Media-icmal 06.01.2017

Dövlət başçısı İlham Əliyevin bölgələrə səfərlərinin yekunu, ölkədə normal hökumət müzakirəsi, daşınmaz əmlak bazarının durumu, on-layn ticarətə ƏDV tətbiqinin neqativ təsiri bugünki medianın aparıcı mövzusudur...

23 səfər, 64 obyekt açılışı

“Azərbaycan” qəzeti  “Bölgələrə 23 səfər, 64 obyektin açılışı” sərlövhəli məqalədə (http://www.azerbaijan-news.az/index.php?mod=3&id=113371) dövlət başçısı İlham Əliyevin ölkənin bölgələrinə səfərlərini dəyərləndirir.

Regionların inkişafını uğurlu sosial-iqtisadi strategiyanın mühüm tərkib hissəsi sayan məqalədə deyilir: “Regionların inkişafı sahəsində qəbul edilmiş və uğurla həyata keçirilmiş dövlət proqramları, habelə əlavə tədbirlərlə bağlı Prezident İlham Əliyevin imzaladığı sərəncamlarda nəzərdə tutulmuş vəzifələrin icrası qeyri-neft sektorunun davamlı inkişafına, regionlarda kommunal xidmət və sosial infrastruktur təminatının keyfiyyətinin yüksəldilməsinə təkan verdi”.

Müəllif ümumilikdə dövlət başçısının bölgələrə 23 səfər etdiyini, bu səfərlərdə sosial obyektlərin, mədəniyyət mərkəzlərinin, muzeylərin, parkların açılışında, təməlqoyma mərasimlərində iştirak etdiyini bildirir. Müəllif  bu səfərlər sırasında İ.Əliyevin 2-5 aprel döyüşlərindən sonra Tərtər və Ağdam rayonlarına səfərlərini dövlət başçısının düşmənlə üz-üzə qalan vətəndaşın yanında olması adlandıraraq xüsusi qeyd edir.

Məqalədə qeyri-neft sahəsinin tərkib hissəsi kimi turizmin inkişaf etdirilməsinin diqqət mərkəzində olduğu və dövlət başçısının ölkənin cənub və şimal bölgəsinə səfərlərində bu məsələni vurğuladığı xatırladılır. 

Yazıda deyilir ki, kənd təsərrüfatı sahəsinin inkişafı, yeni mərhələ kimi sənayeləşmənin başlanması da bu səfərlərdə dövlət başçısının diqqət mərkəzində olub.

Ölkənin bir sıra şəhər və rayonlarında sənaye parklarının yaradılması bu səfərlərin nəticəsi kimi dəyərləndirilir.

Bütünülkdə isə müəllif deyir ki, İ.Əliyev bu 23 səfəri zamanı 64 obyektin açılışında və 3 təməlqoyma mərasimində iştirak edib: “Prezident İlham Əliyevin respublikanın rayon və şəhərlərinin iqtisadi inkiafı ilə bağlı yorulmadan həyata keçirdiyi və tək bu günə deyil, gələcəyə hesablanmış tədbirlər, habelə, bu kontekstdə hökumətin qarşısında qoyduğu vəzifələrin davamlı və uğurlu icrası artıq müsbət nəticələrini verməkdədir”.    

Normal hökumət arzusu

“Azadlıq.info” saytı “Hazırda normal bir hökumətə ehtiyacımız var” sərlövhəli (https://www.azadliq.info/173174.html)         məqalədə deputat Vahid Əhmədovun 2017-ci ildə Azərbaycan iqtisadiyyatının perspektivilə bağlı düşüncələrinə yer verib.

V.Əhmədov bildirir ki, neftin qiymətində müəyyən sıçrayışlar ola bilər: “Yəni, qiymət qalxmaları və enmələri gözlənilir. Manatın müəyyən qədər dəyərdən düşməsi yenə də davam edəcək. Çünki manat valyuta bazarında öz dəyərini hələ almayıb. “Strateji Yol Xəritəsi” təsdiqlənib və xəritədə göstərilənləri həyata keçirmək üçün operativ qərarlar verən, qərarı həyata keçirə bilən hökumət formalaşarsa, bu il problemlərin qarşısını müəyyən qədər almaq olar. Hazırda Strateji Yol Xəritəsində nəzərdə tutulan çox böyük layihələri həyata keçirmək üçün normal bir hökumətə ehtiyac var”.

V.Əhmədov hesab edir ki, 2017- ci ilin ikinci yarısında Azərbaycan iqtisadiyyatında müəyyən artımlar ola bilər: “İlin birinci yarısında manat müəyyən qədər dəyərdən düşəcək, amma ikinci yarımillikdən müəyyən stabillik gözləmək mümkün olacaq.

Deputat deyir ki, “Strateji Yol Xəritəsi”ndə göstərilən məsələləri həyata keçirmək üçün maliyyə problemi var: “Bunun üçün 27 milyard vəsait lazımdır. Bu vəsait haradan əldən olunacaq? Əksər hissəsi ola bilsin ki, xarici investisiyalar hesabına həyata keçirilsin. Çünki daxildəki investisiyalar kifayət qədər olmayacaq. Azərbaycanda bu gün həm institusional, həm struktur, həm də kadr islahatlarına çox böyük ehtiyac var”.

