Sabah Residence insanların yaşadığı evi dağıdır

Martın 15-da İqtisad Məhkəməsində Bakının Bayıl qəsəbəsində yerləşən üçmərtəbəli yaşayış binasının yeddi sakininin iddiasına baxılacaq. Sakinlər Sabah Residence tikinti şirkətini onların daşınmaz əmlakını qanunsuz olaraq dağıtmaqda ittiham edirlər. Xanlar küçəsi, 10 ünvanında yerləşən ev bu şirkətin səyləri nəticəsində tədricən tikinti zibilliyinə çevrilir.

Ev hasara alınıb, elə bil burada yaşayış yoxdur. Bəzi mənzillər tamamilə dağıdılıb, bəziləri hələ də davam gətirir. Ancaq qonşu mənzillərdə kommunikasiya xətləri inşaatçılar tərəfindən qəsdən korlanıbsa bu mənzillərdə necə yaşamaq olar?

Məhkəmə iddiası qaldıranlardan biri, Dmitri Luqanski Turan-a bildirib ki, fevralın 2-də inşaatçılar onun əmlakını dağılmış mənzildən çıxarıblar və gizlədiblər. Bildiriblər ki, şirkətin şərtlərini qəbul etməklə bağlı yazılı öhdəliyin müqabilində qaytarmağa razıdırlar. Həm də etiraf edəcək ki, əmlakdan heç bir şey oğurlanmayıb, korlanmayıb.

"Bu, şantajdır. Onlar bizi məcbur edirlər ki, şirkətin şərtləri ilə razılaşaq. Şirkət sahibləri sakinlərə öz təsis sənədlərini, təqdim etmirlər. Şirkətin nümayəndələri guya "pilot layihə" üzrə yeni binanın tikintisinə dair Səbayel Rayon İcra Hakimiyyəti ilə müqaviləni və evin planını göstərirlər. Bunun isə nə möhürü var, nə imzası. Dövlət müvəqqəti mənzillərin kirayəsi üçün ayrılan pullar qurtaranda şirkətin bizi evsiz qoymayacağına, küçədə buraxmayacağına zəmanət vermir", - D.Luqanski bildirib.

"Evin qəzalı vəziyyətdə olduğu elan edilib. Buna görə də "pilot layihə"nin tələblərinə uyğundur. Deməli, ev mənzil sahiblərinin iradəsindən asılı olmayaraq söküləcək",- Sabah Residence şirkətindən bildirilib.

Vətəndaş Svetlana Seyidəliyevanın şikayətinə cavab olaraq rayon İH təsərrüfat şöbəsinin rəisi Vüqar Məmmədov 2017-ci ilin dekabrında rəsmi olaraq bildirib ki, Xanlar küçəsi, 10 ünvanında yerləşən ev FHN tərəfindən yoxlanılıb və "qəzalı" olması müəyyən edilib. Ancaq sakinlər binanın qəzalı olmasını müəyyən edən normativlərə baxıblar və məlum olub ki, FHN öz normalarını pozaraq hərəkət edib və evin qəzalı olması barədə nəticə əsassızdır", - D.Luqanski qeyd edib.

Ötən il sakinləri Gala Group MTK incidib. Naməlum səbəblərdən İcra Hakimiyyəti Gala Group-un əvəzinə Sabah Residence-i tutub. Sakinlər bu şirkətin tarixçəsini, "sahiblərin dəyişməsinin" səbəblərini bilmək istəyirlər. Çünki onların mənzillərini dağıdan və yeni bina tikməyən dələduzlarla, yalançı inşaatçılarla üz-üzə qala biləcəklərindən qorxurlar.

Lakin tikinti şirkəti haqqında bilgi yoxdur. Sayt olsa da bu, daha çox reklam xarakteri daşıyır, informasiya yox.

Fevral ayında sakinlərlə görüşən rayon İcra Hakimiyyətinin başçısı Eldar Əzizov onlara tövsiyə edib ki, şirkətlə müqavilə imzalayarkən diqqətli olsunlar, çünki bu sənədi imzalamaqla Sabah Residencе ilə təkbətək qalacaqlar. Yəni, əgər şirkət aldadarsa, rayon hakimiyyəti onlara kömək etməyəcək. İcra Hakimiyyətinin məhz bu firma ilə müqavilə bağlamasının səbəbləri barədə D.Luqanskinin sualının cavabında E.Əzizov deyib ki, bu firma tenderdə qalib gəlib. Ancaq tenderin keçirilməsi ilə bağlı sənədli sübutlar sakinlərə təqdim olunmayıb. Şirkətin saytında da tender haqqında məlumat yoxdur.

