Media-icmal 25.11.20

Azərbaycanda COVİD-19 pandemiyası ilə bağlı vəziyyət, Fransa Senatının qondarma “Dağlıq Qarabağ Respublikası”nı tanımaq istəməsi cəhdləri, Cənubi Qafqazda Türkiyə-Rusiya əməkdaşlığının perspektivi və s. məsələlər medianın aparıcı mövzuları sırasındadır...

“Azərbaycan” qəzeti  “Karantin rejiminin tələblərinə tam şəkildə əməl edilməlidir” sərlövhəli məqalədə Azərbaycanda COVİD-19 pandemiyası ilə bağlı vəziyyəti dəyərləndirir.

Müəllif deyir ki, dünyada koronavirusa yoluxanların və ölənlərin sayı durmadan artır, son statistikaya görə, dünya üzrə bu virusa 60 milyon nəfər yoluxub, 1 milyon 400 min 427 nəfər dünyasını dəyişib.

Məqalədə Azərbaycanda da bu sahədə vəziyyətin yaxşılığa doğru dəyişmədiyi, ümumi yoluxma hallarının 53,5 faizinin paytaxtın payına düşdüyü deyilir. Belə durumun yaranmasına səbəb vətəndaş məsuliyyətsizliyidir, odur ki, gündəlik artım 2 min, bəzən 3 min rəqəmlərilə ifadə edilir, həm də xüsusi karantin müddəti dekabrın 28-dək uzadılıb, eləcə də bəzi qadağalar tətbiq edilib, qapalı və açıq məkanlarda maska taxılması məcburi elan edilib.

Müəllifə görə, bu ciddi təhlükədən qorunmaq üçün hamı xüsusi karantin rejiminin qaydalarına riayət etməli, maska taxmalı, şəxsi gigiyenasını gözləməli və məsuliyyət hissini unutmamalıdır.

“Redaktor.az” saytı “Fransanın qondarma rejimi tanıması ona baha başa gələ bilər” sərlövhəli məqalədə Fransa Senatının “Dağlıq Qarabağ Respublikasını” tanımağı tövsiyə edən qətnaməni müzakirəyə çıxarmağa hazırlaşması şərh edilir. 

Müəllif deyir ki, qətnamə layihəsi 5 müxalifətçi qrup tərəfindən təqdim olunub və qətnamənin qəbul olunması ehtimalı böyükdür.

Layihədə Azərbaycanın suverenliyinə, ərazi bütövlüyünə yönəlmiş, beynəlxalq hüququ ayaq altına atan nüanslar olduğu deyilir, xüsusən də dövlətlərin daxili yurisdiksiyasında olan məsələlərə qarışmamaq prinsipi pozulur.

Deputat Bəhruz Məhərrəmov isə Fransanın bu mövqeyini BMT Təhlükəsizlik Şurasının 5 daimi üzvündən biri kimi BMT Nizamnaməsini kobud şəkildə pozması kimi dəyərləndirir: “Görünən odur ki, Fransa Senatının tutduğu mövqe BMT nizamnaməsinə açıq hörmətsizlikdir”, deyə deputat bildirir.

O əlavə edir ki, Senatın bu tip qətnamələrinin icrası məcburi deyil, yalnız hökumətə tövsiyə xarakterlidir, hətta qətnamə qəbul edilməsi belə hələ qondarma qurumun tanınması demək olmayacaq.

Deputatın fikrincə, Fransa dövlətinin xarici siyasətdə belə bir risk edəcəyi ağlabatan görünmür, çünki Fransanın Korsika problemi var, odur ki, qondarma rejimi tanıma cəhdi ona baha başa gələ bilər, özünə münasibətdə xoşagəlməz presedent yaradar.

Prezident İlham Əliyevin bir müddət öncə “Əl-Ərəbiyə” kanalına müsahibəsini yada salan deputat deyir ki, dövlət başçısı bu müsahibədə Fransaya  Marsel şəhərində ermənilərə respublika qurmaq imkanı yaratmağı tövsiyə edib, çünki Marseldə Dağlıq Qarabağdan daha çox erməni yaşayır.

“Mətbuat.az” saytında dərc eilən “Qarabağda sülhməramlıların əsas məqsədi sülhü təmin etməkdir” sərlövhəli məqalədə isə politoloq Şəbnəm Həsənova Cənubi Qafqazda Türkiyə-Rusiya əməkdaşlığının perspektivini dəyərləndirir.

Müəllif deyir ki, Azərbaycan və Rusiya prezidentlərinin, habelə Ermənistan baş nazirinin noyabrın 10-da imzaladığı bəyanata əsasən, 44 günlük İkinci Qarabağ Müharibəsi başa çatdı. Politoloq yada salır ki, bundan sonra Türkiyə prezidenti Rəcəb Tayyib Ərdoğan Qarabağdakı sülhməramlı missiyada Türkiyənin Rusiya ilə birlikdə iştirak edəcəyəni bəyan etdi.

Qarabağda Türkiyənin varlığını reallıq sayan politoloq vurğulayır ki, Rusiya xarici işlər naziri Sergey Lavrov da bu ölkənin bütövlükdə münaqişədə və bölgədə həlledici amil olduğunu bildirir. Ş.Həsənova yaxın gələcəkdə Türkiyə-Rusiya-Azərbaycan əməkdaşlığının daha da genişlənəcəyini qeyd edir.  

Qarabağ müharibəsinin başa çatmasının bölgə üçün siyasi və strateji perspektivlərinə toxunan politoloq deyir ki, bu, təkcə müharibənin başa çatması deyil, eyni zamanda bölgənin yeni konfiqurasiyasının formalaşması deməkdir.

Qarabağda Türkiyə ilə Rusiyanın sülyaratma missiyasına qoşulmasına toxunan politoloq hesab edir ki, bu, bəzi ölkələri narahat etməməli, onlar ultimativ ritorikadan əl çəkməli, Ermənistanı yeni reallıqlarla barışmağa çağırmalıdırlar.