Media-icmal 28.11.17

Avropa İttifaqının "Şərq Tərəfdaşlığı" ölkələrinin sammtində Azərbaycanın iştirakının nəticələrinə iki fərqli baxış, torpaqların istifadəsiz qalması və yeni mənzil almaq üçün sakinləri gözləyən təhlükə bugünki (28 noyabr, 2017-ci il) medianın aparıcı mövzularındandır.

Diplomatik qələbə - Şərq Tərəfdaşlığı sammiti

"Azərbaycan" qəzeti "Diplomatik məharətin və siyasi qətiyyətin təntənəsi"

(http://www.azerbaijan-news.az/index.php?mod=3&id=134707) sərlövhəli məqalədə Azərbaycan nümayəndə heyətinin Avropa İttifaqının təşkilatçısı olduğu "Şərq Trəfdaşlığı" sammitində iştirakını dəyərləndirir.

Müəllif deyir ki, Avropa İttifaqı ilə tərəfdaşlıq Azərbaycanın xarici siyasətinin əsas prioritetlərindən biridir, odur ki, bu ilin fevralından Azərbaycan yeni sazişlə bağlı fəal danışıqlara başlayıb və yaxın zamanlarda danışıqların uğurla başa çatacağı gözlənilir.

Müəllif Azərbaycan-Avropa İttifaqı münasibətlərinin indiki vəziyyətini dövlət başçısı İlham Əliyevin sammitdəki çıxışından sitat gətirməklə dəyərləndirir: "Ticarətimizin, demək olar ki, 50 faizini üzv ölkələrlə olan ticarət təşkil edir. Müstəqillik dövründə Avropa İttifaqından Azərbaycan iqtisadiyyatına 20 milyard dollardan çox investisiya yatırılıb. Bu, bizim yaxşı investisiya mühitinə malik olduğumuzu nümayiş etdirir. Avropa şirkətləri bizim iqtisadiyyatımızı dəstəkləmək üçün çox maliyyə vəsaiti yatırmağa hazırdır".

Müəllif deyir ki, dövlət başçısı Azərbaycanın siyasi və iqtisadi islahatlar siyasətini davam etdirdiyini, demokratiyanın inkişafına, insan haqlarının qorunmasına böyük önəm verdiyini və buna ciddi şəkildə sadiq olduğunu diqqətə çatdırıb.

Müəllif vurğulayır ki, dövlət başçısı Azərbaycan iqtisadiyyatının uğurlu inkişafını ölkənin müstəqilliyi üçün güclü təməl adlandırıb, 2004-cü ildən bu yana ÜDM-in 3 dəfədən çox artdığını, işsizliyin 5%-ə endiyini, ölkənin yaxşı kredit reytinqlərinə malik olduğunu bildirib.

Müəllif deyir ki, İ.Əliyev Azərbaycanın iştirakçı olduğu beynəlxalq enerji layihələri, xüsusilə "Cənub qaz dəhlizi" barədə danışıb və bu layihənin həyata keçməsini Avropanın enerji xəritəsini dəyişdirəcək layihə adlandırıb.

Məqalədə deyilir ki, dövlət başçısı Azərbaycanın Avropa dəyərlərini paylaşan bir ölkə olduğunu bildirərək, Aİ ilə Azərbaycan arasında yeni imkanlar açacaq saziş imzalanacağını bildirib.

Müəllif sammitin nəticəsi olaraq dövlətlərin ərazi bütövlüyünü də qəbul edən Birgə Bəyannaməni Azərbaycan tərəfin uğuru və diplomatik qələbəsi sayır.

Müəllifə görə, bütün bunlar isə İlham Əliyevin xarici siyasət strategiyasının uğurlu davamının və müstəqil dövlətimizin dünya birliyindəki mövqelərinin getdikcə möhkəmləndiyini göstərir.

Demokratiyadan qaçmaq bəhanəsi

"Azadlıqinfo.az" saytında "Saziş cığallığı" sərlövhəli məqalə diqqət cəlb edir (https://www.azadliq.info/207451.html) .

Müəllif noyabrın 24-də Brüsseldə keçirilən "Şərq Tərəfdaşlığı" ölkələrinin sammitində Azərbaycanın Avropa İttifaqı ilə saziş imzalamamasını dəyərləndirir.

Müəllifə görə, bu sazişin imzalanmaması Azərbaycan hökumətinin yenə də demokratiyadan qaçması, ölkədə demokratik dəyişikilər ola bilməsindən qorxması deməkdir.

Yazı müəllifi hesab edir ki, bu addım hakimiyyətə baha başa gələcək, beynəlxalq təzyiqlər güclənəcək, çünki bu addım demokratiyadan imtina, avtoritarizmə sədaqət göstəricisidir.

Müəllif deyir ki, Azərbaycan hökuməti səfərdən qayıtdıqdan sonra Aİ ilə saziş imzalanmamasını əsaslandıran təbliğat kampaniyasına start verib və hökumət "politoloqlar"ı xalqı inandırmağa çalışır ki, sazişin imzalanmaması Qarabağ problemilə bağlıdır.

