Vətəndaş cəmiyyəti təmsilçiləri bu sahədəki durumu müzakirə ediblər

Vətəndaş cəmiyyəti institutlarının bir qrup təmsilçisi bu sahədəki duruma dair Helsinki Milli Komitəsinin ofisində dinləmələr keçirib.

Dinləmələrin keçirilməsinə səbəb dekabrın 17-də parlamentin QHT-lər haqqında qanuna dəyişikliklər etməsidir. Bu dəyişikliklər QHT-lərin qeydiyyatına tələbləri sərtləşdirir, onların üzərinə lazım olandan artıq öhdəlik və məsuliyyət qoyur, fəaliyyətdəki səhvlərə görə yüksək cərimələr nəzərdə tutur. Daha bir cəhət budur ki, bu dəyişikliklər layihəsi vətəndaş cəmiyyəti institutlarının təmsiliçilərilə müzakirə olunmadan hazırlanıb.  

Dinləmələrdə QHT-lərə qarşı rəsmi Bakının belə mövqeyinin anlaşılmaz olduğu deyilib. Hətta bu mövqe hökumətin “vətəndaş cəmiyyətləri institutlarından qorxması” kimi də dəyərləndirilib. 

Bu problemə diqqət çəkmək üçün Forum və ya digər bir formatda tədbirin keçirilməsi təklif edilib. Tədbirin keçirilmə vaxtının növbəti toplantıların birində müəyyən olunması qərara alınıb. Qeyd edilib ki, rəsmi Bakı vətəndaş cəmiyyəti institutlarının “cəmiyyətdəki sabitləşdirici” rolunu nəzərə almalıdır. Cəmiyyətdə kataklizmlər olarsa bunu aradan qaldıra bilmək üçün güclü vətəndaş cəmiyyəti olmalıdır. Belə institutlar olmadığı halda cəmiyyət “ərəb baharı” kimi “sosial partlayış” və xaosla üz-üzə qalır. 

Vətəndaş cəmiyyəti institutlarının təmsilçiləri dövlət başçısı imzaladığı halda bu dəyişikliklərin hüququ qüvvə kəsb edəcəyini bildiriblər. Odur ki, tədbirin keçirilməsini sürətləndirmək qeyd olunub. 

III sektordakı durumun hüquqi, siyasi, sosial, ictimai baxımdan təhlil olunması təklifi səslənib. Bu sahədə durumun acınacaqlı olduğu, ağır fəsadlara yol aça biləcəyilə bağlı rəsmi qurumlara müraciət olunması vurğulanıb. Bununla yanaşı bu sahədəki vəziyyəti müsbətə doğru dəyişə bilmək üçün beynəlxalq təşkilatlara da müraciət olunmasının lazımlığı diqqətə çatdırılıb.-05C-