DB Azərbaycanda İT sektorunun inkişafı tələblərini açılayıb

Dünya Bankı və Azərbaycan hökuməti mayın 24-də “Azərbaycanda informasiya texnologiyaları sektoru və İT bacarıqları: çağırışlar və fürsətlər” adlı tədqiqatın nəticələrini təqdim ediblər.

Tədqiqatda ölkənin İT sektorunun güclü və zəif cəhətləri təhlil edilib. Bundan başqa,  təhsil sistemi ilə təmin olunan bacarıqlarla İT sənayesini təmsil edən işəgötürənlərin tələbatı arasındakı fərqlər də qiymətləndirilib.

DB-nin yaydığı məlumatda deyilir ki, ölkənin İT sənayesinin xidmətlər sektorunda iş yerlərinin payı, eləcə də sənayenin ÜDM-ə töhfəsi kiçikdir. Nəticə etibarilə, yerli İT bacarıqlarını inkişaf etdirməklə yanaşı, prioritet olaraq ölkənin İT bazarı və yerli məhsul və xidmətlər sektoru inkişaf etdirilməlidir. Bu da yerli İT sənayesinə regional və qlobal bazarlarda rəqabət aparmağa yardım edəcək.

“Azərbaycanda ümumi vergi administrasiyası və gömrük xidmətləri sahəsində həyata keçirilən islahatların tərkib hissəsi olaraq, İKT məhsul və xidmətlərinə tariflərin təkmilləşdirilməsi və İT sektoruna yatırılan özəl investisiyaların dəstəklənməsi məqsədilə tənzimləyici bazada islahatlara ehtiyac var. Bu, məhsuldarlığın artırılması və İT sənayesində özəl sektorun mövqeyini gücləndirəcək”. Sənəddə belə deyilir.   

Bu təhlil hökumətlə müzakirələr, dövlət və özəl sektorlardan maraqlı tərəflərlə müsahibələr və İT sənayesinin əsas subyektləri və texnologiya universitetləri  arasında aparılan sorğulara əsaslanır. 08D