Krım Tatar Məclisinin sədri həbs oluna biləcəyi anonsu verib

Krım Tatar Milli Məclisinin (KTMM) spikeri Refat Çubarov barəsində cinayət işi açıldığını nəzərə çatdırıb.

R.Çubarov jurnalistlərə açıqlamasında daha bir nəfər barəsində cinayət işi açılması barədə infromasiyaya malik olduğunu söyləyib. Məclis sədri cinayət işi açıldıqdan sonra həbs oluna biləcəyi, amma həbslərin təkcə onun həbsilə yekunlaşmayacağı xəbərdarlığı edib.

R.Çubarov Krım tatarlarının lideri Mustafa Krımoğlunun Krıma gəlişinə qadağa qoyulmasına etiraz olaraq aksiyaya qatılanlar barədə də cinayət işi qaldırıldığını nəzərə çatdırıb.  

Rusiya qanunları ilə Ukrayna qanunları arasında ciddi fərqlər olduğunu deyən R.Çubarov mayın 3-də keçirilən etiraz aksiyasına qatılanların ciddi cəzalandırıla biləcəyini istisna etmədiyini vurğulayıb. Onun sözlərinə görə, Krım məhkəmələri aksiyaya qatılan iki şəxs barəsində 10 min rublla ölçülən cərimə qərarları çıxarıb.

Məclis sədri bu cərimə məbləğini adi vətəndaş üçün böyük həcmli cəza miqdarı kimi dəyərləndirib. “Başa düşdüyüm qədər, bu hökumət basqı yolu seçib”, - deyə parlament rəhbəri bildirib.  

Məclis sədri bu basqının son məqsədini bilmədiyini nəzərə çatdırıb. “Hədəf diapazonu geniş ola bilər, şantajdan tutmuş Krım tatarları ilə bağlı uzağa gedən planlara qədər hər şey ola bilər”, - deyə R.Çubarov basqının çoxtərəfli olduğunu söyləyib.

“Əgər bu adamların məqsədi etirazları “zərərsizləşdriməkdirsə”, o zaman bu insanlar Krım tatar milli hərəkatının mənasını anlamırlar. Hərəkatı lidersiz qoymaq, hərəkatın sonu olacağı anlamına gəlməz. Digər tərəfdən, Krım tatar milli hərəkatı hər cür zorakılığı istisna edən bir hərəkatdır və bunu anlamaq lazımdır. Krım tatarları ilə sadəcə açıq və dürüst danışmaq lazımdır”, deyə R.Çubarov Krım tatarlarına basqıların mənasız olduğunu nəzərə çatdırıb.

Rusiyanın işğalından sonra Krım Tatar Məclisinin üzvü, Krım tatarlarının lideri Mustafa Cəmil Krımoğlunu vətəni Krıma buraxmayıblar və bu Krım tatarlarının etiraz aksiyasına səbəb olub. Bundan sonra Kremlin Krımda qurduğu “oyuncaq” hökumət üzvləri Krım tatarlarına qarşı təzyiqlərə əl atıblar. -05D-