V.Əhmədova görə, ilin sonunda Milli Məclisdə bəzi qanunlara qalmaqallı dəyişikliklər edilib: “Yeni qanunların da qəbul edilməsi gözlənilir. İnhisarçılığın qarşısını almaq üçün “Rəqabət Məcəlləsi haqqında” qanunun qəbul edilməsini gözləyirik. Çox istərdik ki, maliyyə ilə əlaqədar müəyyən qanunlar qəbul edilsin. Büdcəyə nəzarət mexanizmini daha da formalaşdırmaq üçün “Maliyyə nəzarəti haqqında” qanun layihəsi qəbul olunmalıdır. İstəyirik ki, 2017-ci ildə iqtisadiyyatı müəyyən qədər stabilləşdirək”.

Alıcılıq aşağı, mənzillər boş  

“Exo” qəzeti “2017-ci ildə Azərbaycanın daşınmaz əmlak bazarını nə gözləyir” sərlövhəli (http://ru.echo.az/?p=53755) məqalədə bu bazarın durumunu ekspertlərlə dəyərləndirir.

“Azərbaycan milli valyutasına inamın itməsi ölkədə mənzillərin dəyərinin dollarla müəyyən olunmasına gətirə bilər”. Bunu daşınmaz əmlak bazarı üzrə ekspert Rəşad Əliyev deyir.

Onun sölərinə görə, 2017-ci ildə Azərbaycnın daşınmaz əmlak bazarında manatla satışda qiymətlərin aşağı düşəcəyi gözlənilmir: “2015-ci ildən etibarən obyektiv səbəblər üzündən yeni və təkrar mənzil bazarında qiymətlər enməyə başlayıb. Yeni tikilən binalarda sövdələşmələrin, verilən ipoteka kreditlərinin ümumi sayı azalıb. Hazırda yeni tikilən binalarda mənzillərin yarısı boşdur”.    

Mənzil alınması baxımından indiki zamanın daha əalverişli olduğunu deyən ekspert indi də ölkə vətəndaşlarının alıcılıq qabiliyyətinin çox aşağı səviyyədə olduğunu nəzərə çatdırır.

2017-ci ildə daşınmaz əmlak bazarında son illərin ən pis göstəricilərinin ola biləcəyini istisna etməyən R.Əliyev ölkədəki mövcud qeyri-sabitliyin burada birmənalı danışmağa imkan vermədiyini deyir: “Amma bunu əminliklə demək olar ki, hətta bundan sonra dollara nisbətdə manat ucuzlaşsa belə daşınmaz əmlakın manatla ifadəsi azalmayacaq. Əksinə, manat hesabı ilə daşınmaz əmlakın dəyəri artacaq. 

Yeni tikilən binlarda da qiymətlərin enməsini gözləmək olmaz, çünki son illərdə yaşayış evlərinin qiyməti artır”.

Ekspert düşünür ki, tikinti şikətləri öz zərərinə işləməyəcək, üstəlik əmlak bazarında da durum neftin dəyərindən, ölkənin valyuta bazarı və ipoteka proqramı ilə bağlı islahatların durumundan asılı olacaq: “İpotek kreditləşməsi sahəsində hökumət 2015-ci lin sonlarından bəyanatlar versə də,  hələ ki, real addımlar atılmır, bu məsələdə məmurlar 2017-ci lin həlledici il olduğunu deyirlər.

Yumurtadan “yun” qırxanlar

“Bizim Yol” qəzetində isə “Hər 100 manatlıq alış-verişdə 18 manat ziyana düşəcəksiniz”  (http://www.bizimyol.info/news/90135.html) sərlövhəli məqalədə on-layn ticarətə vergi tətbiq olunması ekspertlərlə müzakirə edilir.

Müəllif ekspertlərə istinadən on-layn ticarətə vergi tətbiqinin ciddi fəsadlara səbəb olacağını bildirir.

Müəllif  Vergi Məcəlləsinə son dəyişikliklərdə elektron ticarətə dair xüsusi qeyd əlavə olunduğunu, bu qeyddə on-layn sifarişlə alınan mallara görə, əlavə dəyər vergisi (ƏDV) tətbiq ediləcəyinin nəzərdə tutulduğunu xatırladır. 

Məqalədə Vergilər Nazirliyinin bunu yerli istehsalçılar və ticarətçilərə qarşı ədalətli addım sayaraq hər sifariş ediləcək malın dəyərinin 18%-nin ƏDV kimi tutacağını bildirir.

“Elektron Ticarət” İctimai Birliyinin məsulu Nicat Manafov məsələni belə şərh edir: “Deyirlər ki, bu addım yerli sahibkarlara dəstək üçündür. Əgər hansısa malın Azərbaycanda alternativi olsaydı, bəli, yerli sahibkarı qorumaq üçün bunu etmək olardı. Amma elə məhsullar var ki, onun Azərbaycanda alternativi yoxdur, onları həmin 18% vergidən azad etmək lazımdır", deyə ekspert bildirib.

İqtisadçı-ekspert Əkrəm Həsənov da bu tətbiq edilən ƏDV-in on-layn alqı-satqıya mənfi təsir edəcəyini deyir: “İlk növbədə onlayn ticarət zəifləyəcək, alqı-satqı səviyyəsi aşağı düşəcək, digər tərəfdən, banklara zərər dəyəcək, çünki, alış-veriş banklar vasitəsilə gedirdi. Habelə, ucuz və keyfiyyətli məhsullar almaq imkanları azalacaq, yerli istehsalçılara kömək etmək istəyirlərsə, onların vergi yüklərini azaltsınlar".