Oktyabrda 1440 xarici miqrant ölkədən çıxarılıb

Oktyabrda Dövlət Miqrasiya Xidməti 1.848 əcnəbi və vətəndaşlığı olmayan şəxsin qanunvericiliyin tələblərini pozduğunu aşkarlayıb. Xidmətin saytı (http://migration.gov.az/index.php?section=009&subsection=041&lang=az&pageid=4094) məlumat verir ki, onlardan 296 nəfərin cərimə tətbiq edilməklə ölkə ərazisində yaşamaları leqallaşdırılıb, 1.438 əcnəbi barəsində Azərbaycan Respublikası ərazisini 48 saat ərzində tərk etmə, 114 əcnəbinin isə inzibati qaydada ölkə hüdudlarından kənara çıxarılmaları barədə qərarlar qəbul edilib.

Oktyabrda Dövlət Miqrasiya Xidmətinə əcnəbilər və vətəndaşlığı olmayan şəxslər tərəfindən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin verilməsi, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün fərdi icazələrin verilməsi və mövcud fərdi icazələrin müddətlərinin uzadılması ilə bağlı 8.505 müraciət daxil olub.  Müraciətlərin hər biri ayrı-ayrılıqda araşdırılıb və müvafiq qərarlar qəbul edilib. 

 Əmək və Əhalinin Sosial Müdafiəsi Nazirliyinin məlumatına görə, əcnəbilərin 23%-i neft, 30%-i tikinti, 10,1%-i emal sənayesi, 10,6%-i ticarətdə çalışır. Qanunvericiliyi pozmağa görə cərimə 30-35 min manatdır. 

 «Əmək miqrasiyası haqqında» istənilən fiziki və hüquqi şəxs əcnəbini Əmək və Əhalinin Sosial Müdafiəsi Nazirliyinin icazəsi ilə işə götürə bilər. İcazə 18 yaşdan yixarı miqrantlara verilir. 

 Qanunvericiliyə əsasən, əcnəbini işə götürən fiziki və hüquqi 45 manat dövlət rüsumu ödəməlidir. İcazə bir illiyə verilir. Onu 4 dəfə uzatmaq olar və bunun üçün 25 manat ödəmək lazım gəlir. 

 Miqrant ölkə ərazisində 5 il fasiləsiz işləyə bilər. Bundan sonra ölkəni tərk etməlidir. Bir il keçdikdən sonra o yenidən işə düzələ bilər. --17D—