Belarusa göndərilən tütünün tüstüsü belə yoxdur

Bu ilin 9 ayında 2 782,4 ton  tütün xammalı ixrac edilib. Bunun 1660 tonu (59%) Belarusun payına düşür, deyə Gömrük Komitəsi məlumat verir. Amma Belarusun statistika qurumu Azərbaycan tütünü almadığını qeyd edir.

Üç rübdə Belarusa $171,2 min qiymətində 686 ton tütün tədarük edilib. Yeganə tədarükçü Fransadır. Azərbaycan isə bildirir ki, $7 488,1 min qiymətində 1660 ton mal Belarusa göndərilib.

Maraqlıdır ki, ölkəmizin Belarusa satışı barədə məlumatların müqayisəsi də düz gəlmir. Azərbaycan Gömrük Komitəsinin məlumatına görə, 2013-cü ildə Azərbaycan tütünçüləri Belarusda 1275,4 ton xammal satıb. Bu, əvvəlki ildəkindən (779,2 ton) 496,2 ton çoxdur. Tütün ixracından gözlənilən gəlir $5 619 min və $3 443,3 min olub. Belarus tərəfi 2012-2013-cü illərdə Azərbaycandan $775,2 min qiymətində 258 ton tütün xammalı alındığını bildirir. Çəki ifadəsində fərq 8 dəfədir.

Azərbaycan tütününü RF müəssisələri də alır. Bu ilin 9 ayında Azərbaycandan Rusiyaya $2 mln məbləğində 1106,9 ton tütün ixrac edilib.

Maraqlıdır ki, bu ilin 9 ayında Azərbaycanda tütün istehsalı 3265 tondan (2013-cü ilin 10 ayı) 2712,2 tona azalıb. DSK-nın məlumatına görə, tütün fabrikləri 2 232,1 ton məhsulu fermentləyib. Bu, ötən ilin 10 ayındakından 52% çoxdur. Üstəlik, bu döbrdə tütün məmulatı istehsalı 2 dəfə artıb və pul ifadəsində 20 mln manat təşkil edib.

Bu il Azərbaycan Hindistandan (398 ton), İraq (68,7 ton), Livan  (672,8 ton), Türkiyə (37,8 ton) və İrandan (10,2 ton) ümumi bəyannamə qiyməti $594,1 min olan tütün xammalı alıb.

Azərbaycanda tütün məmulatı istehsalı ilə “European Tobacco-Baku” və “Cahan Tobacco” MMC (Naxçıvan) məşğul olur. 08B