Müşfiq Ələsgərli: Əmək müqaviləsində göstərilənlərlə jurnalistlərin real maaşları arasında fərqlər var

Bakı/22.01.18/Turan: Jurnalistlərin Həmkarlar İttifaqının (JuHİ) sədri Müşfiq Ələsgərli "Amerikanın Səsi"nə müsahibəsində 2017-ci ildə Azərbaycan jurnalistlərinin sosial durumlarının öyrənilməsi üzrə sorğunun nəticələrindən danışıb.

Onun sözlərinə görə, 2017-ci ildə ümumrespublika yayımlı telekanallarda, informasiya agentliklərində, gündəlik qəzetlərdə və populyar xəbər portallarında çalışan jurnalistlərin aylıq gəlirləri redaksiyaların durumuna görə dəyişsə də, minimal və maksimal məbləğləri müəyyənləşdirmək mümkün olub.

"Bu kateqoriya üzrə rəyi soruşulanların bir qismi 350-450 manat (sorğu iştirakçılarının 6 faizi), 550-600 manat (sorğu iştirakçılarının 56 faizi), 700-900 manat (sorğu iştirakçılarının 30 faizi), 1000-1100 manat (sorğu iştirakçılarının 8 faizi) civarında aylıq gəlir əldə etdiklərini bildirib. Ümumrespublika yayımlı həftəlik qəzetlərdə çalışan jurnalistlərin aylıq gəlirləri 250-400 manat aralığında dəyişir. Regional qəzetlərdə çalışan jurnalistlərin orta aylıq gəlirləri 160-400 manat aralığında dəyişir. Rəyi soruşulanlar 160-200 manat (sorğu iştirakçılarının 48 faizi), 200-250 manat (sorğu iştirakçılarının 37 faizi), 300-400 manat (sorğu iştirakçılarının 15 faizi) civarında əmək haqqı aldıqlarını bildiriblər. Regional televiziyalarda çalışan jurnalistlərin aylıq gəlirləri 250- 400 manat aralığında dəyişir", deyə o qeyd edib.
Sorğuya ictimai rəyə təsir imkanları və stabil dövriliyi ilə seçilən ümumrespublika yayımlı 15 qəzet və 4 televiziya redaksiyasının, 5 informasiya agentliyinin, 20 xəbər portalının, həmçinin 3 həftəlik qəzetin, 10 regional qəzet və TV-lərin əməkdaşları cəlb ediliblər (ümumilikdə 57 redaksiya əhatə olunub).
"Sorğuda hansı səbəbdən jurnalistlərin aylıq əmək haqqı yox, gəlirləri yazılıb? Jurnalistlərin aylıq əmək haqları ilə gəlirləri arasında fərqlər çoxdur?"- sualının cavabında Ələsgərli bildirib ki, jurnalistlər stabil aylıq əmək haqqı və yazılarına görə qonorarlar alırlar.

"Sorğuda gəlir deyəndə, stabil əmək haqları ilə qonorarların cəmi nəzərdə tutulur", deyə o qeyd edib.

JHİ sədri jurnalistlərin gəlirləri ilə vergi hesabatları arasında fərqlərlə bağlı sualın cavabında deyib ki, sorğuda əmək müqavilələrinin bağlanması və əmək münasibətlərinin rəsmiləşdirilməsi ilə bağlı bənd var.

"Hazırda sorğuda iştirak edənlərin 93 faizi əmək müqaviləsi bağladığını bildirib. Qüsur odur ki, əmək müqavilələrində heç də həmişə reallıqlar əks olunmayıb. Reallıqlar əks olunmayıb deyəndə, biz nəzərdə tuturuq ki, orada jurnalistin göstərilən əmək haqqı ilə aldığı maaş arasında fərq var. Jurnalistin reallıqda aldığı əmək haqqı daha yüksəkdir, onun rəsmiləşdirilməsində isə əmək haqqı aşağı göstərilir. Təbii ki, əgər əmək müqaviləsində əmək haqları real maaşlardan az göstərilirsə, vergi və sosial müdafiə fonduna ödənişləri də az göstərirlər", deyə o qeyd edib.

O, işəgötürənlərin əmək qanunvericiliyini bu cür pozduqlarını müəyyən etsə də, hələ məhkəmələrə müraciət etməyib.

"Bizim imkanlarımız hazırda o səviyyədədir ki, bu faktları ictimailəşdiririk".

JHİ sədrinin fikrincə, faktları ictimailəşdiməklə də yüksək nəticələrə nail olublar.

"Əgər 2002-2003-cü illərdə bu faktları ictimailəşdirəndə jurnalistlərin 83 faizi əmək müqavilələri olmadan fəaliyyət göstərirdisə, indi sorğuda iştirak edənlərin 93 faizi əmək müqaviləsi bağladığını bildirib", deyə o qeyd edib. -03B-