Media-icmal 28.01.21

"Azpolitika.info" saytı "17 şəhid məzarı və Qaradağdakı məzarlıqda baş verənlər kimin "əsəri"dir?" sərlövhəli məqalədə  bəzi şəhidlərin münasib yerdə dəfn olunmadıqlarına görə baş verən narazılıqların səbəbləri araşdırılır.   

Belə ki, bəzi şəhid yaxınları iki gündür ki, 17 nəfər şəhidin II Şəhidlər Xiyabanında yox, Bakı Ümumşəhər qəbirstanlığında dəfn olunmalarına etiraz edirlər.

Müəllif isə deyir ki, vətən uğrunda canlarını qurban verən bu şəhidlərin özlərinə layiq  məzar yerilə təmin olunmaması bir daha göstərdi ki, təkcə xalqın deyil, elə hakimiyyətin də ən böyük düşməni məsuliyyətsiz, yalnız özünü və ətrafını düşünən məmurlardır: "Belə görünür ki, bunların beş-altısını tutub "içəri" salmaqla iş düzəlmir və idarəetmədəki sistem problemi qaldıqca bu cür ağrılı məsələlər öz həllini tapmayacaq".

Müəllifə görə, şəhid məzarları kimi həssas mövzu ətrafında baş verən belə hadisələr birliyə, dövlətçiliyə, qələbəyə kölgə sala bilər, belə ki, şəhid yaxınları ev, pul, torpaq istəmir, övladlarının məzarına, ruhuna hörmət, diqqət tələb edirlər.

Amma bəzi hökumət strukturları müqəddəs şəhid adına belə insan kimi, layiqincə münasibət bəsləməyi bacarmırlar: "Cəmi 17 şəhid ailəsini qəbul etmək, dinləmək, özünü onların yerinə qoymaq, hansısa formada onları razı salmaq bu qədərmi çətindir?!", deyə müəllif məmurlara sual ünvanlayır.

Bununa yanaşı, müəllif məsələyə başqa bir rakursdan baxaraq, hökumətdə bəzi qurumların bu məsələyə laqeyd münasibətinin müəmmalı olduğunu diqqətə çatdırır və buna kiminsə cavab verməli olduğunu bildirir, buna dərhal reaksiya verilməməsinin səbəbini gündmə gətirir.

Müəllifə görə, əgər şəhid məzarlarına və ailələrinə münasibət sadəcə biganəlik, saymazlıq, məmur özbaşınalığıdırsa, buna səbəb olanlar ən ciddi şəkildə cəzalandırılmalıdırlar. 

"Yenisabah.az" saytı isə "Bu, Azərbaycanın suverenliyinə qəsddir - Sülhməramlılar cinayətkarı himayə edir" sərlövhəli məqalədə Qarabağda Rusiya sülhməramlılarının fəaliyyətinə münasibət ifadə edilir. 

Müəllif diqqəti ona çəkir ki, Qarabağda erməni separatizminin başçısı

Arayik Harutyunyan bu günlərdə Ağdərədə 100-dən artıq sakinin iştirakı ilə görüşdə Azərbaycanın azad etdiyi rayonlardan olan ermənilərin Ağdərədə məskunlaşdırılmasına  başlanılacağından danışıb.

Eyni zamanda müəllif Rusiya sülhməramlılarının nəzarət etdikləri ərazidə belə halların niyə baş verə bilməsi sualını gündəmə gətirir.

Deputat Fəzail Ağamalı isə deyir ki, Harutyunyanın bu addımı cinayət məsuliyyəti yaradır, qanundan kənar və Azərbaycanın suverenliyinə qəsddir, bu addım həm də dövlətlərin ərazi bütövlüyü barədə beynəlxalq hüquq normalarının tapdanmasıdır.  

Deputat bunu həm də Rusiya sülhməramlılarının erməniləri hərtərəfli müdafiə etmələrinin nəticəsi kimi dəyərləndirib.

Deputat hesab edir ki, bu, 2020-ci il noyabrın 10-da Azərbaycan, Ermənistan və Rusiya arasında imzalanmış Bəyanatın "Azərbaycan ərazisində yerləşən silahlı qüvvələrin tamamilə tərksilah edilməsi və ona paralel olaraq sülhməramlı qüvvələrin yerləşdirilməsi" müddəasının pozulmasıdır.

