ASK rəsmisi: Məmurlar biznesdən çəkilməlidir

İdxalda inhisarçılağa son qoyulması, şəffaf mühitin yaradılması haqda prezident İlham Əliyevin dekabrın 23-də səsləndirdiyi fikirlər sahibkarları müəyyən qədər ruhlandırıb.

“Malların idxalın sahəsində ayr-ayrı şəxslərin gizli imtiyazlarının aradan qaldırılması, gömrük sistemində himayədarlığın və “çətir altda” fəaliyyətin ortadan götürülməsi iqtisadi fəallığın artmasına, iqtisadiyyatın inkişafına səbəb olacaq”. Bunu Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) Baş katibinin müavini Mehman Mehmanov deyib.

Gömrük sahəsində çoxdan gözlənilən liberallaşma ölkədə rəqabət mühitinə yeni nəfəs verəcək, sahibkarların imkanlarının genişlənməsinə gətirib çıxaracaq. “İdxal fəaliyyətinin müəyyən qrupların əlində cəmləşməsi daha çox sahibkarın öz qabiliyyətini ortaya qoymaq imkanını əngəlləyirdi. Bu həm də daha çeşidli malların ölkəyə gətirilməsinə, qiymətlərin aşağı düşməsinə sədd çəkirdi. Azad rəqabət mühitinin yaradılması nəticəsində Azərbaycanda ərzaq və qeyri-ərzaq mallarının sərbəst dövriyyəsi baş verəcək”, deyə ASK rəsmisi qeyd edib.

Mehman Mehmanov deyir ki, müxtəlif ölkələrdən gələn rəsmi qonaqlar təəccüblə deyirlər ki, onların Azərbaycana göndərdikləri mallar daha çoxdur, nəinki yerli gömrükdə əks olunan rəqəmlər. Bu neqativ halların aradan qaldırılması şəffaflıqla yanaşı, dövlət büdcəsinin gəlirlərinə də təsir edəcək.

Eyni zamanda Mehman Mehmanov məmurlara da xitab edib: Sahibkarlar Konfederasiyasının mövqeyi aydındır – biz dövlət qulluğu ilə bir araya sığmayan sahibkarlıq fəaliyyəti ilə məşğul olmağın gerçək sahibkarların bazara çıxış imkanlarını məhdudlaşdırdığını və buna görə də artıq seçim anı olduğunu deyirik. Nə qədər ki, ayrı-ayrı malların idxalını müəyyən şəxslər nəzarətdə saxlayır, ölkədə sağlam rəqabət mühitni yaratmaq çətin olacaq, sahibkarların islahatlara güvəni olmayacaq.  

“Respublikaçı Alternativ” Hərəkatının icra katibi Natiq Cəfərli isə ölkənin üzləşdiyi ağır iqtisadi situasiyada gömrük sahəsində kölgəli tərəflərin aradan qaldırılmasının yetərli olmayacağı fikrindədir. O həm də gömrük qapılarının sahibkarların üzünə açılmasını gecikmiş addım kimi dəyərləndirir. “Çünki, ölkəyə xarici valyuta axını azalıb. Buna görə də, hökumətin əsas hədəfi  ölkəyə dollar axıdan kanalları artırmaq olmalıdır”.

Amma o hesab edir ki, ixracat yönümlü iqtisadiyyata nail olmaq tez başa gəlmir. Bunun üçün bir neçə zəruri addım atılmalıdır: azad və ədalətli məhkəmə sistemi yaradılmalı, mülkiyyətin toxunulmazlığı hüququ təmin edilməli, maliyyə amnistiyası elan olunmalı, idarəetmədə dəyişikliklər edilməli, ciddi siyasi islahatlar aparılmalıdır.  08B