Media-icmal 17.01.19

Ölkədə qazlaşdırmanın səviyyəsi, Azərbaycan turizminin problemləri, əsassız verilən əlillik dərəclərinin ləğvi və s. məsələlər bugünki (17 noyabr 2019-cu il) medianın aparıcı mövzularındandır...

95%-lik qazlaşdırma uğuru

"Azərbaycan" qəzeti "Dünyada çox az rast gəlinən uğur" sərlövhəli məqalədə ölkədə qazlaşdırma sahəsində əldə olunan uğurları dəyərləndirir.

Müəllifin sözlərinə görə, 2018-ci ildə ümumi uzunluğu 3 min 193 kilometrə yaxın qaz kəmərləri quraşdırılıb, 526,6 kilometr uzunluğunda qaz kəmərləri əsaslı təmir olunub və ölkədə qazlaşdırma 95 faiz hədəfinə çatıb: "Dünyada nadir ölkələr tapılar ki, bu dərəcədə qazlaşdırma aparılsın", deyə müəllif Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrinə dair yanvarın 11-də keçirilmiş iclasında dövlət başçısı İlham Əliyevin çıxışından sitat gətirir.

Yazıda deyilir ki, Azərbaycan regionlarının inkişafına dair 2014-2018-ci illər Dövlət Proqramına uyğun yeni qaz kəmərlərinin çəkilməsi ilə yanaşı, istismar müddəti başa çatmış sayğaclar təzəsi ilə əvəz olunub və istismara yararsız vəziyyətə düşmüş qaz avadanlıqları dəyişdirilib.

Müəllif 2018-ci ilin avqustunda İsmayıllı rayonunda dəniz səviyyəsindən 1500 metr yüksəklikdə olan Lahıc qəsəbəsinin qazlaşdırılmasını mühüm uğurlardan sayır.

Hazırda isə çətin relyefə malik ərazilərin qazlaşdırılmasını "Azəriqaz"ın qarşısında duran əsas hədəflərdən biri adlandırır.

Məqalədə deyilir ki, təkcə keçən il Ağstafa, Bərdə, Zərdab, Tovuz, Quba, Şamaxı, Göyçay, Gədəbəy, Goranboy, Oğuz, Lerik, Yardımlı və bir sıra digər rayonlarının 150 kənd və qəsəbəsi qazla təmin olunub

Müəllifin sözlərinə görə, Neftçala rayonunun Cəngan və Ərəbqardaşbəyli, Qax rayonunun Meşəbaş, Yevlax rayonunun Rüstəmli və Qaraməmmədli kəndlərinə ilk dəfə təbii qaz verilib, bundan əlavə, Ağdam, Ağcabədi və Sabirabad rayonlarında məcburi köçkünlərin məskunlaşdığı 4 qəsəbə də təbii qazla təmin edilib.

Müəllif xatırladır ki, Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyev qazlaşdırma prosesinin davam etdiriləcəyini bildirib.

Yazıda deyilir ki, dövlət başçısı vurğulayıb ki, bir sıra kəndlərdə hələ qaz yoxdur, ona görə də kəndlərin qazlaşdırılması hələ də gündəlikdə duran məsələdir.

Azərbaycan turizminin "çeşidli" problemləri

"Müsavat.com" da isə "Ölkə turizminə zərbə vuran fürsətçiləri necə durduraq; iqtisadçı: Qiymət özbaşınalığına son qoyulması üçün dövlət kompleks tədbirlər həyata keçirməlidir" sərlövhəli məqalə oxumaq olar.

Müəllif Azərbaycan turizminin problemlərini iqtisadçı-ekspert Vüsalə Əhmədova ilə müzakirə edir.

Yazı müəllifinin sözlərinə görə, Azərbaycanın xidmət və iaşə sektorundakı qiymət xaosu xarici və yerli turizmin inkişafına mənfi təsirini göstərməkdə davam edir: "Eyni menyunun turistlərə 2-3 dəfə artıq qiymətə satılması, bəzi istirahət mərkəzlərində yarım litr adi suyun 5 manata təklif olunması, kafe və restoranlarda 1 stəkan çay içmək istəyən müştəriyə 30 manatlıq dəstgahın sırınması turizmə həmin mənfi təsirlər sırasındadır".

Müəllifin iddiasına görə, bu münasibətin nəticəsi isə ondan ibarətdir ki, son 3 ildə yaşanan turist axını getdikcə zəifləyir, belə ki, yeni il ərəfəsində turizm məkanlarında turist az olduğu kimi, Novruz bayramına da öncədən rezervlərin sayında azalma var: "Bəzən hotellərdə bir gecəlik qonaqlama və qidalanmaya elə qiymət qoyulur ki, onunla Gürcüstanda 1 həftə və ya Türkiyədə 3 gün dincəlmək olar. Yaxud, yerli müştərilər restoran-kafelərdə dincəldikdə onlara yemək və çay fantastik qiymətə təklif edilir".

