Media-icmal 15.11.2016

Prezidentin ön cəbhəyə səfəri, hökumətin xarici ölkələrə investisiya yatırmaq niyyətləri, ölkəyə inviestor cəlb etmək yolları, Hesablama Palatasının hesabatları açıqlamaması bugünki medianın aparıcı mövzusudur...

Prezidentin “Lələtəpə” mesajı

“Azərbaycan” qəzeti “İlham Əliyev düşmənin bütün hərbi hədəflərinin məhv olunacağını Lələtəpədən bəyan etdi” sərlövhəli məqalədə (http://www.azerbaijan-news.az/index.php?mod=3&id=109856) dövlət başçısı, Ali Baş Komandan İlham Əliyevin noyabrın 12-də cəbhə bölgəsinə və ön cəbhəyə səfərini dəyərləndirir.

Müəllif hesab edir ki, İ.Əliyevin cəbhə bölgəsinə və ön cəbhəyə gəlişi sıradan bir hadisə deyil. Yazıda dövlət başçısının bu ilin aprel döyüşlərində azad edilən “Lələtəpə” yüksəkliyinə gəlişi belə dəyərləndirilir: “Buradan təcavüzkara, onun havadarlarına, Dağlıq Qarabağ münaqişəsinin nizamlanması prosesinə dəxli olan bütün beynəlxalq dairələrə ən sərt mesajını göndərdi”.

Məqalədə İ.Əliyevin ordu komandanları ilə görüşünə obrazlı yanaşma sərgilənir, bu, qaliblərin görüşü adlandırılır və deyilir ki, İ.Əliyev Lələtəpə əməliyyatı nümunəsində bütünlükdə ordunun hərbi gücünü ən yüksək səviyyədə qiymətləndirib. Müəllif hesab edir ki, İ.Əliyev daha geniş ərazilərin azad edilməsi niyyətini də bəyan edib: "İşğal edilmiş torpaqlarda, Dağlıq Qarabağda elə bir hərbi hədəf yoxdur ki, bu gün biz onu məhv edə bilməyək!".

Yazıda deyilir ki, bu gün Azərbaycanda hər kəs qələbəyə köklənib və bunun mümkün olduğunu aprel əməliyyatları sübut edib. Müəllif hesab edir ki, bu, şübhəsiz ki, İlham Əliyevin 13 illik prezidentlik missiyasının məntiqi nəticəsidir.

Məqalədə qarşıda qələbə gözlənilməsi isə belə əsaslandırılır: “Prezidentin yüksək diplomatik fəaliyyəti hərbi əməliyyatların gerçəkləşməsinə beynəlxalq hüquqi zəmin, düzgün iqtisadi siyasət ölkənin bu savaşdan qalib çıxması üçün fövqəladə güc yaradıb, uğurlu hərbi islahatlar ordunun qüdrətini artırıb, xalqın və fəal zümrənin Ali Baş Komandana birmənalı inamı, dəyişməz etimadı var”.

Müəllifə görə, bu istiqamətlər Azərbaycanın iqtisadi-siyasi-hərbi gücünü müəyyənləşdirən əsas amillər, onun qələbəsinin labüdlüyünü şərtləndirən mühüm məqamlardır.

Məqalədə son vaxtlar bir sıra erməni hüquq müdafiəçilərinin Azərbaycanın mövqeyindən çıxış etmələri İlham Əliyevin çağırışlarının Ermənistanda vətənpərvərlərə cəsarət verməsi kimi dəyərləndirilir. Müəllifin fikrincə, artıq ermənilər S.Sarkisyanın “əbədi savaş - əbədi səfalət” siyasətini anlayaraq ondan kütləvi şəkildə üz döndərir və öz gələcəkləri üçün İlham Əliyevin “Qarabağda sülh - Qafqazda inkişaf - erməni xalqının rifahı” təklifini dəstəkləyirlər!

Özünə umac ova bilməyənlər

“Azadlıqinfo” saytında dərc olunan  “Özünə umac ova bilməyənlərin, özgəsinə kəsdiyi əriştə” (http://www.azadliq.info/165336.html) sərlövhəli məqalədə Azərbaycan hökumətinin Burkino-Fasoya sərmayə yatırmaq barədə açıqlamaları tənqid edilir.  

Müəllif hesab edir ki, Azərbaycan özü kritik iqtisadi durum yaşayır və bu kritik durumu belə anladır: “Ölkə hər gün böhranla silkələnir, hər gün ixtisarlar baş verir, hər gün milli valyuta dəyər itirir, hər gün hansısa bank iflas olduğunu elan edir, hər gün intihar halları baş verir, hər gün ölkədən pul axınının şahidi oluruq, hər gün qiymət artımı ilə üzləşirik və.s”.

Məqalədə Azərbaycanın Burkina-Fasoya investisiya yatırmaq niyyəti əsl tragikomediya adlandırılır və bununla bağlı təzad yaşandığı vurğulanır: “Ölkə başçısı xaricdəki iş adamlarını Azərbyacana pul yatırmağa çağırır, icra başçılarına yerli iş adamlarını ölkəyə cəlb etmək tapşırığı verilir, o biri tərəfdən Burkino-Fasoya investisiya yatırmaq eşqinə düşüblər”.

Müəllifə görə, milli valyutası 110 faiz dəyər itirən, 2.5 milyon əhalisi kredit borcu ödəyən, minimum əməkhaqqı 105 manat olan, 25 milyard dollarlıq büdcəsi 10 milyard həddinə düşən Azərbaycan hökuməti Burkino-Fasoya yaxşı həyatın yollarını başa sala bilməz. Müəllifə görə, bir xalq məsəlində deyildiyi kimi, özünə umac ova bilməyənlərin başqasına əriştə kəsməsinə bənzəyir. Məqalədə deyilir ki,  əslində, Azərbaycan hökuməti dünyaya sürətli iqtisadi çöküşün nümunəsini göstərə bilər, varlı ölkəni səfil vəziyyətə salmağın yollarını öyrədə bilər.

