Media-icmal 12.03.21

Ölkədə siqaretin bahalaşması, metropolitenin fəaliyyətə başlaması ilə bağlı çağırışlar, təhsil haqlarını ödəyə bilməyən tələbələrin problemləri, Azərbaycanın Rusiyadan vaksin alması üçün saziş imzalaması və s. məsələlər medianın aparıcı mövzuları sırasındadır.

“Yenisabah.az”  saytı Azərbaycanda sürətli bahalaşma: Spirtli içkilər, ərzaq və bütün məhsullar...” sərlövhəli məqalədə ölkədə sürətli bahalaşma olduğu iddialarını iqtisadçı-ekspert Natiq Cəfərli ilə müzakirə edir.  

Martın 11-də Azərbaycanda siqaretin qiyməti növbəti dəfə bahalaşıb, siqaretin topdansatışı ilə məşğul olan firmalar bütün növ siqaretləri 20 qəpik bahasına satıblar.

Ekspert siqaretin qiymətinin artmasının gözlənilməz olmadığını deyir: “Çünki fevral ayında aksiz vergilərində dəyişiklik edildi. Logistika xidmətləri də bahalaşıb. Dizel yanacağının qiymətinin artması daşımaçılığı da artırıb və bunlar bir-birinin üzərinə gələndə siqaretin qiymətinin artması normaldır”, - ekspert mövqeyini ifadə edir.

Onun deməsinə görə, bahalaşma bir çox sahələrdə sürətlə gedib. Siqaretə gəlincə isə ekspert deyir ki, artıq 2-3 ildir ki, ard-arda aksiz dərəcələri artır və bundan sonra da spirtli içkilərdə və tütün məmulatlarında qiymət artımı ola bilər.  

Bununla birgə ekspert əlavə edir ki, digər məhsulların qiymət artımı insanları ciddi narahat edir, bayram öncəsi ərzaq məhsullarında növbəti artım dalğasının ola bilməsi ehtimalı kifayət qədər yüksəkdir.

“Mətbuat.az” saytı “Metronu açın ki, insanlar əziyyət çəkməsin - Millət vəkili” sərlövhəli məqalədə müəllif son günlərdə koronavirus infeksiyasına yoluxmanın artmasının səbəblərini deputat Cavanşir Paşazadə ilə müzakirə edir.

Deputat deyir ki, heç kəs virusa yoluxanların sayının artmasıni istəmir, amma avtobuslarda hədsiz sıxlıq müşahidə edilir, insanlar bir-birinə yaxın məsafədə yol qət etməli olurlar, bu isə yoluxma üçün də şərait yaradır.

Deputata görə, avtobuslarda sərnişin sıxlığının yaranmasının əsas səbəbi        metropolitenin fəaliyyətsiz qalmasıdır: “Metronun bağlanması işlərin bir qədər də pisləşməsinə gətirib çıxardı. Pik saatlarda nəqliyyatın gecikməsi səbəbindən 20 adam əvəzinə az qala 50 adam eyni avtobusdan istifadə edir.

Deputat  hesb edir ki, problemlərə səbəb hökümətin qarşısında düzgün proqramların qurulmamasıdır.: “Mən düşünürəm ki, metronun açılması xəstəliyin daha da çoxalmasının qarşısının alınmasında kömək edə bilər''.

Milli Məclis üzvü əlavə edir ki, insanlar metro ilə 15 dəqiqəyə gedəcəkləri yolu avtobusla bir saata getməli olurlar. Onun fikrincə, metro çoxdan açılmalı idi və hər kəs üzərinə düşən işini vaxtında görərsə, bütün problemlərin həllində müsbət dəyişikliklər olar.

“Sfera.az” saytı “Azərbaycanda 5 min tələbə təhsil haqqını ödəyə bilmədiyinə görə xaric edildi” sərlövhəli məqalədə tələbələrin təhsil haqlarını ödəmə durumunu mütəxəssis və ekspertlərlə dəyərləndirir.

Müəllif deyir ki, 2021-ci ildə "Təhsil-tələbə krediti" sisteminin yaradılması nəzərdə tutulub və bu barədə Nazirlər Kabinetinin 2020-ci il üzrə hesabatında bildirilib.

Sənədə əsasən bu məqsədlə 2021-ci il üçün təsdiq edilən dövlət büdcəsində 80 milyon manat vəsait nəzərdə tutulub. Amma kreditlərin necə və hansı kriteriyalar üzrə veriləcəyi hələ ki bəlli deyil.

Müəllifə görə, bu il yanvarın sonunda hökumət və parlament arasında təhsilə verilən kreditlər barədə razılaşma planı var.

Müəllif vurğulayır ki, 2015-ci ildə Təhsil Nazirliyinin təşəbbüsü ilə dövlət ali təhsil müəssisələri "Maarifçi" Tələbə Kredit Fondu təsis ediblər. 6 il ərzində onun 15 universitetdə tələbələrlə cəmi 272 təhsil krediti müqaviləsi imzaladığı bildirilir.

Tələbələrə təhsil kreditləri üçün vəsait ayrılsa da hələlik proqramın mexanizmləri məlum deyil: “ Bu, çox yaxşı qərardır, çünki bəzi tələbələr təhsil haqqını ödəyə bilmir və universitetdən xaric olunurlar. İndi isə onlar kredit hesabına belə problemlə rastlaşmayacaqlar” deyə mütəxəssislər bildirirlər.

Təhsil sahəsi üzrə ekspert Kamran Əsədov isə təhsil haqlarımı ödəyə bilmədikləri üçün son 7 il ərzində 5 min tələbənin universitetlərdən xaric olunduğunu bildirir. K.Əsədova görə, tələbə kreditləri üçün ayrılan 80 milyon manat 38-42 min tələbənin təhsil haqqını ödəməyə imkan verəcək.

“Bizimyolinfo.az”  saytı  “Azərbaycan Çin istehsalı vaksinləri Rusiya ilə əvəzlədi – aralarında hansı fərqlər var…” sərlövhəli məqalədə müəllif  Azərbaycanın COVİD-19 pandemiyası əleyhinə Rusiya vaksinlərindən istifadəni həkim-farmakoloq Müşfiq Hüseynovla dəyərləndirir.

Baş nazir Əli Əsədov "Dərman vasitəsinin idxalı barədə" sərəncam imzalayıb. Bu sənədə əsasən İcbari Tibbi Sığorta üzrə Dövlət Agentliyi ilə Rusiya Federasiyasının “HUMAN VACCINE” MMC şirkəti arasında təchizat szişi imzalanıb. Sazişə əsasən 300 000 (üç yüz min) doza “Sputnik V” dərman vasitəsinin Azərbaycana idxalı 180 (yüz səksən) gün müddətində həyata keçiriləcək.

Azərbaycanda yanvar ayının 18-dən vaksinasiyanın birinci mərhələsinə start verilib və Çinin "Sinovac Biotech" şirkətinin istehsalı olan “CoronaVac” vaksinindən istifadə olunub.

Həkim-farmakoloq Müşfiq Hüseynovun deməsinə görə, bu peyvəndlər arasında elə də qlobal fərq yoxdur: “Çin bütün dünyaya vaksin verir. Bəlkə də bizə lazım olan sayı çatdırmaqda biraz zaman problemi olduğu üçün alternativ variantlardan istifadə olunub. Çin və Rusiya peyvəndləri aşağı-yuxarı eynidir. Hansının vurulacağının heç bir fərqi yoxdur. Əsas odur ki, vurulsun”,- M.Hüseynov deyib.