.

Onun sözlərinə görə, Prezident İlham Əliyev 2019-cu il dekabrın 2-də “Əhalinin sosial müdafiəsinin yaxşılaşdırılmasına dair əlavə tədbirlər haqqında” sərəncam imzalayıb, bu da sosial müdafiə cəhətdən həssas kateqoriyaya olan qayğının bir nümunəsidir.

Müəllif deyir ki, dövlət başçısının sərəncamı ilə daha çox müasir tipli sosial-bərpa mərkəzlərinin tikilməsi məqsədilə Əmək və Əhalinin Sosial Müdafiəsi Nazirliyinə 20 019 100 (iyirmi milyon on doqquz min yüz) manat vəsait ayrılıb. 

Müəllifə görə, reabilitasiya və sosial xidmət infrastrukturunun müasirləşdirilməsi və genişləndirilməsi işlərinin davam etdirilməsi prioritet fəaliyyət istiqamətidir. 

Yazıda vurğulanır ki, bu ilin 10 ayında nazirliyin bərpa mərkəzləri tərəfindən 7241 nəfər əlilliyi olan şəxsə stasionar, 1867 nəfər əlilliyi olan şəxslərə isə ambulator qaydada reabilitasiya xidmətləri göstərilib.

Müəllifə görə, sosial müdafiə sahəsində nöqsanlar da var, aparılan araşdırma və təhlillər nəticəsində məlum olub ki, 1800 nəfər saxta yollarla ünvanlı dövlət sosial yardımı alıb, həmin şəxslərə yönələn yardımlar dayandırılıb.

Müəllif deyir ki, hazırda təqribən 70 min ailəyə ünvanlı sosial yardım ödənilir ki, bu da 280 min insanı əhatə edir.

Yazının sonunda isə oxuyuruq: “Onlara ödənilən məbləğin ailə başına düşən orta rəqəmi 200 manat civarındadır. Qeyd edək ki, bu, kifayət qədər ciddi rəqəmdir. Təkcə il ərzində bu qrupdan olan vətəndaşlara ödəniləcək ünvanlı yardımın məbləği 170 milyon manatdır”.

Mənzil bazarında bahalanma ehtimalı - gələn il

“Modern.az”da isə “Mənzil bazarında kəskin qiymət artımı gözlənilir - ekspert səbəbləri açıqladı” sərlövhəli məqalə oxumaq olar.

Müəllif mənzil bazarında ehtimal edilən bahalanmanın səbəbləri barədə daşınmaz əmlak sahəsi üzrə ekspert Ramil Osmanlı ilə söhbətləşir.

Müəllif deyir ki, hazırda mənzil bazarında potensial alıcı kütləsini daha çox qarşıdakı aylardakı tendensiyalar maraqlandırır.

Müəllifə görə, Azərbaycan xalqı daşınmaz əmlaka həm etibarlı, qalıcı sərvət, dəyərli hədiyyə, miras kimi baxır və bu baxımdan mənzil bazarında  qiymət dəyişiklikləri toplumda narahatlıqla izlənilən mövzudur. 

Müəllif isə deyir ki, aparılan araşdırma və təhlillər, bu sahə üzrə ekspertlərin proqnozlarına görə gələn ilin başlanğıcından mənzil bazarında kəskin qiymət artımı gözlənilir.

Modern.az xəbər verir ki, Əmlak Ekspert Mərkəzinin direktoru Ramil Osmanlı isə “modern.az”a açıqlamasında qiymət artımını şərtləndirən bir sıra amillər olduğunu bildirir: “Son 1 ildə mənzil tikintisi sahəsində qəbul olunan qərarlar, şəhərsalma və infrastruktur layihələri ilə bağlı ölkə rəhbərliyinin tapşırıq və tövsiyələri, əhalinin mənzil-məişət şəratinin yaxşılaşdırılması istiqamətində həyata keçirilən sosial layihələr, yaşayış sahəsinə tələbatın yüksək olması, turist axını və məskunlaşma ilə bağlı olan demoqrafik amillər…”.

Ekspert əlavə edir ki, bu yaxınlarda Bakı Şəhər İcra Hakimiyyətinin başçısı Eldar Əzizovu qəbul etmiş Prezident İlham Əliyev tikinti sahəsində ciddi addımların atılması ilə bağlı tapşırıqlar verib.

Ekspertə görə, burada diqqəti 2 ciddi məsələ cəlb edir, bunlardan 1-i şəhərin mərkəzində “İçərişəhər” metrosu və yaxın ərazilərdə 2-3 mərtəbəli tarixi binaların qorunması, onların yerində yeni hündürmərtəbəli binaların tikintisinin yolverilməzliyi, digəri isə tikinti standartları ilə bağlı koefisientlərin aşağı salınması və bunlara əməl olunmasıdır.

