Media �icmal 12.01.19

Dövlət başçısı ölkənin iqtisadi göstəriciləri haqqında, iraqlı turistlərə Azərbaycanda sadələşdirilmiş viza verilməsinin ləğvi, çoxluğun problemi və s. məsələlər bugünkü (12 yanvar, 2019-cu il) medianın aparıcı mövzularındadır.

Dövlət başçısı: Bütün iqtisadi göstəricilər müsbətdir

"Azərbaycan" qəzetində "Prezident İlham Əliyevin sədrliyi ilə Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib" sərlövhəli məqalədə həmin iclasda dövlət başçısının ölkə həyatının müxtəlif sahələr üzrə inkişafına dair çıxışna yer verilib.

Prezidentin sədrliyi ilə iclas yanvarın 11-də keçirilib və dövlət başçısı bütün sahələr kimi iqtisadi sahədəki duruma da dair fikirlərini iafdə edib.

Bütün iqtisadi göstəricilərin çox müsbət olduğunu deyən dövlət başçısı bəzi göstəriciləri ictimaiyyətin diqqətinə çatdırıb: "Ümumi daxili məhsul, yəni, iqtisadi artım keçən il Azərbaycanda 1,4 faiz olmuşdur. Hesab edirəm ki, bu, yaxşı göstəricidir. Əlbəttə ki, bizim arzularımızı tam əks etdirmir. Ancaq eyni zamanda, dünyada gedən proseslərə baxdıqda hesab edirəm ki, yaxşı göstəricidir. Ondan daha yaxşı göstərici qeyri-neft sektorunun inkişafıdır. Burada da inkişaf 1,8 faizdir. Sənaye istehsalı 1,5 faiz artıb, qeyri-neft sektorunda isə sənaye istehsalı 9,1 faiz artıb. Bu, onu göstərir ki, sənayeləşmə siyasətimiz öz gözəl nəticələrini verir".

Dövlət baçısı vurğulayıb ki, inflyasiya cəmi 2,3 faizdir, əhalinin pul gəlirləri 9,2 faiz artıb, manatın məzənnəsi sabitdir, kənd təsərrüfatı 4,6 faiz artıb.

Prezident bildirib ki, 2018-ci ildə ölkə iqtisadiyyatına 17,2 milyard manat sərmayə qoyulub ki, bunun da 11 milyard manatı, qeyri-neft sektoruna qoyulan sərmayədir : "Yəni, bu, onu göstərir ki, Azərbaycan sərmayə qoyuluşu üçün çox cəlbedici ölkədir. Dünya Bankının son hesabatında bizim 25-ci yerə qalxmağımız hesab edirəm ki, sərmayə qoymaq istəyənləri daha da həvəsləndirəcək və ölkəmizə daha çox sərmayə qoyulacaqdır.

Dövlət başçısı xərclərin çox olmasına baxmayaraq, 2018-ci ildə valyuta ehtiyatlarının 3 milyard dollar məbləğində artırılaraq 45 milyard dollara bərabər olduğunu deyib.

Onun sözlərinə görə, xarici borc 22,8 faizdən 19 faizə düşüb və bu da çox müsbət haldır.

Dövlət başçısı deyib ki, ölkənin kreditlər ala bilmək imkanı geniş olsa da kreditlərin alınmasının məhdudlaşdırılması göstərişi verib, buna ehtiyac olmadığını bildirib.

Prezidentin deməsinə görə, 2018-ci ildə118 min daimi iş yeri yaradılıb, işsizlik aşağı səviyyədə saxlanılıb, ixracın 36 faiz artaraq 19 milyard dollara çatıb, xarici ticarət balansında müsbət saldo 8,6 milyard dollar təşkil edib.

Ləğv edilən sadələşdirilmiş viza: səbəb

"Müsavat. com" saytında isə "İraqlı turistlər üçün vizanın ləğvinin sensasion səbəbləri sərlövhəli məqalə oxumaq olar.

Müəllif Azərbaycana gələn iraqlı turistlərə sadələşdirirlmiş viza verilməsinə qadağanın səbəblərini ekspertlərlə müzakirə edir.

Müəllif deyir ki, son iki ildə Azərbaycan turizmində müəyyən qədər inkişaf tempi müşahidə edilməkdə idi və bunun ən bariz göstəricisi də ərəb turistlərinin axını hesab olunurdu.

Amma son vaxtlar həm paytaxtda, həm də bölgələrdə ərəb turistlərə daha az rast gəlinir və bunun bir səbəbi kimi, Azərbaycanın xidmət və iaşə sektorundakı qiymətlərin bahalığı, digər bir səbəb kimi isə İraq turistlərinə sadələşdirilşmiş viza rejiminin ləğv edilməsi göstərilir.

Müəllif deyir ki, iraqlı turistlərə aeroportda viza verilməməsinin səbəblərindən biri kimi İraqda Azərbaycan əleyhinə aparılan kampaniya göstərilir.

