18 min əmək miqrantı uçota alınıb

1 aprel üçün 17 min 893 xarici əmək miqrantı Dövlət Sosial Müdafiə Fonduna icbari sosial sığorta haqqı ödəyir. Bu, ilin əvvəlindəkindən 4,6% və ya 792 nəfər çoxdur.

Ümumilikdə 102 ölkənin vətəndaşlarını əhatə edən əcnəbilər arasında ən yüksək say göstəricisi Тürkiyə vətəndaşları (10283 nəfər) üzrə müşahidə olunur. Fərdi uçot sistemində qeydiyyata alınan əcnəbilərin sayına görə ikinci yerdə gələn Gürcüstan vətəndaşlarının sayı 1950 nəfərə, üçüncü yerdə gələn Rusiya Federasiyasının vətəndaşlarının sayı isə 947 nəfərə çatıb.  Sonrakı yerlərdə İran İslam Respublikası (577), Hindistan (436), Çin Xalq Respublikası (421), Böyük Britaniya və Şimali İrlandiya Krallığı (273), Özbəkistan (210) Banqladeş Xalq Respublikası (194), Ukrayna (165), Pakistan İslam Respublikası (163), Almaniya Federativ Respublikası (161), Filippin Rspublikası (136), Bosniya və Herseqovina (131), Qazaxıstan Respublikası (128), Türkmənistan Respublikası (127), İtaliya Respublikası (120), ABŞ (118)  və s. ölkələr qərarlaşıb.

2006-cı il yanvarın 1-dən Azərbaycan Respublikası mənbələrindən əmək ödənişi və məcburi dövlət sosial sığorta haqqına cəlb olunan digər gəlirləri əldə edən əcnəbilərin məcburi dövlət sosial sığortası ilə əhatə olunması prosesi həyata keçirilməkdədir.

 Miqrasiya Mərkəzi QHT-nin sədri Əlövsət Əliyevin sözlərinə görə, ölkədəki on minlərlə əmək miqrantının çoxu qeyri-leqaldır. Dövlət Miqrasiya Xidməti müəssisələrdə 200-300 qeyri-leqal əmək miqrantı tapıb işəgötürənləri bir fakt üzrə cərimələyir.

2013-cü ildə Dövlət Miqrasiya Xidmətinə 70 min nəfər müraciət edib. Hər 7 potensial miqrantdan 5-i rədd cavabı alıb. --17D—