Piştaxtada itən balıq Dövlətstatkomda tapıldı

Dövlətstatkom 2012-ci ildə adambaşına balıq ovu və istehlakı barədə hesabatı açıqlayıb. Məlumata görə, əhali quş əti qədər balıq yeyir. Mütəxəssislər guya qidalanmanın beynəlxalq standartlara uyğun olması fikrini yaratmağa xidmət edən bu məlumatı şübhəyə alır. 

DSK-ya görə, 2012-ci ildə Azərbaycanda 57 667 ton balıq tutulub. Bu, əvvəlki ildəkindən 22,5% çoxdur. Statistika gizləmir ki, balığın 97,6%-i fiziki şəxslər tərəfindən nəzarətdən kənar tutulan balıqdır. 2000-cu ildə brakonyer ovu 1% idi. O dövrdə Azərbaycana verilən kvota ilə, həmçinin daxili sututarlarda 18,8 min ton balıq, əsasən kilkə tutulub. Sonrakı illər kilkə azaldığı üçün ov da azalıb. Ötən il balıq ovu kvotası 910 ton olub. Bu, 2011-ci ildəkindən 14,3% azdır. 

Dövlətstatkomda bildirirlər ki, fiziki şəxslər tərəfindən balıq ovu məlumatı ev təsərrüfatları və ictimai iaşə obyektlərinin monitorinqi yolu ilə müəyyən edilir. Məlumata inansaq, 2012-ci ildə əhali idxal uçota alınmadan balığa 400 mln manat xərcləyib. Amma balıq və balıq məhsulları idxalı da az deyil. 2011-ci ildə 17 665 ton buzlu balıq və balıq məhsulları idxal edilib. 

2009-2012-ci illərdə ölkədə 200 000 ton balıq tutulub. Mütəxəssislər bildirir ki, ölkədə rəsmi hesabatlardakı qədər balıq yoxdur. Belə fantastik rəqəmlər sovet dövründə belə olmayıb. 

Dövlətstatkom 2012-ci ildə balıq və balıq məhsulları istehlakı barədə məlumat verir. Ötən il adambaşına 7,1 kq balı istehlak edilib. Bu, 2011-ci ildəkindən 200 qram çoxdur. 2000-ci ildə bu göstərici 4,5 kq, sonrakı illərdə 6,6-6,9 kq olub. Balıq istehlakı və balansı barədə rəsmi məlumatlar da uyuşmur. 2008-ci ildə 34,6 min ton, 2011-ci ildə 63,8 min ton balıq istehlak edilib. Fərq iki dəfədir. Amma statistika adambaşına balıq və balıq məhsulları istehlakını bu illərdə 6,7 və 6,9 kq göstərir. Balıq biznesi ciddi nəzarət altında olan Rusiyada 2012-ci ildə adambaşına balıq və balıq məhsulları istehlakı 22 kq olub.    

Vətəndaşlar balığı, adətən, sağlamlıq üçün yeyir. Amma təzə balığın qiyməti mal əti qiymətinə, broyler toyuq isə 2 dəfə ucuz olub. Balığın orta illik qiyməti 7 manatdır. Ona görə süfrədə balıq nadir hallarda olur. Balıq sənayesi və idaxlı inhisarlaşıb və faktik olaraq bir şirkətin nəzarətindədir.  08B