İdxalın resessiyasının strukturu iqtisadi aktivliyin azalmasından xəbər verir � ekspert

Bakı/14.04.17/Turan: Bu ilin 3 ayında Azərbaycan neftinin orta rüblük ixrac qiyməti ötən ilin eyni dövrünə nisbətən 25% artıb. Bu, təbii olaraq ixracın 825 mln manat artmasında əksini tapıb. Maraqlıdır ki, bu həcmin 807 mln dolları neft ixracının 18 mln dollar qeyri-neft ixracının payına düşür. Yəni artımın 96%-i karbohidrogen ixracı ilə bağlıdır.

Qeyri-neft ixracatı əsasən meyvə və tərəvəzlə bağlıdır. Bu növ üzrə 13 mln dollar artım olub. Eyni zamanda, rəsmi mənbələr idxalın azaldığını qeyd edir və  bunu hökumətin yerli istehsalın inkişafına yönəldilmiş siyasətinin nəticəsi sayır. Əslində belədirdmi?

«Rəsmi təbliğat idxalın azalmasını iqtisadi inkişafda müsbət irəliləyiş və yerli istehsalın artımı kimi qələmə verir. Amma idxal strukturu bu arqumenti təsdiq etmir», - deyə iqtisadçı Rövşən Ağayev Turan-a bildirib. Onun hesablamasına görə, idxal 313 mln dollar azalıb. Amma azalma analoq daxili istehsalı olmayan seqmentlər üzrədir. Bu mövqelər üzrə Azərbaycan bazarı 100% idxaldan asılıdır. Söhbət nəqliyyat vasitələri, məişət və sənaye texnikası, elektrik cihazlarından gedir. Bu malların idxalı əvvəlki 713 mln dollardan bu il 391 mln dollara düşüb. Bu seqmentdə idxalın azalması 320 mln dolları keçib.

Aydındır ki, bu növlər üzrə idxalın azalması yerli istehsalın artımı ilə bağlı ola bilməz. Əksinə, bu, iqtisadi aktivliyin azalmasının ilk nəticəsidir, deyə ekspert hesab edir. –01B--