ƏHALİNİN QAZ ÜÇÜN BORCLARININ DÖVLƏT BÜDCƏSİ HESABINA SİLİNMƏSİ NƏ QƏDƏR SƏMƏRƏLİDİR?

    `Azəriqaz`a olan 327 mln manat kreditor borcunun silinməsi sosial məqsədlə yox, ARDNŞ-nin maliyyə vəziyyətinə yardım üçün edilib. Bu barədə İqtisadi Tədqiqatlara Yardım Mərkəzinin rəhbəri Azər Mehdiyev Turan-a bildirib. Onun sözlərinə görə, əgər hökumət kommunal xidmətlərlə bağlı problemi həll etmək istəyirsə, bunu bütün kommunal xidmət növləri üçün - enerji və su təchizatında da etmək lazım gələrdi. Ekspert qeyd etdi ki, 327 mln manat məbləğ də əsassızdır. `Büdcədən bu vəsaitləri ayırmazdan əvvəl istər abonentlərin, istərsə də `Azəriqaz`ın günahı üzündən yaranan borclar tam hesablanmalı idi. `Keçmiş `Azəriqaz` ASC-nin əməkdaşlarının borcları şişirtməsi, eləcə də nəzarətçilərin vəsaitləri yığıb sonra dövlət büdcəsinə köçürməmələri halları məlumdur`, - deyə Mehdiyev əlavə etdi. O həmçinin qeyd etdi ki, ölkə prezidentinin sərəncamında əhalinin qaza olan borclarının dövlət büdcəsi hesabına ödənməsinin hüquqi əsası da göstərilməyib. Məsələ burasındadır ki, dövlət büdcəsinin xərclərini ölkə parlamenti təsdiq edir. Amma hökumətdə prezidentin sərəncamının vaxtında verildiyini deyirlər. Prezident Administrasiyası iqtisadi siyasət şöbəsində Turan-a bildirdilər ki, kreditor borclarının silinməsi `əhali` kateqoriyasından olan abonentlərin sosial problemlərinin həlli ilə yanaşı, `Azəriqaz`ın iqtisadi vəziyyətini də yaxşılaşdıracaq. 327 mln manat məbləğə gəlincə, administrasiyada dedilər ki, bu rəqəmi `Azəriqaz` verib və buraya əhalinin müstəqillik illərindəki bütün borcları daxildir.