Dövlət ASC-si minimal mənfəət əldə edib

“Aqrolizinq” ASC 2005-ci ildən bu yana ilk dəfə az da olsa (829,5 min manat) xalis mənfəət əldə edib.

Şirkət dövlət maliyyələşməsi əsasında kənd təsərrüfatı texnikası, avadanlıq, mineral gübrələr, ev heyvanlarını lizinqə verir, fermerlərin əkin və məhsul yığımı sifarişlərini yerinə yetirir. 

Şirkət korporativ saytında (http://agrolizing.gov.az/hesabat/h2014.pdf) auditor rəyi ilə maliyyə hesabatını açıqlayıb.

2014-cü ildə “Aqrolizinq” ASC-nin əməliyyat mədaxili ötən illə müqayisədə 48,5% artaraq 129,3 mln manat olub. Görülən işlərin maya dəyəri 122 mln manat təşkil edib. Beləliklə, 7 mln 266,8 min manat mənfəət əldə edilib. Bu, 2013-cü ildəkindən 1,7 mln manat çoxdur. İnzibati xərclər və aktivlərin köhnəlməsi ilə bağlı xərclərdən sonra xalis mənfəət 829,5 min manat olub. 2013-cü ildə şirkət 2 mln 144,5 min manat ziyanla işləmişdi.

1 yanvar 2015-ci il üçün “Aqrolizinq” ASC-nin ümumi ziyanı 10,5 mln manat olub.

Bu ilin əvvəlində “Aqrolizinq” ASC-nin aktivləri 21,6% artaraq 526,4 mln manat olub. Bunun 336 mln manatı  kənd təsərrüfatı texnikası, avadanlıq, mineral gübrələr və slizinq satışı üzrə uzunmüddətli borclardır.

Ötən il “Aqrolizinq” ASC-nin nizamnamə kapitalı 159,5 mln-dan 194,5 mln manata artıb. 08D