Media-icmal 15.10.19

Azərbaycan-Avstriya ticarət əlaqələrinin inkişafı, tikinti materiallarının qiymətlərindəki vəziyyət, ehtimal olunan qlobal böhranın Azərbaycana mümkün təsirləri və s. məsələlər bugünki (15 oktyabr, 2019-cu il) medianın aparıcı mövzularındandır...

İki dəfə artan ticarət dövriyyəsi

"Azərbaycan" qəzeti "Ötən il Azərbaycanla Avstriyanın ticarət dövriyyəsi 2 dəfəyədək artıb" sərlövhəli məqalədə Azərbaycan-Avstriya ticarət dövriyyəsinin inkişaf trendlərini dəyərləndirir.

Müəllif deyir ki, İqtisadiyyat naziri Şahin Mustafayevin bü günlərdə Avstriya Federal Nəqliyyat, İnnovasiya və Texnologiya naziri Andreas Rayxhardtın rəhbərlik etdiyi nümayəndə heyəti ilə görüşündə Avropa İttifaqı ilə əməkdaşlığın Azərbaycanın xarici siyasətinin əsas istiqamətlərindən olduğu, Avstriya ilə əməkdaşlığa böyük önəm verildiyi, tərəfdaşlığın inkişafında yüksək səviyyəli səfərlərin, keçirilən görüşlərin əhəmiyyəti vurğulanıb.

Müəllif deyir ki, Azərbaycan-Avstriya Əməkdaşlıq Şurası, Avstriya-Azərbaycan Ticarət Palatası, Avstriya İqtisadiyyat Palatasının Azərbaycandakı nümayəndəliyi ölkələrimiz arasında iqtisadi əlaqələrin inkişafına töhfə verir.

"Azərbaycanla Avstriya arasında iqtisadi-ticarət əlaqələri genişlənir. Ötən il ölkəmizin Avstriya ilə ticarət dövriyyəsi 2 dəfəyədək artıb. Azərbaycanda sənaye, tikinti, ticarət, xidmət, bank və sığorta, nəqliyyat və digər sahələr üzrə 50-dək Avstriya şirkəti qeydiyyatdan keçib. Avstriya şirkətləri ölkəmizdə dövlət əsaslı layihələrdə də iştirak edirlər", deyə müəllif bildirir.

Müəllif əlavə edir ki, iqtisadi əməkdaşlığın genişləndirilməsinə gəlincə, investisiya, nəqliyyat-tranzit, sənaye, turizm, səhiyyə, əczaçılıq və tibbi ləvazimatların istehsalı sahələrində əməkdaşlığın inkişaf etdirilməsi üçün böyük potensialı qeyd edib, eyni zamanda, Avstriya şirkətlərinin, əlverişli biznes və investisiya mühitindən yararlanmaqla, Azərbaycandakı sənaye parkları və məhəllələrinə investisiya yatıra bilmələri vurğulanıb.

Avstriya Federal Nəqliyyat, İnnovasiya və Texnologiya naziri A.Rayxhardt ölkəsi ilə Azərbaycan arasında siyasi əlaqələrin yüksək səviyyədə olduğunu vurğulayıb, Azərbaycan-Avstriya iqtisadi əməkdaşlığının genişləndirilməsi istiqamətləri barədə fikirlərini bölüşüb, ikitərəfli əlaqələrin gücləndirilməsi üçün intensiv görüş və müzakirələrin önəmini vurğulayıb.

Avstriya şirkətlərinin rəhbərləri fəaliyyət istiqamətləri barədə məlumat verib, azərbaycanlı həmkarları ilə əməkdaşlıq barədə təkliflərini bildiriblər.

Tikinti materiallarının qiymətləri bahalaşır

"Redaktor.az"da isə "Tikinti materiallarının qiymətləri bahalaşacaq - bu tarixdən..." sərlövhəli məqalə oxumaq olar.

Müəllif tikinti materialları bazarında vəziyyətlə bağlı daşınmaz əmlak üzrə ekspert Nüsrət İbrahimovla söhbətləşir.

N.İbrahimov tikinti materialları bazarındakı qiymət artımından danışarkən ay ərzində 0,27 faiz artım olduğunu bildirir.

Onun sözlərinə görə, əksər tikinti materiallarının qiymətində artım qeydə alınıb: "Kərpicin 8 santimetrlik növündə 2,7%, taxtada 7,2%, 10 millimetrlik diktdə 6,7%, DSP-də 2,9%, DVP-də 6,46% və bütün taxta materiallarında artım olub.

Armaturun qiyməti 10%, boru materialları 8,1% bahalaşıb. Dam örtüyündə "çerepiça"nın qiyməti 6,7% artıb".

Ekspert əlavə edir ki, alçipan 1,4%, izolyasiya materialları 1,1%, laminat parket 12,5%, parket lakı 5,7%, parket 2,2%, metlaxda artım 8,6% təşkil edir.

