Bakı ilə İrəvan arasında sülh müqaviləsi imzalamağa nə mane olur? - Tomas de Vaal Çətin sualda saat 19:00

Britaniyalı siyasi analitik Tomas de Vaal "Çətin sual" proqramına verdiyi müsahibədə sülh sazişi ətrafında gedən danışıqlar prosesindəki çətinliklərdən bəhs edərək, Azərbaycanın Ermənistan Konstitusiyasından Azərbaycan ərazilərinə olan iddiaların çıxarılması tələbinə toxunub.

Onun fikrincə, konstitusiya ilə bağlı məsələ təxminən altı ay əvvəl ortaya çıxıb. “Məncə, Ermənistanın baş naziri Nikol Paşinyanın qısa zamanda bu cür sürətli dəyişikliklər etməsi çox çətindir.

“Bu, vaxt tələb edən çətin bir prosesdir. Azərbaycanın təzyiqi altında bu dəyişiklikləri bir neçə ay ərzində etmək mənə qeyri-real görünür. Buna görə də proses çıxılmaz vəziyyətə gəlib,” – deyə de Vaal bildirib.

O, sülh prosesinin Bakıda tezliklə keçiriləcək COP29 zamanı yeni bir impuls qazana biləcəyini irəli sürüb. Çünki orada kifayət qədər ciddi beynəlxalq liderlər iştirak edəcək. Eyni zamanda həmin dövrə qədər növbəti ABŞ prezidentinin kim olacağı məlum olacaq. Ancaq o vaxta qədər Ermənistan konstitusiyası ilə bağlı bu çox ciddi məsələnin həllinin görünmədiyini deyib.

Bəzi Qərb analitiklərinin Bakının sülh sazişini imzalamağa, guya Moskvanın təzyiqi altında getmədiyi və Rusiyanın Paşinyana daim problemlər yaratmaq, sülh sazişinin öz iştirakı olmadan imzalanmaması istəyi ilə bağlı söylədiklərinə münasibət bildirən de Vaal, avqust ayında Bakıda Əliyev və Putin arasında nə razılaşdırıldığını və ya ümumiyyətlə nəyin razılaşdırılıb-razılaşdırılmadığını yalnız təxmin etmək mümkün olduğunu qeyd edib. Lakin onun fikrincə, ümumi mənzərə belədir: Moskva Ermənistanın təcriddə qalmasını, onun sərhədlərinin (Azərbaycan və Türkiyə ilə) bağlı qalmasını, Rusiyanın Ermənistanda hərbi iştirakını davam etdirməsini və Ermənistanın daha çox loyal olmasını istəyir. Məsələ burasındadır ki, Azərbaycan nə istəyir - daha Qərbyönümlü bir Ermənistan, ya yox?

“Aydındır ki, Moskva Ermənistanı Rusiyanın təsir dairəsində saxlayacaq bir Azərbaycan-Ermənistan razılaşmasında maraqlıdır,” – deyə de Vaal bildirib.