Media-icmal 07.01.20

“Könüllülər ili”nin ölkə gəncliyinin inkişafına təsiri, icbari sığortanın məcburiliyi barədə müzakirələr, Yasamal rayonunda tikintiyə etirazın səbəbləri və s. məsələlər medianın aparıcı mövzuları sırasındadır...

“Könüllülər ili” və gənclik siyasəti

“Pərvin Kərimzadə: “Könüllülər ili” gənclərin fəaliyyətinə böyük stimul olacaq” sərlövhəli məqalədə müəllif ölkənin gənclər siyasətini dəyərləndirir.

Keçmiş deputat (2019-cu il dekabrın 3-də dövlət başçısının sərəncamı ilə 2015-ci ilin noybarında formalaşmış parlament buraxılıb) Pərvin Kərimzadə bu dəyərləndirməni 2020-ci ilin Azərbaycanda “Könüllülər ili” elan olunması fonunda aparır.

Yazı müəllifi əlavə edir ki, gənclərin hərtərəfli inkişafı ölkənin sosial-iqtisadi, elmi və mədəni inkişafı ilə sıx əlaqəlidir.

Müəllifə görə, dövlət idarəçiliyinin müxtəlif sahələrində gənclər aparıcı qüvvə kimi öndə dayanırlar, onların sosial, məşğulluq kii məsələlərinin həlli, milli-mənəvi dəyərlərə sayğı ruhunda tərbiyə olunmaları dövlətin gənclər siyasətinin məntiqi davamı kimi uğurla həyata keçirilir.

Məqalədə dövlət səviyyəsində gəncliyə böyük ümid bəslənildiyi, müstəqilliyin qorunub saxlanılmasında və əbədi olmasında gənc nəslin çiyinlərinə daha ağır yükün düşdüyü, eləcə də Azərbaycanın gələcəyinin yetişən gənc nəsildən asılı olduğu xüsusi vurğulanır.

Yazı müəllifi bunu da diqqətə çatdırır ki, Azərbaycan müstəqillik qazandıqdan sonra ən çox diqqət yetirilən sahələrdən biri də gənc nəslin təlim-tərbiyəsidir.

Müəllif əlavə edir ki, gənclər siyasəti ilə bağlı məqsədyönlü fəaliyyət proqramı nəticəsində ölkədə böyük vətənpərvər gənclər ordusu yaranıb və hazırda Azərbaycanda gedən bütün islahatların mərkəzində gənclər dayanır.

“Bu gənclər dövlət müstəqilliyinin möhkəmləndirilməsində, ölkədə uğurlu islahatların həyata keçirilməsində, dövlət qarşısında duran vacib problemlərin həllində öz sanballı töhfələri ilə fəallıq göstərirlər”, deyə müəllif gəncliyin roluna yer verir.

Müəllifə görə, dövlət rəhbərliyinin gəncləri düzgün yola istiqamətləndirməsi, gəncliyə xüsusi diqqət və qayğı göstərməsi ölkəmizin sürətli inkişafına böyük təsir göstərib, həm də gənclər siyasəti gənclərin yeni inkişaf modeli kimi təqdim edilən könüllülük hərəkatının geniş vüsət almasına şərait yaradıb.

Müəllif vurğulayır ki, Prezident İlham Əliyev 2020-ci ili Azərbaycanda “Könüllülər ili” elan edib, bu, ölkədə könüllülüyün yeni, daha məhsuldar mərhələyə qədəm qoymasının təsdiqidir:

Müəllifə görə, “Könüllülər ili” gənclərin ilk iş təcrübəsi qazanmasına, özlərini sınaqdan keçirmələrinə imkan yaratmaqla yanaşı, təşəbbüskar, innovativ düşüncə tərzinə, müasir dünyagörüşünə malik gənclərin vahid niyyət ətrafında birləşməsinə, xalqın rifahı, ölkənin dayanıqlı inkişafı naminə fəaliyyətinə böyük stimul olacaq.

Sığorta hansı halda məcburi ola bilər? - eskpert açıqlayır

“Modern.az”da isə “Mənzillərin sığortası məcburidir? - iqtisadçı: Sığorta şirkətləri bilərəkdən ajiotaj yaradır” sərlövhəli məqalə oxumaq olar.

Müəllif daşınmaz əmlakın sığortası və onun məcburi olub-olmaması barədə iqtisadçı-ekspert Natiq Cəfərli ilə söhbətləşir.

Müəllif 2011-ci ildə qəbul edilmiş “İcbari sığorta haqqında” qanunun müvafiq maddəsində hüquqi və fiziki şəxslərin dövlət qeydiyyatına alınmış daşınmaz əmlaklarının sığortasının məcburi olduğunu bildirir.

Amma müəllif bunu da əlavə edir ki, dövlət qeydiyyatına alınmamış əmlakların sığortası məcburi deyil.

