Yeni tədris ilində Bakı məktəblərində 440 mindən çox şagird təhsil alacaq

Bakı/06.09.18/Turan: 2018/2019-cu tədris ilində Bakı Şəhər Təhsil İdarəsinin (BŞTİ) tabeliyində olan ümumi təhsil müəssisələrində 442 147 şagird təhsil alacaq. Bu barədə BŞTİ-nin sentyabrın 6-da yaydığı açıqlamada deyilir.

BŞTİ-nin tabeliyindəki ümumi təhsil məktəblərinin I sinfində 47 000-dən çox, IX sinfində 30 139, X sinfində 21 102, XI sinfində 20 379, XII sinfində 690 şagird təhsil alacaq.

Bakıdakı 263 ümumi təhsil müəssisəsində 940 məktəbə hazırlıq qrupunun fəaliyyət göstərməsi nəzərdə tutulub və artıq 17 500-dən çox ərizənin onlayn qeydiyyatı aparılıb. 2018-2019-cu tədris ilində 5 yaşlıların 75%-i məktəbə hazırlığa cəlb ediləcək.

Elektron sistem (mektebeqebul.edu.az) vasitəsilə paytaxt məktəblərinin I sinfinə qəbul üçün 46 420 sorğu yerləşdirilib, 43 827-i ümumi təhsil məktəblərini, 2 593-ü isə lisey və gimnaziyaları seçib.

Bu göstərici paytaxtdakı dövlət ümumi təhsil müəssisələrinin I sinfinə şagird qəbulu proqnozunun təxminən 98 faizinə yaxındır.

Xatırladaq ki, Bakı Şəhər Təhsil İdarəsinin tabeliyində 307 ümumi təhsil məktəbi, 3 xüsusi tipli ümumi orta məktəb və 7 əyani-qiyabi axşam məktəbi olmaqla 317 məktəb fəaliyyət göstərir.--0--