"Yeniavaz.com" saytında isə "Rusiya buğdanın ixrac rüsumunu bahalandırır – Azərbaycana neçəyə gələcək? – analiz" sərlövhəli məqalədə bəhs edilən məsələnin səbəbləri aydınlaşdırılır.

Müəllif deyir ki, Rusiyanın baş naziri Mixail Mişutsin 2021-ci il martın 1-dən buğda ixracına tətbiq edilən rüsumun qaldırılması barədə fərman imzalayıb. Bu fərmana əsasən, martın 1-dən buğdanın hər tonu üçün ixrac rüsumu 25 avrodan (51,5 manat) 50 avroya (103 manat) qaldırılır.

Daha sonra müəllif bu fərmanın nəticələrinin Azərbaycana mümkün təsirlərini nəzərə çatdırır.

Müəllifin sözlərinə görə, 2020-ci ilin 11 ayında xarici ölkələrdən Azərbaycana 262,5 milyon dollar dəyərində 1 milyon 225,6 min ton buğda idxal olunub, ixrac olunan buğdanın təxminən 98%-i və ya 1,2 milyon tonu Rusiyanın payına düşüb. Rusiyadan ixrac olunan buğdanın 1 tonunun gömrük dəyəri 212 dollar (361 manat) olur.

Müəllif deyir ki, Azərbaycanda buğdaya olan illik tələbat 3 milyon tondan çoxdur, bu il Azərbaycanın xaricdən 1 milyon tondan çox buğda idxal etməsi lazımdır: "Əgər Rusiyadan buğda ixracı davam edərsə, bu buğdanın hər tonunda təxminən 50 manat bahalanma deməkdir".

Müəllif deyir ki, Qazaxıstandan idxal olunan buğda isə Rusiyadan idxal olunan buğdadan baha olub, belə ki, ötən il Qazaxıstandan idxal olunan buğdanın 1 tonunun gömrük dəyəri 230 dollar (390 manat) olub.

"Bizimyol.info.az" saytı isə "Yanacağın qiyməti artandan sonra qida və dərman məhsulları sürətlə bahalaşır" sərlövhəli məqalədə bəhs olunan bahalaşmanın səbəblərinə aydınlıq gətirir.

Müəllif deyir ki, Aİ-92 markalı avtomobil benzininin və dizel yanacağının qiyməti bahalaşandan ( 2021-ci il yanvarın 4-də Aİ-92 markalı benzinin bir litrinin qiyməti 1 manat, dizel yanacağının bir litri isə 80 qəpik müəyyən edilib) sonra məhsulların qiyməti sürətlə artmağa başlayıb.

Müəllif əlavə edir ki, İqtisadiyyat Nazirliyinin xəbərdarlığına baxmayaraq, qida və dərman məhsullarında qiymət artımı müşahidə olunur.

Müəllifə görə, İqtisadiyyat Nazirliyinin xəbərdarlığı yersizdir, çünki bəzi sahələr istisna olmaqla, bazarda qiyməti tələb-təklif prinsipi müəyyən edir.

Müəllif vurğulayır ki, hökumət süni qiymət artımına qarşı mübarizə aparmaq istəyirsə, dərmanlarda olduğu kimi yuxarı qiymət həddi müəyyən etməlidir.

Ekspertlərə görə isə, qiymət artımının əsas səbəblərindən biri ölkədə kartel sövdələşməsinin olmasıdır.

Ekspertlər deyir ki, Azərbaycanda qəribə tendensiya var, dünya bazarında məhsul bahalaşırsa bizdə də bahalaşır, dünya bazarında məhsul ucuzlaşır, de gəl, Azərbaycanda ucuzlaşmır.

Ekspertlər hesab edirlər ki, Azərbaycan liberal bazar şəraitinə keçə bilsə, qiymətlər aşağı düşəcək, amma yanacağın qiymətinin artması mallarda və xidmətlərdə qiymət artımına səbəb olur.