  Müəllif diqqəti bu məqam üzərində xüsusi olaraq cəmləyir ki, qanun 2011-ci ildə qüvvəyə minib, indiyə kimi nəzarət, cərimə mexanizmi tətbiq edilməyib, 2020-ci ildə isə qanuna heç bir dəyişiklik edilmədən sığorta məcburi hal alır.

N.Cəfərli isə “modern.az”a açıqlamasında deyir ki, sığortanın icbariliyi barədə əhali arasında yaranan ajiotajın səbəbkarı sığorta şirkətləridir: “Sığorta şirkətləri bilərəkdən ajiotaj yaradaraq, əhalinin daşınmaz əmlakını sığortaya cəlb etmək niyyəti güdür, əlavə gəlir mənbəyi əldə etməyə çalışırlar. Bu qanun çoxdan qəbul olunub, amma tətbiqilə bağlı ciddi problemlər var, çünki ölkədə 650-700 min daşınmaz əmlakın sənədi yoxdur. İllərdir “sənədsiz evlər” məsələsi həll olunmur. Sənədi olmayan daşınmaz əmlakın sığortalanması mümkün deyil. Ölkədə təqribən milyon yarıma yaxın daşınmaz əmlak var. Bunların sığortasını 50 manatdan hesablasaq, 75 milyon manat əlavə gəlir deməkdir... Amma ölkə ərazisində qanun hamıya bərabər şəkildə tətbiq olunmursa, onun işləməsi mümkün deyil”.

Ekspert hesab edir ki, cərimə yazıldığı halda onu ödəməyən vətəndaşın hər 20 gündən bir cərimlənəcəyi barədə yayılmış informasiya həm absurddur, həm də yenə də kimlərinsə maraqlarına xidmət edir.

N.Cəfərli deyir ki, hansısa qanun pozuntusuna görə cərimə il ərzində 1 dəfə yazıla bilər, odur ki, eyni əmələ görə hər 20 gündən bir cərimə yazılması mümkün deyil.

Bununla yanaşı, iqtisadçı hesab edir ki, bu ajiotajın aradan qaldırılması üçün hökumət açıqlama verməlidir, amma, təəssüf ki, rəsmi orqanlar susur, danışanlar isə sığorta şirkətlərinin nümayəndələridir.

N.Cəfərliyə görə, ilkin olaraq daşınmaz əmlakla bağlı amnistiya aktı qəbul olunmalı, bütün daşınmaz əmlaklar rəsmiləşdirilməlidir, yalnız bundan sonra  sığortanın icbari tətbiqilə bağlı qərar verilə bilər, indiki halda bu, bərabərlik hüquqlarıın pozulmasıdır, həm məntiqə, həm də hüquqa ziddir: “Rəsmilər mütləq şəkildə məsələyə aydınlıq gətirməlidirlər, əks halda şaiyələr də artaraq, insanları narahat edəcək”.

Sakinlər nəyə və niyə etiraz edirlər

“Oxu.az”da isə “Yasamalda binaya bitişik obyekt tikənlərlə sakinlər arasında narazılıq: tikintiyə kim icazə verib?” sərlövhəli məqalə diqqət çəkir.

Müəllif Yasamal rayonu, Zahid Xəlilov küçəsində obyekt tikintisinin başlanılmasının 54 nömrəli binada yaşayan sakinlərin narahatlığına və etirazlarına səbəb oldğunu bildirir.  

Müəllifin sözlərinə görə, sakinlər beşmərtəbəli binaya, demək olar ki, bitişik tikilən obyektin onların həm gediş-gəlişinə maneə yaradacağından, həm də evlərinə günəş işığının düşməsinə əngəl olacağından, bunun nəticəsində də binada nəmlənmə baş verəcəyindən ehtiyatlanırlar.

Müəllif əlavə edir ki, ərazidə obyekt tikən sahibkar da, onun köməkçisi də  tikinti üçün rəsmi şəkildə icazə alındığını deyərək, sakinlərin şikayətini əsassız hesab edirlər:

“Biz orda icazəsiz heç bir iş aparmırıq. Bütün sənədlərimiz qaydasındadır.  Sakinlərin dediyi kimi dörtmərtəbəli obyekt yox, ikimərtəbəli iaşə obyekti tikəcəyik”. 

Yazı müəllifi vurğulayır ki, Yasamal Rayon İcra Hakimiyyətindən isə bildiriblər ki, bu işlə Bakı Şəhər İcra Hakimiyyəti və Dövlət Şəhərsalma və Arxitektura Komitəsi məşğul olur. 

Müəllif deyir ki, Şəhərsalma və Arxitektura Komitəsinin mətbuat xidmətindən verilən cavab isə belə oldu: 

“Zahid Xəlilov, 54 ünvanında iş aparan Hünər Muradov adlı şəxsin Bakı Şəhər İcra Hakimiyyəti ilə həmin ərazi ilə bağlı icarə müqaviləsi sənədi var, sakinlərin şikayəti ilə bağlı məsələ yenidən araşdırılacaq”.