Media-icmal 23.02.19

Dövlət başçısı ilə Sumqayıtda görüşün təəssüratları, sığorta şirkətlərinin sərnişin avtobuslarını sığortalamağa maraq göstərməməsi, güclü manatın ixraca maneələr yaratması və s. məsələlər bugünkü (23 fevral, 2019-cu il) medianın aparıcı mövzularındandır...

Bir təsadüfi görüşün təəssüratları

"Azərbaycan" qəzeti "Xəzərin sahilində gözəlləşən şəhər" sərlövhəli məqalədə bu günlərdə Sumqayıt bulvarında şəhər sakinlərilə dövlət başçısı İlham Əliyevin təmasını dəyərləndirir.

Müəllif deyir ki, bu görüş dövlət başçısı ilə rastlaşan və görüşən insanlarda dərin iz buraxıb və həm də bu təmas vətəndaşlara səmimi münasibətin əyani görüntüsü idi.

Müəllif vurğulayır ki, bir tərəfdən şəhər ölkənin ümumi iqtisadi tərəqqisində rolunu artırır, digər tərəfdən isə yeniləşən simasını özündə əks etdirir.

Yazı müəllifi deyir ki, Sumqayıt sakinlərilə bu görüş dövlət başçısının fevralın 18-də SOCAR Polimerin yüksək sıxlıqlı Polietilen zavodunun açılışından sonra baş tutub.

Müəllif daha sonra həmin gün bulvarda dövlət başçısı ilə görüşən, əl tutan cavan, qoca şəxslərin münasibətini təqdim edir.

Müəllifə görə, həmin gün dövlət başçısı ilə görüşən 85 yaşlı Əvəz Mahmud Lələdağ deyir ki, həmin gün nəvəsilə bulvarda gəzdiyi zaman Prezident İlham Əliyevlə qarşılaşıb və heyrətlənib. "Biz ona yaxınlaşıb görüşdük, Prezident hər birimizlə əl tutdu. Mən bildirdim ki, 50 ildən artıq bir dönəmdə Sumqayıtda yaşayıram. Buraların dünənini yaxşı tanıyıram, qamışlıq, çirkab sularının üfunəti adamın başını çatladırdı. Bu ərazilərə heç kim gəlmək istəmirdi, amma indi gələn getmək istəmir. Bütün bunlar Prezident İlham Əliyevin sumqayıtlılara göstərdiyi qayğının nəticəsidir.

Müəllif deyir ki, görüş iştirakçılarından biri Sumqayıt Dövlət Universitetinin II kurs tələbəsi Rəmayə Mustafayeva olub və bildirir ki, bu təsadüfi görüş həyatında silinməz iz buraxıb: "Qızlarla danışıb bulvarda gəzirdik. Çevrilib baxanda gördük ki, Prezident gəlir. Onun bizimlə səmimi görüşüb söhbət etməsi mənim üçün çox xoş, unudulmaz oldu".

R.Mustafayeva deyir ki, dövlət başçısından xahişi tələbələrin yataqxana təminatının yaxşılaşdırılması olub. Prezident buna reaksiya verib, universitet yataqxanalarda məskunlaşan məcburi köçkünlər tezliklə şəxsi evlərə köçürüləcək, yataqxanalar isə tələbələrin ixtiyarına veriləcək.

Müəllifin sözlərinə görə, bu görüşün daha bir iştirakçısı Tərlan Hacızadə də bu səmimi ünsiyyətin təsirində olduğunu deyib.

Müəllifsə vurğulayır ki, şəhər 70 illik yubileyinə hazırlaşır, artıq Sumqayıt təkcə ölkənin yox, Avropanın sayılıb-seçilən şəhərlərindən birinə çevrilib, bu uğurların kökündə dövlət başçısı tərəfindən düzgün müəyyənləşdirilən davamlı iqtisadi siyasət durur.

Sığorta şirkətləri buna maraq göstərmir

"Bizimyol.info"da isə "Sığorta şirkətləri avtobusları sığortalamaqda maraqlı deyillər - ekspertdən şok açıqlama" sərlövhəli məqalə oxumaq olar.

Müəllif sərnişin avtobulsarının sığortalanmasındakı problemləri sığorta məsələləri üzrə ekspert İlkin İbrahimovla müzakirə edir.

Məqalə müəllifi xatırladır ki, fevralın 21-də Sumqayıt şəhərində 30 nömrəli xətt üzrə marşrut avtobusu əvvəlcə "Toyota Prado" markalı avtomobilə, daha sonra idarəetməni itirərək binaya çırpılıb, nəticədə 31 nəfər xəsarət alıb və bu hadisə ictimai nəqliyyatda sığorta məsələsini gündəmə gətirib.

Sığorta eksperti İlkin İbrahimov isə "bizimyol.info-ya bildirib ki, "İcbari sığortalar haqqında" qanunda şəhərdaxili ictimai nəqliyyat vasitələrinin sərnişinlərə dəyən zərərə görə kompensasiyanın ödənilməsi nəzərdə tutulmayıb: "Belə məqamlarda həm də sərnişinlərin fərdi qəza sığortası məsələsi gündəmə gətirilməlidir. Təəssüf olsun ki, şəhərdaxili ictimai nəqliyyat vasitələrinin sərnişinləri sığortanın ödəniş dairəsinə düşmür. Eləcə də, qanunda metro sərnişinlərinə dəyən zərərə görə sərnişinlərə kompensasiyanın ödənilməsi nəzərdə tutulmur. Sərnişinlərin icbari fərdi qəza sığortasının tətbiq dairəsinə şəhərdaxili nəqliyyat vasitələrinin də əlavə edilməsi lazımdır".

Ekspert deyir ki, Azərbaycanda sığorta şirkətləri də avtobusları sığortalamağa maraq göstərmirlər: "Bunun səbəbi qəzaların çox olmasıdır. Lakin bu, o demək deyil ki, sığorta şirkətləri həmin avtomobilləri sığortalamayacaq, məsələ qanunla tənzimlənir".

İ.İbrahimov onu da deyib ki, "İcbari sığortalar haqqında" qanuna əsasən, ölkə ərazisindəki bütün nəqliyyat vasitələri icbari sığorta müqaviləsini məcburi şəkildə bağlamalıdır: "Əgər bağlamırlarsa, həmin nəqliyyat vasitələrini Dövlət Yol Polisinin (DYP) yollardakı radarları müəyyən edir.

Ekspertin sözlərinə görə, sığorta müqaviləsi bağlanmayana kimi hər 20 gündən bir bu qərar tətbiq edilərək şirkətə bildiriş göndərilirir və sığorta müqaviləsinin bağlanmaması avtomobil sahibinə də çox böyük ziyan vura bilər.

"Avtomobilin içərisindəki vətəndaşların sağlamlığına dəymiş ziyanı və ya qarşı tərəfə vurulan ziyanı icbari sığorta 55000 manat dəyərində sığortalayır.

Əmlaka dəyən ziyan üzrə 5000, sağlamlığa dəyən ziyan üzrə isə 50 min manat sığorta təminatı verilir. Əgər bu növ sığorta olunmamışsa avtomobil sahibi məsuliyyət daşıyır".