"Yeni Müsavat"a açıqlama verən iqtisadçı-ekspert Vüsalə Əhmədova da deyir ki, turizm, xidmət və ictimai iaşə sektorundakı qiymət özbaşınalığı Azərbaycanın ən ağrılı yeridir, vətəndaşların çoxu bu vəziyyətdən şikayətçidirlər.

Buna görə də turizm, aviadaşımalar və səyahətlər üzrə beynəlxalq rəqabət reytinqində Azərbaycan heç ilk 100-lüyə də daxil deyil, ölkəyə gələn turistlər dünyadakı turistlərin cəmi 0,003%-ni təşkil edir, bu səbəbdən də turizmdən götürülən gəlirlər qənaətbəxş deyil.

Ekspert xatırladır ki, Azərbaycan hökuməti qeyri-neft sektorunun prioritet sahələrindən biri kimi turizmi seçdiyi halda bu sektorun inkişafı üçün real addımlar atılmır.

V.Əhmədovaya görə, xarici ölkələrlə müqayisədə istirahətin baha başa gəlməsi, xidmətlərin aşağı səviyyəsi, turist cəlb etmək üçün işlərin görülməməsi Azərbaycan turizminin problemləri sırasındadır.

Bunu aradan qaldırmaq üçün isə, ekspertə görə, ilk növbədə mövcud qiymət və tariflər yerli və xarici turistlər üçün optimal həddə endirilməli, Türkiyə turizminin qiymət və xidmət metodları Azərbaycana tətbiq olunamlıdır.

Ekspert deyir ki, adi 40 qəpiklik suyun 2-5 manata satılması, uşaq əyləncə parklarındakı bahalıq, vətəndaşlara 20-50 manatlıq çay dəstgahları təklifi biznes təfəkküründən uzaq olmağın göstəricisidir.

V.Əhmədova bu fonda müqayisə edərək bildirir ki, halbuki 2 nəfərlik 31 çeşidli səhər yeməyi süfrəsinə Türkiyədə cəmi 25-36 TL (7-11 AZN) ödənilir.

Ekspert hesab edir ki, qiymət özbaşınalığına son qoyulması üçün dövlət kompleks tədbirlər həyata keçirməlidir.

Verilən 1055 əlillik dərəcəsi əsassız sayılıb

"Modern.az"da isə "1055 nəfərin əsassız əlillik təyinatı ləğv edilib" sərlövhəli məqalə diqqət cəlb edir.

Müəllif Əmək və Əhalinin Sosial Müdafiəsi Nazirliyinin rəsmisi Fazil Talıbovla vətəndaşlara əlillik dərəcələri verilməsinin uyğun olub-olmaması barədə söhbətləşir.

Müəllifin sözlərinə görə, nazirlik rəsmisi deyib ki, 2018-ci ilin may ayından etibarən Əmək və Əhalinin Sosial Müdafiəsi Nazirliyi Səhiyyə Nazirliyi ilə birgə aparılmış araşdırmalar nəticəsində bir sıra uyğunsuzluqlar aşkar edib.

"Bunun nəticəsi olaraq araşdırmalar zamanı 1055 nəfərə əsassız əlillik dərəcəsinin verildiyi aşkarlanıb və bu təyinatlar ləğv olunub", F.Talıbov belə bildirib.

F.Talıbovun sözlərinə görə, məsələ təkcə əlillik dərəcəsinin ləğv olunması ilə yekunlaşmayıb, habelə, həmin əlillik təyinatları ilə bağlı verilən pensiya, müavinət və təqaüd ödənişləri də dayandırılıb.

Nazirlik rəsmisi deyib ki, bundan əlavə, ödənilmiş vəsaitin bərpası üzrə tədbirlər də görülüb: "Əsassız təyinatların ləğv edilməsi ilə 3 milyon manat büdcə vəsaitinə qənaət olunub", deyə F.Talıbov bu təyinatların ləğvinin maddi nəticələri barədə bildirib.

F.Talıbov bunu da bildirib ki, bildirib ki, ümumən əlilliyin qiymətləndirilməsi prosesinə ciddi nəzarətin tətbiqi, bu sahədə şəffaflığın təmin olunması üçün görülən tədbirlər artır.

"Bu araşdırmalar nəticəsi etibarilə 2018-ci ilin I rübü ilə müqayisədə IV rübündə əlillik təyinatının 61%, o cümlədən, I qrup əlillik təyinatlarının 56% azalması ilə nəticələnib", deyə F.Talıbov ümumi nətiəclər barədə bildirib.