“Artıq bu tapşırıqdan sonra qeyd olunan ərazidə mənzillərin qiymətlərində kəskin artım qaçılmazdır. Bakının mərkəzində hündürmərtəbəli binaların inşasına məhdudiyyətlər qoyulub. Xüsusilə İçərişəhər və ətraf ərazilər tarixi memarlıq nümunələrinin qorunması baxımından əhəmiyyətlidir. Mərkəz hissədə yeni tikintilərin olmaması, lakin tələbin ildən ilə artımı təbii olaraq qiymətə təsir göstərir. Həmçinin, ildən ilə ölkəyə turist axını bu sahəyə təsir edir. İmkanlı turistlər içərisində Bakıda, xüsusən mərkəz yerlərdə mülk sahibi olmaq niyyətləri və örnəkləri var. Qeyd edilənlərdən belə nəticəyə gəlmək olar ki, paytaxtda, xüsusilə mərkəzdə növbəti ildən mənzillərin qiymətinin artımı qaçılmazdır”.

Nə mümkünsüzlüyü? ...gərək deyiləydi ki...

“Müsavat.com-da isə “Qəbul olunan qərara görə, biz artıq deputat deyilik, kimlə, nə müzakirə etməliyik? - Arif Rəhimzadə” sərlövhəli məqalə diqqət çəkir.

Müəllif parlamentin buraxılması barədə YAP-çı deputat Arif Rəhimzadə ilə söhbətləşir.

Müəllifin sözlərinə görə, ölkə parlamentinin buraxılması barədə qərara deputatların səsverməsində A.Rəhimzadənin bunun əleyhinə səs verdiyi deyilirdi, amma deputat ümumiyyətlə səsvermədə iştirak etmədiyini bildirir: “Yox, mən səsvermədə iştirak etmədim. Çünki bizim sədrlə söhbətimiz zamanı səsvermə başa çatdı. Mən sədrə sual verdim, dedi ki, səs ver, ondan sonra sual ver. Nə təhər yəni, səs ver, sonra sual?!”.

A.Rəhimzadə hesab edir ki, qərarda yeni parlament seçkilərinə gedilməsi nəzərdə tutulmalı idi, həmin müddət ərzində isə deputatlar fəaliyyətlərini davam etdirməli, yeni parlament seçiləndən sonra onlar istefaya getməli idilər.

“Mən hesab edirəm ki, prosedur belə olmalı idi. Yaxşı, işləmişik, özümüz-özümüzü niyə alçaldaq ki, “mümkünsüzlük”. Nə mümkünsüzlük? Bəli, gərək qərar qəbul olunaydı ki, yeni seçki təyin edilsin, o müddət ərzində parlament səlahiyyətini saxlasın.

Parlament nümayəndə heyətinin ATƏT PA-nın toplantsında iştirak edə bilməyəcəyi məsələsinə toxunan deputat deyir ki, belə qərar qəbul edəndə nə təhər getsin.

A.Rəhimzadə buna narazılığını da ifadə edir: “Ancaq biz özümüz bunu başa düşərək, bunu anlayaraq niyə özümüzü belə səthi düşüncəli insanlar kimi təqdim edirik? Bax, mən bununla razı deyiləm. Qəbul olunan qərara görə, biz artıq deputat deyilik. Bu, bizim son plenar iclasımızdır. Məni narahat edən odur ki, biz niyə özümüzü səthi düşüncəli qurum kimi təqdim etdik, Məni narahat edən budur”.

Xatırladaq ki, bu il noyabrın 28-də YAP Siyasi Şurasının toplantısında bu partiyadan olan deputatlara parlamentin buraxılması ilə bağlı çıxış etmək tövsiyəsi verilib. Dekabrın 2-də bu məsələ ilə bağlı parlamentin iclası keçirilib. 99 deputat lehinə, 1 nəfər əleyhinə, 1 nəfər bitərəf qalmaqla patrlamentin buraxılması barədə prezidentə müraciət ünvanlanıb. Müraciətdə deputatlar parlamentin buraxılmasını Milli Məclisin ölkədə gedən islahatlardan geri qalması ilə izah edirdilər. Dövlət başçısı bu müraciətin qanunauyğun olması ilə bağlı Konstitusiya Məhkəməsinə sorğu verib. Dekabrın 4-də Konstitusiya Məhkəməsinin Plenumu sorğuya baxaraq qanunauyğun olduğu barədə qərar verib.