Media-icmal 29.01.21

“Bizimyol.info.az”  saytı  “Son 1 həftədə 5 intihar - “Bu, insanlara, cəmiyyətə qarşı bir üsyandır” sərlövhəli məqalədə son zaman sıxlaşan intihar halları müzakirə obyektidir.

Müəllif son bir həftədə 5 intihar hadisəsinin baş verdiyini, intihar səbəblərinin dövlət orqanları tərəfindən araşdırıldığını bildirir.

Psixoloq Fuad Əsədov intiharların nümayişkaranə xarakter almasına diqqəti yönəldir. “İnsanların gözü qarşısında bunu etmələri, onları incidən insanlara, cəmiyyətə qarşı bir üsyandır. Göstərməyə çalışırlar ki, baxın siz mənə nələr etdiniz” deyə bu intiharların mahiyyətini anladır.

Psixoloqa görə, intihar edən insanların böyük əksəriyyətində depressiya müşahidə olunur, problemlərinə maksimalist baxış onları intihara sürükləyir.

Onun fikrincə, istər keçmişə, istər gələcəyə baxışda, “daha mən nə üçün yaşayıram” düşüncəsi intihara gətirir.

F.Əsədov hesab edir ki, şəxs özü üçün çıxılmazlıq sindromu yaradır və belə olduqda bundan sonra fiziki həyata son qoymaq məqsədinə yol açır.  

“Azpolitika.info.az”   saytı isə “Nəcməddin Sadıkovla bağlı şübhələr təsdiqini tapdı” - deputatdan açıqlama” sərlövhəli məqalədə Azərbaycan Silahlı Qüvvələrinin Baş Qərargah rəisi Nəcməddin Sadıkovun vəsifəsindən azad olunmasını deputat Elman Məmmədov şərh edir.

Məsələnin mahiyyəti isə budur ki, İkinci Qarabağ Münaribəsi başladığı vaxtdan bu yana N.Sadıkov görünməz oldu, şəxsinə ağır ittihamlar səsləndirildi, hazırda isə mediada Moskvada ürək əməliyyatı keçirdiyi barədə məlumatlar yayılır.   

Həm də məsələnin bir tərəfi də budur ki, N.Sadıkovun adı, fotosu, əmək fəaliyyətilə bağlı məlumatlar Azərbaycan Müdafiə Nazirliyinin saytından yığışdırılıb.

“44 günlük Vətən Müharibəsi dövründə N.Sadıkov sanki yoxa çıxdı, haqqında heç bir məluat olmadı. Müharibədə iştirak edirmi, etmirmi bilinmədi” deyə deputat vurğulayır.

Deputata görə, N.Sadıkovun barəsində şübhələr, yazılanlar təsdiqini tapdı, tutduğu vəzifənin öhdəsindən gələ bilmədiyi üçün işindən azad edilib: “Digər məqamları müdafiə naziri, N.Sadıkovun iş yoldaşları bilərlər ki, bu adam nə ilə məşğul olub, niyə işdən azad edilib”, -EMəmmədov bildirir.

“Mətbuat.az” saytı isə “Novruz bayramından sonra dərslər ənənəvi qaydada bərpa edilə bilər – açıqlama” sərlövhəli məqalədə martın 1-dən ənənəvi tədris formatına keçidin mümkünlüyü müzakirə müstəvisinə gətirilir.

Təhsil sahəsi üzrə ekspert Elçin Əfəndi deyir ki, hazırda koronavirus infeksiyasına yoluxma sayında azalmalar var, bu isə Novruz bayramından sonar, aprel ayında təhsilin bütün formalarında əyani şəkildə bərpasının mümkün ola biləcəyinə ümid verir: “Hazırda ölkəmizdə vaksinasiya prosesi həyata keçirilir. Düşünürəm ki, dərslərin ənənəvi formada apreldə başlaması daha məqsədəuyğun ola bilər”, - ekspert öz mövqeyini ifadə edir. 

Ekspertə görə, ənənəvi təhsilin bütün pillələr üzrə bərpası daha yaxşı olar, əks halda itirən Azərbaycan təhsili, cəmiyyəti olacaq, çünki ölkədə distant təhsil səviyyəsi heç də ürəkaçan vəziyyətdə deyil.

Ekspert Elşən Qafarov isə deyir ki, yoluxma sayında yenidən ciddi artım olmazsa dərslər martın 1-nə qədər tamamilə ənənəvi şəkildə bərpa edilə bilər.

Təhsil Nazirliyi mətbuat xidmətinin rəhbəri Cəsarət Valehov fərqli düşünür və dərslərin mart-aprel aylarında başlaması ilə bağlı heç bir rəsmi məlumatın olmadığını bildirir: “Heç kim deyə bilməz ki, təhsil ocaqları nə vaxt açılır. Ənənəvi təhsilin başlama vaxtı pandemik vəziyyətdən, pandemiya şəraitindən asılıdır”.

“Müsavat.com” saytı isə Baydenin Qafqaz siyasəti necə olacaq –ekspertlərdən fərqli fikirlər” sərlövhəli məqalədə ekspertlər yeni ABŞ rəhbərliyinin Cənubi  Qafqaz siyasətini dəyərləndirirlər.

Müəllif deyir ki, azərbaycanlı ekspertlər hələlik Bayden hökuməti haqda ümidverici proqnozlar səsləndirməyiblər.

Azərbaycanlı politoloqlar iddia edirlər ki Ağ Evin yeni Administrasiyası ermənipərəst mövqeyi ilə fərqlənib.

Politoloqlar bütünlükdə ABŞ-ın siyasətinə ehtiyatla yanaşırlar, Amerikanın yeni prezidentinin dünyanın jandarması rolu oynamağa qayıtmaq istəyinin olduğunu vurğulayırlarr. Ekspertlər hesab edirlər ki, ABŞ-Çin müttəfiqliyi Azərbaycana xeyirlidir, amma, ABŞ Qafqazı yox, Orta Asiya kartını seçsə, Azərbaycan təzyiq altında qalacaq.

Politoloq Züriyə Qarayeva hesab edir ki, Cənubi Qafqaz Bayden administrasiyasının diqqət mərkəzindəki başlıca regionlardan biri olacaq.

Politoloqun düşüncəsinə görə, Baydenin atacağı ilk addım Minsk Qrupunun  yenidən gücləndirilməsi olacaq. Onun fikrincə hətta ABŞ-ın İkinci Qarabağ Müharibəsinin nəticələrini tanımayacağını səsləndirməsi də gözləniləndir.