Media-icmal 13.08.18

Gənclərlə bağlı yürüdülən siyasətə baxış, manata təzyiq ola bilməsi ehtimalları, Bakının baş planının hələ də olmaması və s. məsələlər bu (13 avqust, 2018-ci il) medianın aparıcı mövzularındandır...

Gələcəyin qarantları-gənclər

"Azərbaycan" qəzeti "Gənclər gələcəyin qarantıdır" sərlövhəli məqalədə gənclərə yönələn siyasəti dəyərləndirir.

Müəllif deyir ki, Azərbaycanda gənclər siyasəti dövlət siyasətinin mühüm tərkib hissəsidir: "Vaxtilə ümummilli lider Heydər Əliyevin gənclərə göstərdiyi xüsusi diqqət və qayğı, Azərbaycan dövləti üçün qoyub getdiyi irs bu gün onun layiqli davamçısı prezident İlham Əliyev tərəfindən uğurla davam etdirilir. Bunun nəticəsidir ki, Azərbaycan gəncləri bütün sahələrdə özlərini doğruldurlar".

Müəllif bildirir ki, gənclərin fəaliyyəti üçün dövlətin yaratdığı geniş imkanlar nəticəsində bu təbəqə cəmiyyətin aparıcı qüvvəsinə çevrilib. və gənclər müxtəlif sahələrdə istedad və uğurları layiqincə nümayiş etdirirlər.

Müəllifin deməsinə görə, gənclər təşkilatları dövlət gənclər siyasətinin əsas istiqamətlərindən biri olmaqla yanaşı, vətəndaş cəmiyyətinin qurulmasında gənclərin iştirakını şərtləndirən əsas amillərdən biridir: "Hazırda Azərbaycanda 300-dən artıq gənclər təşkilatı Ədliyyə Nazirliyində dövlət qeydiyyatına alınıb.
Azərbaycan Respublikasının prezidenti yanında Gənclər Fondu da dövlət gənclər siyasətinin həyata keçirilməsində olduqca böyük rola malikdir".

Müəllif deyir ki, dövlətin gənclərə qayğısı bu Fondla yekunlaşmır, dövlət başçısının imzaladığı sərəncamla təsdiq olunan "Azərbaycan gəncliyi 2017-2021-ci illərdə Dövlət Proqramı"nın qəbul olunması bu gün yetişən gənclərin inkişafına dəstək verməklə yanaşı, onların qarşısına mühüm vəzifələr qoyub.

Prezident İlham Əliyev gənclər haqqında danışarkən deyib: "Gənclər əlbəttə ki, cəmiyyətimizin fəal üzvləri kimi ölkəmizin güclənməsində əsas rol oynayırlar.

Mən gənclərin fəaliyyətini yüksək qiymətləndirirəm. Həm beynəlxalq müstəvidə, həm ölkə daxilində mən görürəm ki, bu gün böyüyən gənclər xalqa, dövlətə bağlıdırlar. Bu, çox önəmlidir, gənclər gərək milli ruhda tərbiyə alsınlar, biz milli dəyərlərimizi hər şeydən üstün tutmalıyıq".

Müəllif deyir ki, dövlət gənclərin hərtərəfli inkişafı, onların intellektual səviyyəsinin yüksəldilməsi üçün bütün imkanlardan istifadə edir və əminliklə deyə bilərik ki, Azərbaycanda həyata keçirilən gənclər siyasəti bir çox ölkələrə nümunədir.

Deputat: "Manata təzyiqlər artacaq"

"Modern.az" saytında isə "Manata təzyiq artacaq-Deputat aidiyyatı orqanları süni ajiotaj yaratmamağa çağırdı" sərlövhəli məqalə oxumaq olar.

Müəllif ABŞ-ın İran və Türkiyə ilə indiki gərgin münasibətləri fonunda baş verən proseslərin neftin qiymətinə və Azərbaycan iqtisadiyyatına mümkün mənfi təsirlərini deputat Əli Məsimli ilə müzakirə edir.

Müəllif bildirir ki, ABŞ avqustun 7-dən İran hökumətinin dollar almasından tutmuş mədən sənayesinə, xalça satışına qədər sahələrinə sanksiyalar tətbiq edib, üstəlik, noyabr ayında daha sərt sanksiyaların tətbiq olunacağı xəbərdarlığı edib.

Qarşıdakı sanksiyaların bir mahiyyəti də bu sanksiyalara baxmadan İranla əməkdaşlıq edən dövlətlərin ABŞ-la əməkdaşlıqdan məhrum edilmələridir:

"Sanksiyaların İran iqtisadiyyatına təsiri artıq hiss olunur. İnflyasiya, milli valyutanın devalvasiyaya uğraması, insanların narazılığı kimi simptomlar artıq müşahidə olunmaqdadır".

Müəllif deyir ki, Ə.Məsimli nefti, sadəcə, iqtisadiyyat yox, həm də geosiyasət adlandırır və bu baxımdan son vaxtlar dünyada baş verən proseslərin neftin qiymətinə təsir edəcəyini bildirir: "Hazırda baş verən ticarət müharibəsi şəraitində neftin qiymətinin artmasına və aşağı düşməsinə təsir edə bilən amillər bir-birinə qarışdığından, hansının üstünlük təşkil edəcəyini indidən demək çətindir".

Ə.Məsimli deyir ki, indiki "ticarət müharibəsi"nə həm də ucuz neft və qaz təklifi də daxildir, bu variant özünü geniş miqyasda doğrulda bilsə, təklif olunan ucuz neft və qazın həcmindən asılı olaraq enerji daşıyıcılarının qiymətinin aşağı düşməsinə, qalan amillərin xeyli hissəsi isə müəyyən vaxt kəsiyində neftin qiymətinin artmasına təsir göstərə bilər.

