XXI əsrin əmək hüquqsuzluğu

Bakı/09.01.19/Turan: Paytaxtın Tbilisi prospektində işləyən 150-yə yaxın fəhlə bu gün yolu bağlamağa cəhd edib. Onlar maaşlarının verilməsini tələb ediblər.

Fəhlələr "Cesi" şirkətinin yanvarın 7-də "Grant-Həyat"la müqavilənin ləğv edildiyini deyərək onların işdən azad edildiyini bildirib. "Bizə dekabr və yanvar ayları üçün maaşları, başqa təzminatları vermirlər. Yanvarın 7-də axşama qədər işləmişik, günün sonunda deyiblər ki, sabahdan gəlməyin. Səbəb göstərirlər ki, iki şirkətin müqaviləsi bitdiyi üçün bizi azad ediblər", - fəhlələr bildiriblər.

Onların sözlərinə görə, işə başlayarkən əmək müqaviləsi tələb edəndə işə götürmürlər, ona görə məcburi şəkildə müqaviləsiz işləyiblər.

Fəhlələr bunu da deyiblər ki, haqlarını tələb edəndə qarşı tərəf "gedin kimə istəyirsiniz, şikayət edin" cavabını verib.

Fəhlələr deyirlər ki, şirkət 180 manat maaşa qol çəkdirib, günü 30 manata işlədib, amma ayda 600 manat verib vergidən yayınırlar.

"6-7 ildir burada işləyirik, hələ bir dəfə vergi məmuru gəlib əmək müqaviləsi barədə sual verməyib. Şirkətin ofisi Nizami küçəsində yerləşir, rəhbəri Atif adlı Pakistan vətəndaşıdır, amma bizi təhqir edib qovdular".

Fəhlələr Əmək Müfəttişliyinə də şikayət etdiklərini bildiriblər.

Dövlət Əmək Müfəttişliyindən isə bildiriblər ki, bu məsələ barədə fəhlələrdən yanvarın 8-i axşam Müfəttişliyə şikayət ərizəsi daxil olub, hazırda araşdırma gedir.

DƏM-dən bildiriblər ki, özəl müəssisələrə yoxlama moratoriumu qoyulduğu üçün yoxlama apara bilmirlər, digər tərəfdən isə vətəndaşın hüquqları pozulduğu üçün buna biganə qalmaq olmaz.

Müfəttişlikdən bunu da bildiriblər ki, əgər 10 nəfərdən çox şəxsin əmək müqaviləsi olmadan işləməsi faktı müəyyən olunsa artıq bu iş prokurorluğa göndəriləcək-05B-