Niyə tələbələr mitinq edirlər və ya Boloniya sisteminin pozulması

Azərbaycanda Boloniya sisteminin tətbiqi onun ruhuna ziddir və faktiki olaraq ali məktəblərdə rüşvətxorluğu leqallaşdırır.

Bu barədə “Təhsil mərkəzi -21-ci əsr” QHT-nin Etibar Əliyev Turan-a müsahibəsində BDU tələbələrinin təkrar imtahana görə ödənişə qarşı etiraz aksiyasını şərh edərkən bildirib.  

İndiyə qədər Azərbaycanın ali məktəblərində kredit sistemi seçim yolu ilə tətbiq edilib.

Lakin 2013-cü il dekabrın 24-də Nazirlər Kabineti 348 saylı qərarı ilə “Ali təhsil müəssisələrində bakalavriat və magistratura səviyyəsində kredit sistemi üzrə təhsilin təşkili qaydaları”nı təsdiqləyib.

Yeni sistemə görə, hər semestrdə tələbə təxminən 7-8 fənn üzrə 30 kredit toplamalıdır. Bu, ildə 60, 4 ildə 240 kredit edir.

Ancaq bu kreditləri qazanmaq üçün tələbə seminar, kollokvium və imtahanlarda iştirak edərək bal toplamalıdır. Əgər minimum sayda bal toplasa kredit almayacaq.

Tələbə kursa qalmır, növbəti kursa keçir, lakin kreditlər üzrə borcu qalır və onların ödənilməsi üçün yay tətili zamanı dərsə gəlməlidir və yenidən imtahan verməlidir. Üstəlik yay təhsilinə görə ödəniş etməlidir.

Ödənişin məbləği belə müəyyən edilir: tədris ilinin dəyəri 60-a bölünür və ödənilməmiş kreditlərin sayına vurulur. Bu zaman böyük məbləğ alınır. Lakin Azərbaycanda təhsilin orta dəyəri 2000 manat təşkil edir. Əgər tələbənin məsələn 10 krediti varsa, o 300-400 manat ödəməlidir. Pulsuz əsaslarla daxil olan tələbələr də eyni qaydada ödəniş edirlər.

Əgər tələbə yay kurslarından sonra lazımi miqdarda bal toplaya bilməsə növbəti yay təkrar kurs keçməlidir və buna görə yenidən ödəniş etməlidir.

E.Əliyevin sözlərinəgörə, Boloniya sisteminin tətbiq edildiyi ölkələrdə əlavə təhsilə belə məcburiyyət yoxdur.

“Bizdə müəllimlərin də əməkhaqlarını tələbələrin üzərinə qoyurlar. Lakin müəllimlərə də az maaş verilir. Halbuki, universitet yaxşı pul qazanır. Bu, faktiki olaraq ali məktəblərdə rüşvətin “leqallaşmasıdır”, - o bildirib.

E.Əliyevin sözlərinə görə, qiymətləri endirmək üçün müəllimlərə gizli göstərişlər verilir. Əgər qrupda hamı imtahana buraxılırsa, bu, universitet rəhbərliyinin  narazılığına səbəb olur və müəllimə təzyiq göstərilə bilər.

E.Əliyev hesab edir ki, vəziyyətdən çıxış yolu təhsilin keyfiyyət və metodlarının artırılmasındadır, tələbələr üçün sərt  tədbirlərin həyata keçirilməsində deyil.—06B-