Media-icmal 19.08.19

Ölkə iqtisadiyyatına investisiya yatırımı, kirayə mənzil bazarında vəziyyət, məktəbli ləvazimatları yarmarkalarındakı qiymətlər və s. məsələlər bugünki (19 avqust 2019-cu il) medianın aparıcı mövzularındandır...

Əlverişli biznes məkanı

"Azərbaycan" qəzeti "İqtisadiyyata 263 milyard dollar investisiya yatırılmışdır" sərlövhəli məqalədə Azərbyacanın inkişaf edən ölkə və əlverişli biznes məkanı kimi tanınmasını dəyərləndirir.

Müəlifə görə, son illər ölkədə iqtisadiyyatın davamlı və rəqabətqabiliyyətli inkişafı sahəsində uzunmüddətli və sistemli fəaliyyət həyata keçirilib, davamlı iqtisadi islahatlar nəticəsində qeyri-neft sektorunun inkişafı təmin edilib, bu sahədə əhəmiyyətli irəliləyişlərə nail olunub.

Yazıda vurğulanır ki, dövlət özəl sektorun inkişafına, yerli və xarici iş adamlarının fəaliyyətinə hərtərəfli imkanların yaradılması, iqtisadi mühitin liberallaşdırılması yolu ilə əlverişli biznes və investisiya mühitinin formalaşdırılması istiqamətində bütün zəruri tədbirləri görür.

Müəllif sosial-iqtisadi sahə ilə bağlı keçirilən müşavirədə , iqtisadi göstəricilərin Azərbaycanın uğurla inkişaf etməsini təsdiqləməsi barədə Prezident İlham Əliyedən sitat gətirir: "Biznes mühitinin yaxşılaşdırılması istiqamətində aparılan işlər bunu göstərir ki, bu gün iqtisadi sahədə Azərbaycan dünya miqyasında uğurla inkişaf edən ölkələr sırasındadır".

Müəllif hesab edir ki, iqtisadi göstəricilər Azərbaycanda əlverişli biznes, investisiya mühitinin mövcud olmasının təsdiqidir, investorların hüquq və mənafelərinin qorunması, mülkiyyətin toxunulmazlığı, yerli və xarici sahibkarlara eyni iş şəraitinin yaradılması, əldə edilmiş mənfəətdən maneəsiz istifadə olunması ilə bağlı mühüm qanunlar qəbul edilib.

"Məhz bu tədbirlərin nəticəsidir ki, təkcə ötən il iqtisadiyyata 15,3 milyard dollar investisiya yatırılıb. Bu məbləğin 8,2 milyard dolları xarici investisiyadır. Bu ilin 6 ayında isə iqtisadiyyata 6 milyard dollardan çox investisiya yatırılıb. Ümumilikdə isə müstəqillik illərində ölkə iqtisadiyyatına yatırılan investisiyaların həcmi 263 milyard dollar olub ki, bunun da 50 faizdən çoxu xarici sərmayələrdir", deyə müəllif ölkəyə yatırılan sərmayə həcmi barədə bildirir.

Müəllifə görə, biznes və investisiya mühitinin davamlı surətdə yaxşılaşdırılması, biznesə yeni dəstək mexanizmlərinin tətbiqi və s. istiqamətlərdə mühüm tədbirlər reallaşır, sahibkarlığa dövlət dəstəyinin sfera və coğrafiyası genişləndirilir, sahibkarlıq fəaliyyəti üçün qanunvericilik sadələşdirilir, ödənişlər sistemi təkmilləşdirilir.

Yazının sonunda isə oxuyuruq: "Hazırda Azərbaycan hökuməti ölkədə iqtisadi islahatların davamlılığı, biznes mühitinin daha da yaxşılaşdırılması ilə bağlı bütün lazımi tədbirlərin görülməsini davam etdirir".

Ən ucuz ev- 350-400 manat

"Modern.az"da isə "Sentyabrda kirayə evlər bahalaşacaq" sərlövhəli məqalə oxumaq olar.

Müəllif ölkənin kirayə mənzil sahəsindəki vəziyyət barədə "MBA Konsaltiq və qiymətləndirmə" şirkətinin rəhbəri, daşınmaz əmlak sahəsi üzrə ekspert Nüsrət İbrahimovla söhbətləşir.

N.İbrahimov isə "modern.az"a deyir ki, avqust-sentyabr aylarında kirayə evlərə tələbat yüksək olduğundan qiymətlərdə də artım müşahidə olunur, amma sentyabr ayının ortalarında tələb azaldığından qiymətlər də aşağı düşəcək:

