QKDK-nın özündən razılığı

Qiymətli Kağızlar üzrə Dövlət Komitəsi “2011-2020-ci illərdə Azərbaycan Respublikasında qiymətli kağızlar bazarının inkişafı” Dövlət Proqramının həyata keçirilməsi ilə bağlı 2014-2015-ci illər üzrə Tədbirlər Planının icrasından razıdır. Amma qurumun fəaliyyətinin analizi göstərir ki, bütün məqsədlərə çatılmayıb. 

24 dekabrda keçirilən iclasda QKDK-nın sədri Rüfət Aslanlı Dövlət Proqramının ölkənin qiymətli kağızlar bazarının yeni institusional mühitin formalaşdırılmasına hədəfləndiyini bildirərək, 2011-2013-cü illər üzrə Tədbirlər planının uğurla tamamlandığını deyib. Sonda R.Aslanlı Dövlət Proqramının 2014-2015-cü illər üzrə səmərəli icrasını təmin etmək məqsədilə nəzərdə tutulan istiqamətlərdə tədbirlərin həyata keçirilməsinə dair müvafiq tapşırıqlar verib, deyə qurumuictimai əlaqələr sektoru bildirir. Sektorun rəhbəri Çingiz Hüseynov qarşıdan gələn illərdə görüləcək işlərlə bağlı QKDK-nın planını Turan-a şərh etməkdən imtina edib. 

Turan sənədlə tanış olandan sonra müəyyən edib ki, heç də hər şey deyildiyi kimi rəvan deyil. Komitə 2011-2013-cü illərdə QK bazarının institusional inkişafı, maliyyə vasitəçiliyinin təşkili və təşviqi, kollektiv investisiya sxeminin fəaliyyəti, korporativ idarəetmə və maliyyə hesabatlılığı ilə bağlı bir sıra məsələləri həll edə bilməyib. Məsələn, bu il QKDK QK bazarının peşəkar iştirakçılar üçün kapital adekvatlığl tələbini müəyyən və tətbiq etməli idi. QK bazarında əlverişli vergi rejiminin formalaşdırılması üçün təkliflər hazırlanmayıb. QKDK və AMB QK bazarında banklar və sığorta şirkətlərinin iştirakını təşviq edən prudensial tələbləri müəyyən etməyib. Dövlət Prorqamına inansaq, bu gün bazar «Qiymətli kağızlar bazarı haqqında» qanuna uyğun işləməli idi. Amma qanunvericilik aktının layihəsinin yeri məluma deyil. 08B