Qarabağ separatçıları Azərbaycanı hərbi qarşıdurmaya çəkmək istəyir? – Elxan Şahinoğlu Çətin sualda

Bakı/24.05.23/Turan: Ermənistanın baş naziri Nikol Paşinyanın Dağlıq Qarabağı Azərbaycanın tərkib hissəsi kimi tanıyan bəyanatından sonra Erməni Milli Federasiyası – Daşnaksutyun partiyası ali şurasının nümayəndəsi İşxan Saqatelyan mayın 23-də deyib ki, onun partiyası hökumətin hakimiyyətdən kənarlaşdırılması məqsədilə “yeni mübarizəyə” başlayır. Saqatelyan Azərbaycanla imzalanacaq istənilən sənədin etibarsız olacağını göstərmək üçün Ermənistanda və Qarabağda kütləvi aksiyalara çağırıb.

Xankəndidə Qarabağ separatçılarının qondarma parlamentinin fövqəladə iclası açılıb. Qəbul edilən bəyanatda deyilir ki,   Paşinyanın bəyanatı Qarabağda böyük hiddət və qəzəb doğurub.

“Paşinyan Ermənistanın Müstəqillik Bəyannaməsini və Qarabağın Azərbaycanın tərkib hissəsi kimi tanındığı hər hansı sənədin qəbulunu qadağan edən Konstitusiyasını kobud şəkildə pozur”.

Qarabağ separatçılarının lideri Arayik Arutyunyan da Ermənistanın baş naziri Nikol Paşinyanı öz çıxışlarına görə qınayan digər separatçıların səsinə qoşuldu. Arayik Arutyunyan müraciətində bildirib ki, Qarabağ heç vaxt Azərbaycanın bir hissəsi olmayıb və olmayacaq.

“Mən Ermənistan hakimiyyətinə müraciət edirəm ki, Artsaxın Azərbaycanın bir hissəsi kimi tanınması ilə bağlı hər hansı hərəkət və bəyanatlardan çəkinsin, daxili və beynəlxalq sənədlərlə götürdüyü öhdəliklərə əməl etsin”.

Arutyunyan həmçinin Rusiya prezidenti Vladimir Putinə Ermənistan, Azərbaycan və Rusiya başçılarının 9 noyabr 2020-ci il tarixli üçtərəfli bəyanatında götürülmüş öhdəliklərin yerinə yetirilməsini təmin etmək çağırışı ilə müraciət edib.

Bu arada Ermənistanın Baş naziri Nikol Paşinyan Yerevanda keçirilən mətbuat konfransında bildirib ki, Azərbaycanın 86.600 kv. kilometrlik ərazi bütövlüyünə anklavlar da daxildir. Ermənistanın 29.800 kv. kilometrlik ərazisinə Artsvaşen (Başkənd), Azərbaycanın 86.600 kv. kilometrlik ərazisinə isə üç anklav da daxildir, deyə Paşinyan qeyd edib.

Bu məsələnin həllinin bir neçə variantı var: onlardan biri anklavları ərazisində yerləşdikləri tərəfin nəzarəti altında buraxmaqdır. Yəni kvadrat kilometrlər dəqiqləşdirilməklə, ərazilərin ekvivalentliyi prinsipinə əsasən.

"Tutaq ki, Artsvaşenin, digər anklavların ərazisi ölçülsün və müvafiq olaraq hər şey bərabərlik prinsipi əsasında olacaq şəkildə hərəkət edilsin", deyə o bildirib.

Digər variant sülh müqaviləsi bağlandıqdan sonra Artsvaşenin Ermənistanın suverenliyi altına, digər üç anklavın isə Azərbaycanın suverenliyi altına qaytarılmasıdır. Paşinyanın sözlərinə görə, bu məsələ ilə bağlı Azərbayanla müzakirələr davam edir.

Siyasi şərhçi Elxan Şahinoğlu Kamran Mahmudovun təqdimatında yayımlanan “Çətin sual” verilişində bu barədə danışır.