NİDA məhkəməsində 20-dən çox insan, o cümlədən jurnalistlər həbs edilib (YENİLƏNİB)

NİDA fəallarına oxunan hökmə qarşı etiraz aksiyası ilə əlaqədar müxtəlif məlumatlara görə 20-dən çox insan saxlanılıb.

Onlar arasında 5 Müsavat üzvü – Amid Süleymanov, Tural Abbaslı, Rüfət Hacıbəyli, Şamil Beydulla və Sarvan Əbdüləzimov var.

Sonuncu iki şəxs 22 saylı Nəsimi rayon polis idarəsinə aparılıblar, bu barədə Turan-a Müsavat Partiyasının sədr müavini Gülağa Aslanlı bildirib.

Jurnalistlər həmçinin “Yeni Müsavat” qəzetinin reportyoru Məhəmməd Türkmənin, “Azadlıq” qəzetinin reportyoru Xalid Qarayevin, AXCP fəalı Kəmalə Bənənyarlının və NİDA üzvü Rəhman Məmmədlinin və təxminən daha 10 nəfərin saxlanıldığını qeydə alıblar.

Qeyd edək ki, polis jurnalistlərə qarşı da xüsusi amansızlıq göstərib.

Belə ki, onlar Turan-ın fotoreportyoru Etimad Budaqovun köynəyini cırıblar.

Mülki geyimli şəxslər üzərində “Press” yazılan xüsusi jilet geyinməsinə baxmayaraq, Turan agentliyinin və “Amerikanın səsi” radiostansiyasının reportyoru Pərvanə Bayramovanı saxlamağa çalışıblar. Lakin həmkarları Bayramovanı polisin əlindən almağa müvəffəq olublar.

Polis foto və videoçəkilişlərə mane olub, foto və videokameraları qırıb, jurnalistlərin əlindən planşetləri alıb. Bu səbəbdən bir çox jurnalistlər müxtəlif dərəcəli xəsarətlər alıblar. -06D-

2014 May 06 (Çərşənbə axşamı) 14:22:06

NİDA fəallarına oxunan hökmü küçədə dayanan tərəfdarları böyük hiddətlə qarşılayıblar. Onlar “Azadlıq!” deyə çığırmağa başlayıblar.

Buna cavab olaraq polis toplaşanları, o cümlədən jurnalistləri güc tətbiq edərək dağıtmağa başlayıb. 

Aksiya iştirakçılarının saxlanmasına başlanılıb. Saxlananlar arasında jurnalistlər də var. Onların çoxu döyülüb, zərbələrdən və ya ayaq altında qalaraq xəsarət alıb. —1606D-