Bələdiyyələrin gəlirləri 23% artıb

Bu ilin birinci yarısında Azərbaycan bələdiyyələrinin büdcə gəlirləri 16,7 mln manat olub. Bu, 2011-cim ilin eyni dövründəkindən 23% çoxdur. 

Amma bələdiyyələr iki bələdiyyə vergisini toplaya bilmir: əmlak vergisi və fiziki şəxslərin torpaq vergisi. Bələdiyyələrin büdcəsinə qeyri-vergi mədaxilinin xüsusi çəkisi 63%-dir. Bələdiyyələrin büdcəsinin 41%-i bələdiyyə torpaqlarının satışı və icarəyə verilməsi hesabına formalaşır. Bu tendensiya xüsusən region bələdiyyələrində müşahidə edilir, deyə İqtisadi Tədqiqatlar Mərkəzi QHT-nin eksperti Rəcəb İmanov Turan-a bildirib. 

Onun sözlərinə görə, potensial olsa da, bələdiyyə əmlakının idarə edilməsindən, avtomobil dayanacaqlarından, mehmanxana-kurort rüsumundan mədaxilin payı əvvəlkitək azdır. Yerli əhəmiyyətli tikinti materialları yataqlarını istismar edənlər  bələdiyyə büdcələrinə 244 min manat köçürüblər. Bu, 2011-ci ilin I yarısının göstəricisindən 1,8 dəfə çoxdur. 

Bələdiyyələrin Azərbaycanda dövlət idarəetməsində öz layiqli yerini tutmadığını o da göstərir ki, onlar toplanan vəsaitlərin yarıdan çoxunu öz aparatlarını saxlamağa yönəldirlər. Qalan vəsaitlər mənzil-kommunal, nəqliyyat, kommunikasiya ehtiyacları və yol təmirinə xərclənir. 

Yerli ekspertlər, eləcə də Avropa Şurası yerli və regional özünüidarə orqanları Konqresi bildirir ki, Azərbaycanda yerli özünüidarə sistemi Avropa yerli özünüidarə Xartiyasının tələblərinə uyğun deyil. Azərbaycanda 1718 bələdiyyənin ümumi büdcəsi dövlət büdcəsinin 0,2%-dir. Dövlət büdcəsindən bələdiyyələrə dotasiya cüzidir – ildə 3,5 mln manat. Ekspertlər hesab edirlər ki, Azərbaycanda bələdiyyələr yerlərdə həyati cəhətdən bütün vacib sahələri idarə edən yerli icra orqanlarının əlavəsidir. 08B