�Tərsdən çaxmaq�

Necmettin Erbakandan sonra Türkiyə siyasətinin ən rəngli siması,şübhəsiz ki,Bülent Arınçdır.Mühafizəkar cinahı 20 il parlamentdə təmsil edən Arınç 2015-ci ildə millət vəkili olmaqdan imtina etsə də AKP tərəfdarları arasında öz reytinqini həmişə ən yüksəkdə tuta bilən yeganə siyasətçi olaraq qalmağa davam edir.

AKP-nin reytinqinin aşağı düşməsinin açıq şəkildə ortaya çıxmasından sonra Tayyip Erdoğan bunun qabağını almaq üçün bəzi həmlələr etdi.O həmlələrdən biri də cəmiyyətdə nüfuzu olan və keçmişdə yüksək vəzifə tutmuş bəzi siyasətçiləri öz yanına gətirmək oldu.

Prezident sarayında yaradılan Yüksək Məsləhət Şurasının üzvləri AKP dönəmindəki parlament spikerləri oldu: Bülent Arınç,Köksal Toptan,Mehmet Ali Şahin,Cemil Çiçek və İsmail Kahraman cənab Erdoğana məsləhət vermək üçün aylıq 3.5 min dollar maaşla saraya dəvət edilsələr də bu isimlərdən təkcə Mehmet Ali Şahin prezident Erdoğanı müdafiə üçün sinəsini sipər etdi, o birilər ağızlarına su alıb oturdular.

Susmamaqda istisnanı Bülent Arınç təşkil etsə də onun açıqlamaları Erdoğanın izlədiyi siyasətlə əksər vaxt uyğun gəlmir (Arınç elə ona görə Arınçdır)Bunun ən son örnəklərini Bülent Arınçın AKP iqtidarını və məhkəmələri hüququn qaydalarına riayətə çağırarkən gördük.6.5 il əvvəl yazdığı tweetlərə görə,ağır cəza məhkəməsi ana müxalifətdəki Cümhuriyyət Xalq Partiyası İstanbul vilayət təşkilatının sədri Canan Kaftancıoğluna 7 maddədən 9.5 il həbs cəzası verdi.

Bu cəza onsuz da iki yerə bölünərək kəskin şəkildə qütbləşmiş toplumda ciddi mübahisələrə səbəb olarkən,prezidentə bağlı Yüksək Məsləhət Şurasının üzvü (bütün vəzifələrindən əvvəl AKP-nin qurucusu) Bülent Arınçın da bəlkə gözlənilən bəlkə də gözlənilməyən reaksiyasının özü ilə gətirib-gəldi: "Verilən hökmün yaxşı və ya pis olduğunu deyə bilmərəm.Kaftancıoğlunu sevməyə bilərsiniz.Seçkidə qalib gəldi deyə(İstanbulun bələdiyyə seçkisini nəzərdə tutur-M.Ə.) qəhrəman vəziyyətinə gətirdilər.Yazdığı mesajların heç birini qəbul etmirəm.Ancaq söz və ifadə azadlığına hörmət etməliyik,buna dözməliyik"

Arınç bununla kifayətlənməyib kürd təmayüllü siyasətin duayenlərindən olan Ahmet Türkün "terrorçu" olmadığını,ola bilməyəcəyini dilə gətirincə, saray bu dəfə öz yüksək vəzifəli məsləhətçisinin sözlərinə dözə bilmədi:"Arınçın sözləri özünə aiddir,prezident idarəsiylə əlaqəsi yoxdur"- mətbuat katibi İbrahim Kalın bu sözləri deyib səhnədən çəkiləndən sonra qiyamət Bülent Arınç ilə AKP parlamet fraksiyası sədrinin müavini Bülent Turan arasında qopdu və hələ də davam edir.Və bu qovğalar,söz dalaşları iqtidar partiyasının səlahiyyətli orqanlarının öz keçmiş sədrini,keçmiş baş nazirini partiyadan ixrac etməsinin gündəmə gəldiyi,Ahmet Davutoğlu və qrupunun ixracı gözləmədən partiyadan istefa verdiyi günlərdə yaşanır.Elə isə ortaya bu suallar çıxır:

