Müsavat Avropadan göstəriş alır? – İsa Qəmbər Çətin sualda

Hökumətyönlü mediada Avropa İttifaqının Bakı nümayəndəliyinin rəsmisi Piter Mixalkoya və bir sıra diplomatik korpuslara qarşı ittihamlar səsləndirilib.

Avropa İttifaqının rəsmisi müxalifətə göstəriş və tapşırıq verməkdə ittiham olunur.

Bildirilir ki, Piter Mixalko avqustun 12-də Musavat Partiyasının başqanı İsa Qəmbər, partiyanın Məclis sədri Arif Hacılı və AXCP sədri Əli Kərimli ilə görüşüb, onları ölkədə siyasi vəziyyəti gərginləşdirməyə çağırıb.

Yazıda qeyd olunur ki, Mixalko müxalifətin hazırkı fəaliyyətsizliyini qınayıb, həmçinin yaranmış durumla bağlı Avropa İttifaqının Xarici İşlər və Təhlükəsizlik Siyasəti Məsələləri üzrə ali nümayəndəsi Cozef Borrellin ciddi narazılığını müxalifət təmsilçilərinə çatdırıb. Yazıdakı iddialara görə, guya hətta Mixalko maliyyələşmənin davam etdirilməsi üçün müxalifətə tələblərini də səsləndirib. Görüşdə Fransa və Niderlandın səfirlərinin xüsusi fəallıq göstərərək müxalifətin canlandırılması üçün tədbirlərinin gücləndirməyi tələb etdikləri də iddia olunub.

Avropa İttifaqının Azərbaycandakı Nümayəndəliyi yazılanları təkzib edib:

“Həmin görüşlərin formatı və məzmunu ilə bağlı bu iddialar tamamilə yalandır və reallığa uyğun gəlmir”.

Müsavat Partiyasının Məclis sədri Arif Hacılı yazını yayımlayan media barəsində məhkəmə iddiası qaldıracaqlarını bildirib.

Mövzu ilə bağlı Müsavat Partiyasının başqanı İsa Qəmbər Kamran Mahmudovun təqdimatında yayımlanan “Çətin sual” verilişində danışır.