Vaşinqtondan sülh gələ bilərmi? – Ərəstun Oruclu Çətin sualda

Bakı/03.05.23/Turan: Ermənistan parlamentinin hakim "Vətəndaş müqaviləsi" partiyasından olan deputatı Arman Yeqosyan təsdiq edib ki, Ermənistan və Azərbaycanın imzalamağı planlaşdırdığı sənəd "Münasibətlərin normallaşması haqqında saziş" adlanır.

Onun sözlərinə görə, bu, tərəflərin bütün bu müddət ərzində təfərrüatları barədə təklif mübadiləsi apardıqları sənəddir.

"Ermənistan Stepanakert və Bakı nümayəndələri arasında dialoqun baş tutması üçün əlindən gələni edir və edəcək". Bu barədə Yeqonyan Ermənistan və Azərbaycan XİN başçılarının ABŞ-da keçirilən görüşünü jurnalistlərə şərh edərkən bildirib.

Yeqonyanın sözlərinə görə, Ermənistan tərəfi Qarabağın danışıqlarda subyekt olaraq çıxış etməsinə nail olmağa çalışır.

Azadlıq radiosunun erməni xidməti məlumat yayıb ki, Azərbaycan və Ermənistan xarici işlər nazirlərinin Vaşinqtonda davam edən danışıqlarında əsas mövzulardan biri Qarabağdakı erməni əhalinin hüquq və təhlükəsizliyinin təmin edilməsidir. Danışıqlarda “öz müqəddəratını təyin etmə” kimi məsələlər yer almır, sadəcə ermənilərin Azərbaycan qanunları altında “hüquq və təhlükəsizliyinin qorunması” müzakirə olunur. Azatutyun belə yazıb.

Vaşinqtonda “Sülh üçün yol xəritəsi”, “Çərçivə sülh sazişi” və ya “"Münasibətlərin normallaşması haqqında saziş" imzalanarsa, Rusiyanın buna münasibəti necə olacaq? Bu sazişin imzalanmasını və ya perspektivini pozmaq üçün regionda başqa hansı ölkələr təxribat edə bilərlər? İranın “SEPAH” təşkilatının Qarabağdakı separatçılara qahmar çıxdığı barədə mediada məlumatlar yayılıb. Təsadüfdürmü?

Gündəmdə olan bu və digər məsələlər barədə siyasi şərhçi Ərəstun Oruclu Kamran Mahmudovun təqdimatında yayımlanan “Çətin sual” verilişində danışır.