Sadə tənlik: Allah İranın inhisarında deyil

Həbsdə olan Müsəlman Birliyi hərəkatının lideri Taleh Bağırzadə iyunun 3-dən 23-ə qədər aclıq aksiyası keçirdi. Buna səbəb inanclı şəxslərin polis idarələrində işgəncəyə məruz qalması və bu zaman Allahın da təhqir olunmasına etiraz idi. O, bu hərəkətlərə yol verən şəxslərin cəzalandırılmasını tələb edirdi.   Müsəlman Birliyi Hərəkatının 5 üzvü mayın 20-də Bakı Ağır Cinayətlər Məhkəməsində hərəkatın başqa bir fəalı Razi Abbasova Bakı Ağır Cinayətlər Məhkəməsində hökm oxunduğu gün məhkəmənin qarşısında saxlanılıb. Onlardan üçünə polisə müqavimət ittihamıyla 1 aylıq inzibati həbs cəzası verilib, digər iki nəfər isə həmin gün gecə saatlarında buraxılıb. Onlar gün ərzində işgəncələrə məruz qaldıqlarını, şalvarlarının çıxarılaraq, zorlanmaqla hədələndiklərini bildiriblər. İnzibati həbs müddəti bitən dindarlardan biri Elgiz Məmmədov həbsdə təcavüzə uğradığını iddia edib.

Həbsxanada aclıq aksiyası elan etmiş “Müsəlman Birliyi” hərəkatının rəhbəri Taleh Bağırzadənin və aksiyaya qoşulan bir neçə hərəkat tərəfdarının məsələsi ötən həftə sosial medianın əsas mövzularından idi. Belə düşünənlər var ki, Taleh Bağırzadə və tərəfdarları aclıq aksiyası keçirməklə Azərbaycanda dini gərginliyin yaranmasında maraqlıdırlar. Onlar Taleh Bağırzadəni və "Müsəlman Birliyi" hərəkatını İranın maraqlarına xidmət etməkdə və aclıq aksiyasının tapşırığının Tehrandan gəldiyini iddia edirdilər.

Vəziyyəti siyasi şərhçi Zərdüşt Əlizadə ASTNA-üçün şərh edib.

* * *

Sual: Zərdüşt bəy, Həbsxanada bir neçə dindarın aclıq aksiyası keçirməsi, sosial şəbəkələrdə bu yöndə müzakirələr, İranın burada rolu iddialarını necə qiymətləndirirsiniz?

Cavab: Əgər kimsə deyirsə ki, Allahı təhqir edəndə İranın heysiyyatına toxunurlar, onda onlar sadə həqiqətdən çıxış edirlər ki, Allah yalnız İrana məxsusdur. Sanki dünyadakı başqa müsəlmanların Allaha dəxli yoxdur. Allah İranın inhisarında deyil. Allah hər bir müsəlmanın ürəyində, dinində, imanındadır. Hansısa dövlət məmuru Allahı söyür və həmin dövlətin başında özünü müsəlman elan etmiş, dəfələrlə Məkkəni ziyarət etmiş, Hacı olmuş, ailəsi ilə birlikdə Kəbənin dövrəsinə dolaşmış bir insan dayanır. Eyni zamanda həmin dövlət İslam Konfransı təşkilatının üzvüdür.  Belə olduğu halda həmin başçı necə rəva qılır ki, onun məmurları Allahı söysün, təhqir etsin, buna etiraz edən adamları döysünlər, həbsxanada saxlasınlar, işgəncə versinlər? Bunu necə adlandırmaq olar? Bunu  riyakarlığın ali zirvəsi adlandırmaq olar. Bu cür münasibət riyakarlığın “Everest”idir. Demək bu adam müsəlman deyil. Və ya Azərbaycandakı vəziyyətdən heç xəbəri yoxdur, səmada yaşayır. Xəbəri varsa, demək ki, islam dinindən hakimiyyəti naminə istifadə edir. O ki qaldı sosial şəbəkələrdə və mediada “İranın bu məsələdə təsiri var” yazan şəxslərə və jurnalistlərə, onların siyasi bilikləri və mədəniyyəti aşağıdır. Iran müsəlman ölkəsidir, lap yaxşı. Amma Mərakeş də, İndonesiya da, Malayziya da müsəlman ölkəsidir. Azərbaycan müsəlman ölkəsi deyil? Allahı səmimi qorumaq digər müsəlman ölkələrinin də məsuliyyəti deyilmi? Bu sadə tənliyi anlamayan insanlar və jurnalistlər yazırlar ki, burda İranın maraqları var. Demək İran Allahı qorumasa, Allahı söymək olar?

Sual: Sosial şəbəkələrdə bir çox intelektli insanlar da bu fikirdədirlər ki, etiraz edənlər İranın maraqlarına xidmət edirlər….