Ekspert bildirir ki, digər inşaat materiallarında azalma müşahidə edilib, belə ki, sement 5%, "uqolnik" 10%, şveler 16,3%, dəmir təbəqənin qiymətində 1,7% azalma var, şüşə 2%, elektrot 6%, qranit daş 8,9%, üzlük divar daşı 3,8%, boyada 4,9 % qiymət azalması özünü göstərir.

Ekspert bildirib ki, payız mövsümündə taxta materiallarının qiymətində artımın olması qaçılmazdır.

"Qışda dəmir materiallarında da artım olur, çünki idxal materiallarıdır. Yerli materiallarda qiymət mövsümə uyğun olaraq tənzimlənmir. Tənzimləmə əsasən, inzibati amillər, qanunvericiliklə həyata keçirilir. Adətən payız-qış mövsümündə dəmir və taxta materiallarında qiymət artır, daş materiallarında isə bu hal müşahidə olunmur, çünki yerli maldır".

Ekspert bildirib ki, bazarda cəmi 0,27% qiymət artımı görünsə də, çeşidlərə nəzər salanda, xeyli qiymət dəyişkənliyinin şahidi olarıq:

"Tələbata uyğun olaraq qiymətlər dəyişir, ümumilikdə qışa doğru qiymətlər də artım olacaq".

Qlobal böhran yetişir?

"Yeni Müsavat" qəzetində "Dünya qlobal böhrana sürüklənir - ilginc məqamlar" sərlövhəli məqalə diqqət çəkir.

Müəllif dünyanın qlobal böhrana daxil ola bilməsi və bunun Azərbaycana ehtimal edilən təsirləri barədə ekspertlərlə söhbətləşir.

Müəllif iddia edir ki, beynəlxalq təşkilatların, analitik mərkəzlərin dünya iqtisadiyyatına dair proqnozları getdikcə bədbinləşir, dünyada iqtisadi artımla bağlı proqnozlarda azalmya doğru ciddi dəyişikliklər baş verir, bunların fonunda bütün dünyada biznes yeni qlobal böhran gözləntisinə məhkum olunmuş vəziyyətdədir.

Müəllif əlavə edir ki, beynəlxalq ekspertlər növbəti böhranın başlanma vaxtına dair proqnozların əksəriyyətində 2020-2021-ci illəri, buna əsas kimi isə ABŞ-da baş verən böhranlar tsiklini göstərirlər.

Müəllif vurğulayır ki, gözlənilən böhranla bağlı müzakirələri dünya iqtisadiyyatının artım tempindəki zəifləmə daha da gücləndirir.

Müəllifin sözlərinə görə, dünya ticarəti 2008-2009-cu illərin maliyyə böhranından bəri ilk dəfədir ki, ardıcıl 3 rübdə azalma nümayiş etdirir. Bu azalma birinci rübdə 1,4 faiz, ikinci rübdə isə 0,7 faiz olub, hazırda da davam edir, istehsalda biznes aktivliyi (PMI) son 7 ilin, ümumi iqtisadiyyatda isə son 3 ilin ən aşağı həddindədir.

Bu böhranın Azərbaycana çata bilməsi ehtimalı ilə bağlı eskpert Rövşən Ağayev deyir ki, yeni bir resessiya və ABŞ-ın timsalında qlobal bazarlara əlavə neft təklifi neft bazarını yenidən çalxalasa, ən böyük zərbəni dayanıqlı iqtisadi inkişafa malik olmayan resurs ölkələri ala bilər: "Azərbaycan iqtisadiyyatı 2015-2016-cı ilin iqtisadi şokundan hələ də özünə gələ bilmir".

Ekspert Vüqar Bayaramov da bildirir ki, qlobal ticarət savaşının yaradacağı böhran tələbi azaltmaqla neft bazarında qiymətləri endirəcək: "Neftin qiyməti Azərbaycana daxil olan valyutanın həcmi baxımından çox vacibdir. Ölkəmizin ixracatında xam neftin payı 81 faiz, enerji məhsullarının ümumi payı isə 90 faizə yaxındır. 2019-cu il dövlət büdcəsində neftin bir barelinin qiyməti 60 dollar nəzərdə tutulub. Hələlik orta qiymət 60 dollardan yüksək olsa da, növbəti 3 aydakı tendensiya heç də nikbin notlar formalaşdırmır. Azərbaycan üçün fiskal qırmızı xətt 60, monetar qırmızı xətt isə 50 dollardır. Bu baxımdan, neftin qiymətindəki azalmalar monetar baxımdan da arzuolunan deyil. Neftin qiymətində azalmalar davam edərsə, bu, dünya bazarında dolların möhkəmlənməsinə səbəb olacaq. Bu halda ölkəmizdə də dollara tələbin artacağı istisna edilmir. Hər halda, qlobal ticarət savaşı nəinki inkişaf etmiş, heç inkişaf etməkdə olan ölkələr üçün də yaxşı nə isə vəd etmir".