SOCAR-ın gəmiqayırma zavodu sənaye parkına çevrilir

Prezident İlham Əliyevin 3 iyun tarixli sərəncamı ilə Qaradağ Sənaye Parkı yaradılıb. Qaradağ Sənaye Parkının fəaliyyətinin təşkili və  idarə olunması Sumqayıt Kimya Sənaye Parkına həvalə edilib.

Nazirlər Kabineti Qaradağ rayonu ərazisində Bakı-Astara magistral yolunun 25-ci kilometrində yerləşən Dövlət Neft Şirkətinin daimi istifadəsində olan 72 hektar torpaq sahəsini icarə hüququ ilə cəmiyyətin daimi istifadəsinə verlməlidir.

Sənəddə qeyd edilir ki, sənaye parkı müasir texnologiyaların tətbiqi ilə rəqabətqabiliyyətli gəmiqayırma və digər sənaye istehsalı sahələrinin təşkili, xidmətlər göstərilməsi üçün yaradılır.

Hökumət gəmiqayırma sənayesinin uzunmüddətli inkişafını təmin etmək məqsədi ilə sənaye parkları üçün nəzərdə tutulmuş stimullaşdırıcı tədbirlərlə yanaşı, Qaradağ Sənaye Parkında digər stimullaşdırıcı tədbirlərin tətbiqi barədə təkliflərini üç ay müddətində hazırlayıb prezidentə təqdim etməlidir.

İqtisadiyyat və Sənaye Nazirliyi gəmiqayırma sənayesi üzrə prioritet istiqamətləri müəyyən etməlidir.

«Bakı Gəmiqayırma Zavodu» 2010-cu ildə yaradılıb. Payçılar SOCAR (65%) Siqapurun Keppel şirkəti (25%) və «Azərbaycan İnvestisiya Şirkəti»dir. Müəssisə 2013-cü ildə istismara verilib. Layihənin qiyməti $470 mln-dır. Bunun $360 mın-ı borc kapitalı (korporativ istiqrazlar) kimi cəlb edilib. 

Zavodun istehsal gücü ildə 25 min ton metal konstruksiyadır. Müəssisədə bir ildə 2 ədəd yük qabiliyyəti 70 min ton olan gəmi, dayaq özülü qurmaq üçün 4 gəmi tikmək, müxtəlif növlü 80-100 gəmini təmir etmək mümkün olacaq. 08D