ARDNŞ quruda neft tapmağa ümid edir

Hasilatın artımı üçün qurudakı yataqların işlənilməsi vacibdir, çünki Xəzərdə işlənilməsi planlaşdırılan bütün yataqlar qaz-kondensat yataqlarıdır. Bu barədə jurnalistlərə Azərbaycan Dövlət Neft Şirkətinin birinci vitse-prezidenti Xoşbəxt Yusifzadə deyib. 

Onun sözlərinə görə, ARDNŞ Amerikanın ConocoPhilips şirkəti ilə yaxın vaxtlarda quruda mezozoy çöküntülərində karbohidrogen müəyyən etmək üçün araşdırmalara başlayacaq. 

«Əgər 2-3 il ərzində aparılacağı planlaşdırılan araşdırmalar müsbət nəticə versə, artıq 5 ildən sonra quruda kəşfiyyat qazmalarına başlamaq mümkün olacaq» - deyə Yusifzadə bildirib. O qeyd edib ki, quruda qazma işlərini aparmaq həm texniki nöqteyi-nəzərdən, həm də xərc baxımından dənizdən xeyli asandır. 

Qurudakı yataqların xarici şirkətlərlə birgə işlənilməsi imkanına gəldikdə, o bunun gələcəyin işi olduğunu qeyd edib. «Ancaq zərurət yaranarsa, müvafiq qərar qəbul ediləcək», - deyə Yusifzadə bildirib. 

Qeyd edək ki, 2011-ci ildə ARDNŞ və ConocoPhilips şirkətləri arasında Azərbaycanda quruda birgə tədqiqatlar aparılmasına dair razılaşma imzalanıb. Sənəd ölkənin şimal rayonlarında mezozoy qatlarının tədqiqini nəzərdə tuturdu. Geoloqların məlumatına əsasən, mezozoy qatlarının dərinliyi 10 min metrə çata bilər, bu da hazırkı quyuların səmərəli qatlarından 2 dəfə dərindir. 

* Xəzərin Azərbaycan sektorunda son neft yatağı 1985-ci ildə taöılıb. 28 ildə bir neçə qaz yatağı kəşf edilib: “Şahdəniz” (1999, 1,2 trln m3 qaz 200 mln ton kondensat), “Ümid” (2010, 200 mlrd m3 qaz və mln ton kondensat) və “Abşeron” (2011-ci il, 350 mlrd m3 qaz və 40 30 mln ton kondensat). Perspektivdə “Babək”, “Zəfər/Məşəl”, “Şəfəq/Asiman” və “Naxçıvan” yataqları var. Geoloqlar Xəzərin Azərbaycan sektorunda neft yatağı qaldığına inanmır. 

** Hazırda 58 yataqda karbohidrogen hasil edilir. Bunun 19-u  ARDNŞ öz gücü ilə işləyir. 2012-ci ildə ölkədə 42,9 mln ton neft və kondensat çıxarılıb. Bunun 1,7 mln tonu və ya 4% onşor yataqların payına düşür. –12В--