Yazıda deyilir ki, dünya Azərbaycanın gününə ağlayır, Azərbaycan hökuməti isə Bolqarıstanda xarabalıqları abad edir, Burkino-Fasoya sərmayə yatırır: “Ölkə vətəndaşı isə yaşamaq uğrunda mübarizə aparır, aclıqla sınağa çəkilir.  Hökumət isə əvvəlcə Afrikalıların qarnını doyurmaq niyyətindədir, çünki, bizim hökumət tolerant və multikulturaldır”.

Əli boş qalacaq gələcək nəsil

“Exo” qəzetində isə “Azərbaycan qeyri-neft sektorunu inkişaf etdirməldir” sərlövhəli məqalə diqqət çəkir. (http://ru.echo.az/?p=50939)

Müəllif ekspert Oqtay Haqverdiyevlə ölkəyə xarici investorların cəlb olunmasını araşdırır.

“Bu, həqiqətən yaxşıdır ki, hökumət ölkəyə daha çox xarici investorlar cəlb etmək istəyir. Amma xarici investora ölkədə yaşamaq güzəştləri vermək çıxış yolu deyil. Belə güzəştlərlə qlobal məsələlər həll edilməz”. Daha geniş miqyasda düşünmək lazımdır”. Bunu isə qəzetə ekspert O.Haqverdiyev şərh edir.

Onun fikrincə, xarici investorları ancaq yaxşı və faydalı şərtlərlə cəlb etmək olar.   O.Haqverdiyev deyir ki, bunun üçün Naxçıvanı sərbəst zona elan etmək lazımdır və dünyanın məşhur şəhərlərindən birində bu, elan olunmalıdır. Ekspertə görə, bu addım buraya xariciləri  və milayardları gətirə bilər.

O.Haqverdiyev deyir ki, bundan əlavə, Azərbaycan tərəf xarici sahibkarlara zəruri olan biznes mühitinin yaradılması öhdəliyi götürməlidir. 5 il ərzində onlardan vergi tələb olunmamalıdır, bunun da əvəzində onlar layihələr reallaşdırmalıdırlar:

“İnhisar və korrupsiya nəzərə alınmaqla xarici investorları kütləvi şəkildə ölkəyə cəlb etməyin başqa yolu yoxdur”.

O.Haqverdiyev bunu indi başlamağı zəruri hesab edir və səbəblərini göstərir: “40 milyon ton neft ehtiyatı 50 ildən sonra tükənəcək, qaz isə 80 ilə çatar. Odur ki, qeyri-neft sektorunu inkişaf etdirmək lazımdır, əks halda gələcək nəsil əli boş qalacaq. Gələcək barədə daha qlobal perspektivdə düşünmək lazım gəlir”.

Palata “şəffaflığı” - gizlədilən hesabatlar”

“Bizim Yol” qəzeti “Hesablama Palatası bir neçə dövlət qurumunda yeyinti aşkarlayıb” (http://www.bizimyol.info/news/87623.html) sərlövhəli məqalədə Palatanın hesabatlarına istinadən dövlət qurumlarının fəaliyyəti müzakirə edilir.

Müəllif deyir ki, Hesablama Palatasının növbəti kollegiya iclasında həyata keçirilmiş dörd nəzarət tədbiri üzrə hesabatlar müzakirə olunub. Bunlar dövlət büdcəsindən Alternativ və Bərpa Olunan Enerji Mənbələri üzrə Dövlət Agentliyi və onun tabeliyində olan müəssisə və təşkilatlara ayrılan vəsaitlərin proqnozlaşdırılması və icrası ilə bağlıdır. Daha bir məsələ isə, dövlət büdcəsinin dövlət əsaslı vəsait qoyuluşu və ehtiyat fondlarından Siyəzən Rayon İcra Hakimiyyətinə ayrılan vəsaitlərin istifadə olunmasına aiddir.

Müəllif deyir ki, tədbirlər üzrə Kollegiya qərarlarının layihəsi müzakirə edilərək təsdiq olunub. Həmin qərarların icrasını təmin etmək məqsədilə aidiyyati dövlət qurumlarına təqdimatların göndərilməsi və audit tədbirlərinin nəticələri barədə məlumatların Milli Məclisə təqdim olunması qərara alınıb.

Məqalədə vurğulanır ki, Palata iclasından yenə detallı məlumat verilməyib, amma “audit tədbirlərinin nəticələrilə bağlı qəbul edilən qərarların Milli Məclisə təqdim olunmasının qərara alınması” onu göstərir ki, büdcə vəsaitlərinin xərclənməsində yenə ciddi maliyyə pozuntuları aşkarlanıb: “Adətən Palatadan nöqsanlar aşkarladığı hallarda “aidiyyati qurumlara” təqdimatlar göndərilir. Keçirilən nəzarət tədbirlərində maliyyə pozuntusuna rast gəlinməyən büdcə təşkilatının hələ indiyə qədər adı açıqlanmayıb. Çünki dövlət vəsaitlərini qanunauyğun xərcləyən bir qurum yoxdur”.   

Müəllif bunu da qeyd edir ki, artıq dördüncü iclasdır ki, Palata keçirdiyi auditlərin nəticələrini ictimaiyyətdən gizlədir, bu isə büdcə xərcləmələrinə nəzarət etməklə bərabər, nəticələri ictimailəşdirməli olan Palatanın fəaliyyətinin şəffaflığını şübhə altına alır.