Müəllifin deməsinə görə, iraqlı bloger Ali Əthabın Azərbaycana gələn ərəb turistlərdən "8000 ərəbin Azərbaycanda QİÇS-ə yoluxması" iddiası aidiyyəti qurumları da hərəkətə gətirib.

Yazıda deyilir ki, İraq cəmiyyətində ərəblərin Azərbaycanda əxlaqsız həyat tərzi sürməsi, belə məkanların kütləvi olması ilə bağlı ictimai rəy formalaşdırılması da sadələşmiş vizanın ləğv edilməsinə əsas səbəblərdən biri kimi göstərilir.

"Yeni Müsavat"ın yazarı Kənan Rövşənoğlu da hesab edir ki, iraqlılara sadələşmiş vizanın ləğvi daha çox İraqda Azərbaycan əleyhinə aparılan kampaniya ilə bağlıdır: "Son illərdə daha çox iraqlılar ölkəmizə turist olaraq gəlirdi, onlarla bağlı bir çox problemlər yarandı. Əsasən də 400-500 dollarlıq paketlərlə gəlirdilər, əyləncə məqsədi ilə, ailəli olmayan tək adamlar daha çox gəlirdilər. Bu səbəbdən onlar arasında əxlaqsızlıq yayılmışdı. Ötən il İraq televiziyası Bakıya gələrək burada yarımsaatlıq geniş bir reportaj hazırladı, daha sonra o, İnternetdə yayıldı. Bildirilirdi ki, guya burada 600 nəfərdən çox iraqlı QİÇS və digər cinsi xəstəliklərə yoluxub, 8 nəfər dünyasını dəyişib".

K.Rövşənoğlu deyir ki, bu, bir qədər də Azərbaycana qarşı antikampaniya xarakteri daşıyırdı, ölkənin imicinə ziyan vururdu, daha çox buna görə iraqlı turistlərin səfərinin qarşısını almaq üçün sadələşmiş viza ləğv edildi.

REAL Partiyasının icraçı katibi Natiq Cəfərli isə hesab edir ki, bu qərar həm də təhlükəsizlik məsələləri ilə əlaqədar ola bilər:

N.Cəfərli fikrini belə əsaslandırır ki, İraqdan Azərbaycana müəyyən sızmaların olmaması, radikal dini qrupların üzvlərinin gəlməsinin qarşısını almaq üçün, gələnlərin daha ciddi yoxlamalara məruz qalması üçün belə bir qərar verilib.

N.Cəfərli güman edir ki, xüsusi xidmət orqanlarında müəyyən "sızmalar"a dair məlumatlar olub və təhlükəsizlikdən başqa hər hansı səbəblə bunu izah etmək çətin olar.

İki dövlətin arasında münasibətlərin normal olduğunu deyən N.Cəfərli bu ləğvə səbəb kimi təhlükəsizlik məsələsini göstərir.

Çoxluğun problemi və səbəb

"Azadlıq.info"da isə "Ailә idarәçiliyi vә әzilәn xalq" sərlövhəli məqalə diqqəti cəlb edir.

Müəllif ölkədə olan problemlər və bunun səbəblərini araşdırmağa səy edir.

Yazıda iddia edilir ki, xalq maddi həyatını qənaət, sıxıntı çərçivəsində qurub və bunun səbəbi mövcud idarəetmə sistemindədir.

Müəllifin daha bir iddiasna görə, böyük əksəriyyət hələ də işsiz və mənzilsizdir.

Yazı müəllifi vurğulayır ki, cəmiyyət də parçalanmış bir durumdadır, özü də ev-ev, küçə-küçə, kənd-kənd, şəhər-şəhər bölünüb.

Müəllifə görə, daha bir problem ölkədə sərvətlərin ədalətsiz bölgüsüdür, minimum dolanışıq belə təmin olunmur.

Müəllif iddia edir ki, hakimiyyət vətəndaşlar üçün bərabər imkanlar yaratmayıb, çoxluğun hüquqları tanınmır, ağa- qul, feoadal münasibətlər hökm sürür.

Yazıda ölkədə yaxşı təhsilin, böyük əksəriyyət üçün müalicənin olmadığı, hakimiyyətin insanları işlə təmin edə bilmədiyi iddiasını ortaya qoyur.

Müəllif deyir ki, hazırda ölkədə dəbdə olan "İş axtarma. iş qur" layihəsi illuziya yaratmaqla işsizliyin məsuliyyətini hakimiyytin üzərindən götürmək cəhdidir, amma yalandan bir-iki görüntü yaratmaq, göstərmək nəyi isə ifadə etmir.

Müəllifə görə, böyük əksəriyyət əlverişsiz mühitdə, kapitalsız vəziyyətdədir və belə halda bütün qapılar bu insanların üzünə bağlı olur, onda özləri üçün işi necə qursunlar. iş göydən düşmür.