Amma müəllif hakimiyyətin bu yanaşmasını əsassız sayır: "Əvvəla, Avropa Parlamenti dəfələrlə Azərbaycanın ərazi bütövlüyünü tanıyan qətnamələr qəbul edib", ikincisi, bu "jest" Qarabağa görə edilibsə, Rusiyaya qarşı niyə belə jest edilmir? Bu "analitik"lərin müdrüklüyünə inansaq, gərək Ermənistanın "xəyanət"inə görə Rusiya Azərbaycana jest edib, 20 faiz ərazini geri qaytarsın".
Müəllif indi bu barədə danışanları "rejimə yarınmaq üçün istənilən rüsvayçılığa kosmetika çəkməyə hazır olanlar" adlandırır, ölkə həyatında baş verən önəmli hadisələrə münasibətdə bu şəxslərin daim hökuməti müdafiə mövqeyi seçdiklərini, bunun da uğursuz olduğunu bildirir.

Müəllifin fikrincə, hakimiyyət avrointeqrasiya siyasətindən yayınmaqla ölkəni fəlakətin içinə atır, düşmənin imicini yaxşılaşdırır və hökumət "ağıllı"ları bu səhvə haqq qazandırmaq üçün arqument axtarırlar.

Müəllif iddia edir ki, sazişin imzalanmaması səbəbi Qarabağ yox, demokratiya amilindən irəli gəlir: "Axı, Qarabağ faktoru demokratiyadan qaçışa, vətəndaşa zülm etməyə, saxtakarlığa haqq qazandırmır. Qarabağ qazisini şərləyib həbsə atanlar, intihar həddinə çatdıranlar, necə oldu ki, Brüsseldə Qarabağ sevgisinə yoluxdular?".

Yazı müəllifi deyir ki, Qarabağ məsələsindəki haqlı mövqeyi gücləndirmək, dünyanı fakt qarşısında qoymaq üçün Avropa İttifaqı ilə bu sazişi imzalamaq lazım idi, indiki rüsvayçı durumda müdafiə taktikası qurmaq biabırçılıqdır.

Müəllif deyir ki, bu imzalanmama ilə hökumət "Şərq tərəfdaşlığı" yox, "Şər tərəfdaşlığı"na önəm verib və öz maraqlarını qorumaq üçün "Qarabağ məsələsi"nin arxasında gizlənir.

Evsiz qalmaq təhlükəsi

"Bizim Yol" qəzeti "Evi plana düşüb sökülənləri gözləyən təhlükə" sərlövhəli ( http://www.bizimyol.info/az/news/34640.html) məqalədə ekspert Vüqar Bayaramovun düşüncələrinə yer verib.

Ekspert Bakıda köhnə binaların söküntüsü ilə bağlı yeni ev gözləyən sakinlər üçün mümkün təhlükələr barədə danışır.

"Bakıda köhnə tikililər, xüsusən də "xuruşovka"lar sökülür, yerində yenilərinin tikintisi başlayıb, məsul şirkətlər mənzil sahiblərinin adətən 2 illik kirayə haqlarını ödəyirlər. Həmin müddətdən sonra inşa ediləcək binada onlara yeni mənzillər təklif edən müqavilə əsasında söküntü işləri həyata keçirirlər". Bu sahədə durumu V.Bayramov qəzetə belə izah edir.

Ekspert deyir ki, ilk baxışdan şirkətlərin təklifi normal təsir bağışlayır, amma proses heç də belə sadə olmaya bilər.

V.Bayramova görə, risklər sığortalanmadığı üçün gələcəkdə şirkət öhdəliyini yerinə yetirə bilmədiyi halda vətəndaşın yeni mənzil ala bilməsi mexanizmləri bəlli deyil: "Məsələn, təssəvvür edək ki, şirkət sakinlərə kirayə üçün ödəniş etdi, köhnə binanı sökdü və yeni binanı inşa edən zaman o müflis oldu, tikintini başa çatdıra bilmədi, bu halda, sakinləri yeni mənzillər ilə hansı şirkət təmin edəcək?".

Ekspert deyir ki, sakinlərlə inşaat şirkətləri arasında bağlanan müqavilələrdə bu halların nəzərə alınmaması təhlükədir.

V.Bayramova görə, daha bir təhlükə şirkətlərin aktivləri az olduğundan tikintinin başa çatdırılması üçün tələb edilən xərci aktivləri sataraq ödəyə bilməməsidir.

Ekspert hesab edir ki, gələcəkdə belə hallar baş verən zaman sakinlərin mənzilsiz qalmaması üçün yeni mexanizmlərin hazırlanıb tətbiq edilməsinə ehtiyac var.

V.Bayramov əhalinin maraqları baxımından çıxış edərək tikinti şirkətləri üçün risklərin sığortalanmasını işə başlamaq üçün əsas tələblərdən biri hesab edir.

Ekspert deyir ki, tikinti şirkəti öz risklərini sığorta şirkətində sığortaladıqdan sonra ona inşaata aparmaq icazəsi verilməlidir və evini tərk edib, kirayədə qalan sakin əmin olmalıdır ki, bütün hallarda o, yeni mənzil ilə təmin ediləcək.