Cavab: İntelekti olan insanlar belə yazmaz. Demək ki, hamısı savadsız insanlardırlar. Dediyim kimi sadə tənliyi anlamayan adam intelektli insan ola bilərmi? Allah İranın inhisarında deyil. Kimsə Allahı söyənlərə etiraz edərək, onların cəzalanmasını istəyən şəxslərə İranın əlaltılarıdır deyirsə, demək o adamların başına hava gəlib. Bunu yazan adamların bəsit adamlardırlar və hakimiyyətə yaltaqlanmaq istəyirlər.

Sual: İranın Azərbaycana münasibəti birmənalı deyil. Belə fikir var ki, İran da adətən dindarlar vasitəsi ilə Azərbaycana təsir etmək istəyir. Azərbaycanın da İrana münasibəti birmənalı deyil…

Cavab: Mən dəfələrlə İranda olmuşam. Mənim İranda xeyli qohumum var. İranlılar Azərbaycan hökumətini sevmirlər. amma Azərbaycanı və xalqını çox sevirlər. Onlar heç öz hökumətlərini də sevmirlər. Orada da hakimiyyəti tənqid edib, həbsxanalara gedənlər var. Ümumiləşdirmək lazım deyil. İran bütöv deyil. İranda 20 milyondan çox azərbaycanlı var. Biz Qarabağda qələbə çalanda onlar Arazboyu sərhəddə yığılıb, sevincdən qışqırırdılar, ağlayırdılar.

Sual: Mənim sualım o idi ki, niyə İran agenti deyən kimi, birinci növbədə dindarlar yada düşür? Dindarları bu formada şübhə altına salmaq onlara qarşı haqsızlıq deyilmi?

Cavab: Sadə bir şey deyim. Makiavellinin çox sərrast bir ifadəsi vardı: Hakimiyyət uğrunda mübarizə, əşyalara sahiblik uğrunda mübarizə deməkdir. Lenin deyirdi ki, müxtəlif mədəni, siyasi, dini və ictimai hadisələrin arxasında yalnız səfehlər iqtisadi maraqları görmür. Bu hakimiyyət və iqtisadi maraq məsələsidir. Hakimiyyət şərait yaradır ki, vəzifəlilər, hakimiyyətdə olanlar pul qazansınlar. Bir var demokratik ölkələrdə bu pul qanun çərçivəsində qazanılır, biri də var Azərbaycan kimi qanunun işləmədiyi ölkələrdə. Belə ölkələrdə onlar xalqı gecə-gündüz amansızcasına qarət etməklə məşğuldurlar. Buna etiraz edənlərin hərəsinə bir damğa yapışdırırlar. Birinə rusiyapərəst deyirlər, digərinə qərbpərəst deyirlər, o birisinə deyirlər iranpərəstdir və.s. Amma demirlər ki, həmin etiraz edənlər Konstitusiyaya uyğun olaraq haqlarını tələb edirlər. Narazıları susdurmaq üçün böyük bir dövlət mexanizmi qurulub. Satqın məhkəmə, zalım polis, DTX, satqın jurnalistlər, saxta parlament və.s. Bütün dövlət mexanizmləri bunların hakimiyyətdə qalmasına xidmət edir. Buna görə də etiraz edənlərə xarici dövlət cəsusu damğasını vururlar. Baxın, hazırda Rusiyada da xarici agent məsələsi dəbdədir. Xeyli jurnalisti, ictimai xadimi qanunla xarici agent elan ediblər. Azərbaycanda da həmin şey baş verir. Sadəcə hələlik qanuniləşdirməyiblər. Dindarlar məsələsinə gəldikdə, onlar hansısa mücərrəd məsələyə etiraz edirlər? Yox, onlar da öz haqlarını tələb edirlər. Eyni zamanda Allaha ibadət edirlər. Dində ədalət ən güclü məfhumdur. Bütün dinlərdə ədalət dinin mayasındadır. Indi bunları susdurmaq üçün terrorçu, radikal islamçı, iran cəsusu adlandırırlar və həbs edirlər. Etiraz edəndə döyürlər, Allahı da söyürlər. Bütün bunlar iqtisadi mənafe naminə mübarizənin təzahürləridir.

Sual: Niyə ABŞ-la, Qərblə münasibətlər yaxınlaşan ərəfələrdə adətən ölkədə bu hadisələr baş verir. Ola bilərmi kimlərsə, məhz belə dönəmlərdə İran, dini dövlət məsələsini məqsədli şəkildə ortaya atsın. Kimdir onlar?

Cavab: Yəni prezident göstərməyə çalışır ki, Qərb yönümlü siyasətin başında o dayanıb, İranın təsirinə qarşı mübarizə aparır. Qərb də onun burdakı xırda-para işlərinə göz yummalıdır. Vəssalam. Xırda-para işlər də neft-qaz pullarının cibləri ötürülməsidir.

Sual: Son olaraq Azərbaycanda dini dövlət qurula bilərmi?

Cavab: Xeyr. Azərbaycanda mömin müsəlmanların sayı çox azdır. Dindarlar mütləq azlıqdadır. Mömin müsəlmanların sayı bir neçə on mindir. Amma Azərbaycanda 10 milyon insan yaşayır. Azərbaycanda əqidə, inam çox aşağıdır.