Təhlükəli mallar

Nazirlər Kabineti 29 may tarixli №208 qərarı ilə istehlakçılar üçün potensial təhlükəli malların siyahısında dəyişiklik edib. 

Sənədə əsasən, «1 yanvar 1994-cü ildən təhlükəsizliyi təmin edilməli olan malların siyahısı»na dəyişiklik edilib. «Yuyucu, ağardıcı və təmizləyici vasitələr» siyahısına «sintetik yuyucu vasitələr və məişət kimyası məhsulları» əlavə edilib. Kosmetik vasitələr, ətriyyat, tibbi reagentlər, kimyəvi reaktivlər də təhlükəli mallar siyahısına daxil edilib.

Azərbaycanda malların təhlükəsizliyinə nəzarət malların bütün hərəkət səviyyəsində, yerli istehsaldan, idxaldan tütmuş onun satışı və istehlakına qədər korrupsiya ilə əhatə olunduğundan zəif təşkil olunub. Buna parlaq nümunə insanların kütləvi şəkildə zəhərlənməsi və ölməsinə gətirib çıxaran yerli poliuretan istehsalıdır. Bəlli olduğu kimi, istehsal, satış və nəzarət prosesi bir əldə - FHN və ona yaxın biznes dairənin əlində cəmləşib.

Təhlükə mallarla bağlı Avropa məlumatlarına nəzər salsaq, problemin miqyasını anlamaq olar. Deutsche Welle Avropa Komissiyasına istinadən gözlənilməz məlumat yayıb: 2014-cü ildə Avropa Birliyinin müfəttiş orqanlarının nəzarətçiləri ticarət şəbəkələrində istehlak üçün rekord sayda təhlükəli mal aşkarlayıb. Təhlükəli malların ümumi sayı 2435-dir.

Ilk dəfədir ki, Avropanın RAPEX təcili informasiya mübadiləsi sisteminə bu qədər çox zərərli məhsulun daxil edildiyi üzə çıxarılıb.

Tərkibində insan sağlamlığı üçün zərərli ağır metalların olduğu bəzək əşyalarının böyük siyahısı var.

Təhlükəli mallar arasında – avtomobillər, elektrik cihazlar, mobil telefonlar üçün aksessuarlar var. Aşkarlanan keyfiyyətsiz malların dörddə birindən çoxu istehlakçı üçün təhlükəlidir, sağlamlığa zədə, ziyan vura bilər.

Satışa qadağan edilən mallarda Çin istehsalçılarının payı 64% təşkil edib. --17D—