Azərbaycan Cənub qaz dəhlizindən $50 mlrd gəlir əldə edə bilər

«Cənub qaz dəhlizi» layihəsindən Azərbaycanın gəlirləri $30-$50 mlrd ola bilər, deyə Dövlət Neft Fondunun icraçı direktoru Şahmar Mövsümov Caspian Energy jurnalına müsahibəsində bildirib.

«İlkin hesablamalara görə, Azərbaycan CQD layihəsindən neftin müxtəlif qiymətləri nəzərə alınmaqla satış və nəqldən $30-$50 mlrd əldə edəcək. Bu isə ölkə və regionda iqtisadiyyat və infrastrukturun inkişafına təkan verəcək», - deyə  Mövsümov bildirib.

Onun sözlərinə görə, «Cənub qaz dəhlizi» layihəsi uzunmüddətli perspektivdə Azərbaycan iqtisadiyyatının inkişafını hədəfə alır.

«CQD onilliklər boyu Azərbaycan üçün əlavə iqtisadi və maliyyə imkanı yaradacaq, iqtisadi mənfəət və valyuta axını təmin edəcək», - deyə o qeyd edib.

CQD layihəsi Avropanın iri infrastruktur və energetika layihəsidir. Azərbaycan qazı hələlik bu layihə üçün yeganə mənbədir. “Şahdəniz” dünyada ən böyük qaz yataqlarındandır. CQD layihəsi «Şahdəniz-2»; Cənubi Qafqaz qaz kəmərinin (Bakı-Tbilisi-Ərzurum) genişləndirilməsi, TANAP və ТАР kəmərlərindən ibarətdir. Dəhlizin uzunluğu 3500 kilometrdir.

Azərbaycan qazı Avropaya 2020-ci ilin əvvəlində 10 mlrd kubmetr həcmində daxil olacaq. Bundan başqa, 2018-ci ildən Türkiyəyə ildə 6 mlrd kubmetr qaz veriləcək. Layihənin qiyməti $39,1 mlrd-dır. –12D--