"Bazarda qiyməti iki faktor tənzimləyir. Birincisi, tələb və təklif, ikincisi isə ümumi iqtisadi durumdur. Ölkə inkişaf etdikdə, bazarda pul mübadiləsi çox olanda, insanların sabaha inamı olanda, cəmiyyət pozitiv əhval-ruhiyyədə olanda qiymətlər də artıma meyilli olur. Amma əks hallar yaşananda qiymətlər aşağı düşür. 2015-2016-cı illərdə biz bunu müşahidə etdik. Qiymətlərin günün tələbinə cavab vermədiyini deməzdim. 2000-ci ildən bu günə qədər mənzillərin satış qiymətləri 6,4 dəfə artıb. Buna uyğun olaraq, kirayə qiymətləri isə 2,6 dəfə yüksəlib. Bu, o deməkdir ki, insanların kreditə əlçatanlığı yaxşılaşdığından ev almağa bir qədər rahatlıqla əl qoyurlar. Kirayə pulunu isə öz ciblərindən verməli olurlar deyə, bahalı evləri kirayə götürməkdən çəkinirlər. Kirayə qiymətləri insanların cibindəki pulla bağlıdır. Yəni insanların qazancı, cibindəki pulu çoxalanda kirayə evlərin qiymətləri də artır, azalanda isə qiymətlər düşür", deyə konsaltinq rəhbəri kirayə bazarındakı vəziyyətə aydınlıq gətirir.

N.İbrahimova görə, şəraiti zəif, qiyməti yüksək olan evləri vətəndaşlar kirayə götürməkdən çəkinsələr, kirayə qiymətləri müəyyən qədər tənzimlənə bilər:

"Bir nəfər evini kirayə verirsə, müştərilərin rəyini öyrənəcək. Bir nəfər gəlib bəyənməyəcək, ikinci bəyənməyəcək, artıq belə getsə, kirayə verən qiyməti məcbur olub endirəcək".

Müəllif isə vurğulayır ki, hazırda Bakıda kirayə evlərin qiyməti kəskin şəkildə artıb, bahalaşma yeni dərs ili ilə əlaqədar tələbələrin paytaxta axını, turistlərin, xüsusilə ərəb turistlərin şəhərimizdə çox olması ilə əlaqələndirilir.

Hazırda Bakının mərkəzi hissələrində, metro stansiyalarına yaxın yerlərdə kirayə təklif edilən mənzillərin qiyməti daha yüksəkdir.

Müəllifin dediyinə görə, 1 və 2 otaqlı, orta təmirli, müvafiq məişət avadanlıqları olan bu mənzillərin ən ucuz aylıq kirayəsi 350-400 manatdan başlayır.

Məktəbli yarmarkalarında qiymətlər necədir?

"Yeni Müsavat" qəzetində isə "Məktəbli yarmarkaları açıldı: qiymətlər necədir? - reportaj, fotolar" sərlövhəli məqalə diqqət cəlb edir.

Müəllif bu gündən (yəni avqustun 18-dən) etibarən Bakıda bir neçə metro stansiyasının çıxışında məktəbli ləvazimatlarının satış yarmarkasının fəaliyyətə başladığını, qurulan çadırlarda, çantadan su qabına qədər hər şeyi almağın mümkün olduğunu bildirir.

Qiymətlərə gəlincə isə, müəllifin sözlərinə görə, satıcılar ləvazimatların qiymətinin mağazalarla müqayisədə aşağı olduğunu, əgər məktəbli üçün lazım olan bütün ləvazimatlar alınırsa, o zaman endirim etdiklərini də bildiriblər: "Müşahidə etdik ki, burada satılan məktəbli çantalarının qiyməti 12 manatdan başlayıb, 50 manata qədər dəyişir. Ən bahalı çantalar təkərli çantalardır. Məktəblərdə son zamanlar dərsliklərin sayı artdığı üçün çantalar da ağır olur. Ona görə də, satıcıların sözlərinə görə, valideynlər daha çox təkərli çanta almağa üstünlük verirlər", deyə məktəbli çantalarının qiymətləri barədə məlumat verir.

Müəllif deyir ki, tələbatın çox olması qiymətə də təsir edib, belə ki, çantalar 35-50 manata satılır, bütün ləvazimatlar eyni yerdən alınırsa, endirim edilir.

Yazıda vurğulanır ki, alıcılar endirim barədə satıcılar kimi düşünmür: "Söhbət etdiyimiz alıcılar isə bildirdilər ki, əgər satıcı bir malda endirim edirsə, digərini baha satır. Ona görə də əksər insanlar bütün ləvazimatları eyni yerdən almırlar", deyə müəllif bildirir.

Çantalarla yanaşı, müəllif digər ləvazimatların qiymətləri barədə də bilgi verir: "12 vərəqli dəftər 10 qəpik, 40 vərəqli dəftər isə 30-40 qəpiyə satılır. 60 vərəqli dəftərlər 40-50 qəpik, 100 vərəqli dəftər isə 60-80 qəpiyədir. Eyni zamanda yapışdırıcı 60 qəpik - 1 manat, su qabları 10-12 manat, qələm yonanlar 1.50-2 manat, qələmlər 10-50 qəpiyə, rəngli karandaşlar 3-12 manata, rəsm albomu 30 qəpiyə, sadə karandaşlar 20-40 qəpiyə satılır".

Müəllif vurğulayır ki, supermarketlərin məktəbli ləvazimatlarının satıldığı bölmələrində də çeşidlər artırılıb və oradakı qiymətlərlə yarmarkadakı qiymətlər arasında ciddi fərq görünmür.

Yazı müəllifi satıcılara istinadən yarmarkaların sentyabr ayının 22-nə qədər davam edəcəyini bildirir.