D.Luqanski və digər sakinlər mənzillərin dağıdılması və oradan çıxarılan plastik çərçivələrin satışı ilə məşğul olan şirkəti məhkəməyə veriblər. Sakinlər köhnə mənzilin əvəzində geniş sahəsi olan yeni mənzillərin veriləcəyi, yeni bina tikilənə qədər müvəqqəti kirayə üçün 300-350 manatın veriləcəyi barədə şirkətin təkliflərinə inanmırlar. Həmçinin köhnə mənzilin hər kvadrat metrinə görə 1500 manat hesabı ilə pul təklifinə də razılaşmırlar. Daha pul da təklif etmirlər. Görünür, qərara alıblar ki, evsiz qalan sakinlər yeni mənzilin tikintisini gözləməyə razı olacaqlar. Mənzil isə neçə ilə tikiləcək, məlum deyil.

Sakinlər Yasamal rayonunda birinci məhkəməni qazanıblar. Məhkəmə evin dağıdılmasının dayandırılmasını qərara alıb.

Ancaq Sabah Residence apellyasiya verib və sonrakı iki məhkəmə MTK-nın tərəfini tutub. Yerli polis və prokurorluq da inşaatçıları müdafiə edir. Mənzillərin və oradakı əmlakın dağıdılması faktı üzrə cinayət işi qaldırılmayıb, baxmayaraq ki, daşınmaz əmlak özəl mülkiyyətdir və sahibləri ondan imtina etməyiblər.

2018-ci il martın 2-də həmin evin sakinləri Rüfət İsmayılov, Rüfət Səlimov və Kamal Ələkbəroğlu rayon prokuroru N.Əsgərova yazılı şəkildə müraciət edərək Sabah Residence-in şübhəli müqaviləni imzalamaq istəməyən sakinlərə təzyiq metodları haqda məlumat veriblər. "Fəhlələr mənzillərin qapılarını sındırır, evin damını uçurur, su, qaz, işığın verilməsi, kanalizasiya xidmətləri dayandırılıb. Həyətdə şübhəli şəxslər dolaşaraq onları qonsuları D.Luqanski kimi evsiz qalacaqları ilə hədələyirlər", sakinlər bildiriblər.

Ancaq prokurorluq R.İsmayılov və digərlərinin şikayətini şirkətə havadarlıq edən rayon İcra Hakimiyyətinə göndərib. Digər məktubda (02.03.18-ci il tarixli) prokurorluq D.Luqanskiyə təklif edib ki, məhkəməyə müraciət etsin.

"Elə bil dövlətdə yox, qanunsuzluq və zorakılıq cəmiyyətində yaşayırıq. Əgər hakimiyyət məhəl qoymursa, inşaatçıların tələbləri ilə razılaşmağı təklif edirsə, hüquq-mühafizə orqanları sadə adamları deyil, şirkəti müdafiə edirsə, biz hara müraciət edək? Başqa dövlətlərin səfirliklərindən yardım istəyəkmi?", -D.Luqanski Turan-a deyib.

Tikinti şirkətinin saytında http://www.sabahresidence.az dəbdəbəli çoxmərtəbəli binanın görünüşü təsvir edilib. Xanlar küçəsi, 10 ünvanında sökülən evin yerində inşası planlaşdırılır. Qonşu evlər də söküləcək. Çünki şirkət bütün məhəllənin görünüşünü dəyişmək niyyətindədir.

Turan İnformasiya Agentliyinin telefon zənginə cavab olaraq şirkətin əməkdaşı bildirib ki, telefon nömrəsi şirkətin hüquqşünasına veriləcək və o, agentlik ilə əlaqə saxlayacaq. Ancaq Sabah Residence-dən zəng edən olmadı və biz də "insanların yaşadığı evi hansı haqla sökürsünüz" sualını verə bilmədik.