Ə.Məsimli deyir ki, dünya iqtisadiyyatının tərkib hissəsi kimi dünyada baş verən hadisə və proseslər Azərbaycan iqtisadiyyatınin dünya iqtisadiyyatı ilə daha çox inteqrasiya olunan hissəsinə təsir göstərəcək: "Məsələn, neftin qiymətinin qalxıb -enməsi Dövlət Neft Şirkətinin, Dövlət Neft Fondunun, dövlət büdcəsinin gəlirlərinə təsir edəcək. Neftin qiymətinin kəskin aşağı düşməsi, qalma müddətindən asılı olaraq tədiyə və xarici ticarət balansının indiki müsbət saldosuna, bu isə manata da mənfi təsir göstərə bilər.

Amma deputat deyir ki, Azərbaycan maliyyə bazarı dünya maliyyə bazarı ilə zəif əlaqəli olduğu üçün bu proseslər ölkənin maliyyə bazarına birbaşa təsir etməyəcək.

Ə.Məsimli bildirib ki, Azərbaycanın daha çox iqtisadi əlaqədə olduğu və ticarət etdiyi ölkələrin milli valyutalarının dəyərdən düşməsi manata təzyiqi artıracaq: "Ona görə də aidiyyatı orqanlar son vaxtlar manatın məzənnəsinə müsbət və mənfi təsir göstərən amillərin təsir gücünün nisbətini incələyərkən bu amili ciddi şəkildə nəzərə almalı, valyuta dəyişdirilməsinə məhdudiyyətlə qoymaq və s. kimi üsullarla süni ajotaj yaratmamalıdırlar".

Baş plansız inkişaf edən Bakı

"Novoye Vremya" qəzetində isə "Bakıda sükansız tikintilər" sərlövhəli məqalə diqqət cəlb edir.

Müəllif Bakının baş planının hazırlanması fonunda paytaxtda qanunsuz tikililərə qarşı mübarizənin aparılması sahəsindəki durumu dəyərləndirir.

Müəllif deyir ki, bundan ötrü Şəhərsalma və Arxitektura Komitəsinə 4 milyon manat vəsait ayrılıb, Komitə isə Boston Consoulting Groupu baş planın hazlanmasının ilkin mərhələsinə cəlb edib və bundan ötrü bu şirkətə 1 milyon 285 min avro vəsait ödəyəcək.

Müəllifə görə, baş plan hazırlanan müddətdə bu sahədə qanunsuz tikintilərin başlanmasına yol verməmək üçün komitə ilə baş prokuror yanında Korrupsiyaya Qarşı Baş Mübarizə İdarəsilə əməkdaşlıq memorandumu imzalanıb.

Müəllif deyir ki, memorandum imzalandıqda komitə sədri Samir Nuriyev çıxışında iş adamlarına xəbərdarlıq da edib: "Rəsmi icazə olmadan, sənədləşmə aparılmadan tikintiyə başlamaq olmaz. Bəzən olur ki, tikinti işi hər hansı sənəd olmadan başlanılır. Özəl şirkətlər öz fəaliyyətlərini qanun əsasında icra etməlidirlər".

Müəllif bu çağırışı yaxşı hesab etsə də böyük pullardan söhbət getdiyi yerdə belə çağırışlara kimlərinsə qulaq asacağına inamsız yanaşır və Korrupsiyaya Qarşı Baş Mübarizə İdarəsinin rəisi Kamran Əliyevdən sitat gətirir: "Son 6 ildə belə qanunsuz tikinti ilə 89 nəfəri əhatə edən 61 cinayət işi məhkəmələrə göndərilib, bunun nəticəsində 4072 vətəndaş ziyan çəkib, 111625 397 manat həcmində ziyan dəyib. Hazırda isə daha 16 prokurorluğun icraatındadır".

Yazı müəllifi deyir ki, qanuni tikintilər sahəsində problemlər var, belə ki, paytaxtın baş planı yoxdur, amma tikintilər davam edir: " "Qış bulvarı"nın salınması zamanı baş verənləri yada salmaq kifayətdir ki, vətəndşaların hansı qanunsuzluqlara məruz qaldıqları aydın olsun. Yaxud, indi Sovetski məhəlləsində irimiqyaslı tikini işləri aparılır. Amma yenə də şəhərin baş planı yoxdur".

Şəhərin baş planına gəlincə burada "qarmaqarışıqlıq" olduğunu deyn müəllif vurğulayır ki, hələ 2013-cü ildə Şəhərsalma komitəsi baş planı Nazrlər Kabinetinə təqdim etdiklərini, bütün nazriliklərlə razılaşdırdıqlarını bir neçə aya təsdiq ediləcəyini bildirirdi: "Amma bu, baş vermədi və səbəbi də indiyə kimi aydın deyil.

Paytaxtın baş planı ilə bağlı istənilən qədər bəyanatlar verilsə də onu hansı halda olduğu barədə aydınlıq ortaya qoyulmadı".

Müəllifin fikrincə, Bakının növbəti baş planı üzərində işləyəcək ekspertlər 20 ildir ki, tikilən, sökülən, bunlara milyardlar xərclənən paytaxtda baş plan olmamasını təəccüblə qarşılayacaqlar.

Faktoloji olaraq inkişaf edn Bakının inkişaf strategiyası yoxdur, ya da bu, bakılılara məlum deyil.

Son olaraq müəllif baş planın hazırlanması üçün daha nə qədər vaxt lazım gəlməsi sualını diqqət mərkəzinə çəkir.