Ekspertlər 10% devalvasiya vəd edir

Manatın məzənnəsinin bivalyuta səbəti əsasında tənzimlənməsi onun 10% devalvasiyası ilə nəticələnə bilər. Yerli iqtisadçılar hökumətin manatın məzənnəsini avro ilə eyniləşdirmək planını nəzərə alaraq belə deyir.

Manatın möhkəmlənməsi qeyri-neft sektorunun inkişafını əngəlləyir. Eyni zamanda, xərci də çoxdur – AMB yanvarda bu məqsədlə $1 mlrd xərcləyib.

Hökumət uzun müddət “bahalı manat” amilindən sosial müdafiə və inflyasiyanın qarşısını almaq amili kimi istifadə edib. İndi bu proses dünya prosesi ilə uyuşmur və maliyyə-iqtisadi proseslərə mənfi təsir edir. AMB rəhbəri Elman Rüstəmovun fikrincə, bu il 5-7-% inflyasiya olacaq. Amma bivalyuta səbətinə nə vaxt keçiləcəyi açıqlanmır.

İqtisadçı Rövşən Ağayev hesab edir ki, valyuta səbətinin nəzərdə tutulan nisbəti (70/30%-USD/EUR) ən azı 10% devalvasiya vəd edir.

Bu şəraitdə ABŞ dollarının məzənnəsi 0,78-0,89 AZN/USD dəhlizində olacaq. 

Ənənəvi mühafizəkar iqtisadi siyasətdən, AMB sədri Elamn Rüstəmovun dediyi kimi, yeni iqtisadi modelə keçid neft pullarının axını dövründə donub qalmış «milli iqtisadiyyatın xəstəliklərini» oyandıra və inflyasiyanı artıra bilər.  Bu isə Avropa Oyunları ilində hökumətin marağında deyil.

Ehtimal etmək olar ki, neft gəlirləri azalan dövrdə iqtisadiyyat kölgədən çıxan qeyri-leqal biznes strukturların və pul əməliyyatlarının hesabına isinəcək. Bu şəraitdə ucuz manat istehsal və ixracı stimullaşdıracaq. Mümkündür ki, ayrı-ayrı əllərdə cəmləşən idxal əməliyyatları da liberallaşsın.  08B