• AKP-nin 4 əsas qurucusundan biri,məclisin keçmiş spikeri,baş nazirin keçmiş müavini,prezidentə bağlı Yüksək Məsləhət Şurasının sədri Bülent Arınç Canan Kaftancıoğlunun və Ahmet Türkün hüquqlarını və ümumən, hüququ müdafiə edib Erdoğan iqtidarına və məhkəmələrə "hüquq"u xatırlamağa məhz indi vaxt tapdımı?Axı çox yox,bundan 10 il əvvəl Arınçın özü hüquqa birinci dərəcədə sayğısızlığıyla tanınan və bunun Türk siyasət müntəxabatına saysız örnəklərini bəxş edən bir siyasətçi idi. İndi "hüquq"u xatırlamasının və xatırlatmasının səbəbi nədir?
• Prezident Erdoğan əyyami-qədimdən mübarizə yoldaşı olan Bülent Arınçı yaşı 70-i keçəndən sonra yenidən yanına almaqla səhv edə bilərmi?
• Bülent Arınç AKP-dən ixrac edilən, könüllü ayrılan və ayrılmağa hazırlaşan siyasi qrupların və qruplaşmaların "Troya atı" ola bilərmi?
• Yoxsa "Cumhuriyet"in usta şərhçisi Orhan Bursalının da işarə etdiyi kimi,Bülent Arınç "AKP-yə hüququ xatırlatmaqla böyük ölçüdə tərk etdiyi normal zəminə dönməsi üçün" qurucusu olduğu partiyaya xəbərdarlıq edərək xaosun qarşısını almağa çalışır?

Əslində bu sualların cavabları üçün bu tezlikdə baş sındırmaq lazım deyil.Çünki burada, hər şeydən əvvəl,prezidentin ən yaxınındakı adamlardan biri olan Arınçın iqtidara "hüquq"u xatırlatmasını müsbət qiymətləndirmək lazımdır.

İkinci tərəfdən isə-Arınçın bu xatırlatmasından sonra iqtidar uzun müddətdən bəri tədavülə daxil etməyi vəd etdiyi "Məhkəmə islahatı paketi"ni, nəhayət, elan edərsə və oradan ümidverici şeylər çıxarsa, Arınçın xanəsinə buradan da yazılacaq müsbət şeylər olacaqdır.Ona görə "Arıncın hüququ xatırlatması" qəziyyəsini öz axarında qoyub Siyavuş Novruzovun "altına milyard yığandan sonra qaçıb gizlənənlərə xəbərdarlığı"na nəzər salmaq Arınçın sözlərini tamamlayıcı ünsür kimi çox böyük qiymət ərz edəcəkdir,Novruzovun sözlərinə toxunmadan keçməm bu yazı da yarımçıq qalacaq : "Hərəsi milyardı yığıb altına, qaçıb gizləniblər...Sən bütün nəsli-nəcabətini təmin eləmisən.Çıx ortaya...Ya mövqeyini bildir ya da ki başqa məsələlərə əl atılacaq.Çıxmasan, biz çıxaracağıq.Onda vəziyyətin daha ağır olacaq..."

"Bir millət iki dövlət"in iki siyasətçisinin salvolarının taktikası eynidir: Türkiyədə buna "tərsdən çaxmaq"- deyirlər,Bülent bəy də Novruzov da bu taktikadan ustalıqla istifadə ediblər.Ancaq "tərsdən nəyə çaxdıqları" önəmlidir.

Arınç hüquq tələb edib,Novruzov "alta milyardlar yığandan sonra qaçıb gizlənənlərin ortaya çıxmasını..."

Təbii ki,itirilmiş dəyərlərə görə, tələblər də fərqli olacaqdır.

Bütün hallarda "tərsdən çaxan" hər iki siyasətçini təbrik etməliyik.

İftixar etdim...