Uşaq bağçalarının üçdə biri özəlləşdirilib

Əmlak Məsələləri Dövlət Komitəsi 82 uşaq bağçası və körpələr evini özəlləşdirib. Bu, 2006-cı ildə özəlləşdirməyə açılan məktəbəqədər təhsil müəssisəsinin üçdə biridir.
ƏMDK-nin 1996-2013-cü illərdə kiçik özəlləşdirmə hesabatına əsasən, 2007-cü ildə özəlləşdirməyə açılan məktəbəqədər təhsil müəssisəsinin 240-dan 63-ü özəlləşdirilib.Onların çoxu bakıdadır. 2010-2011-cü illərdə bir uşaq bağçası belə özəlləşdirilməyib. 2013-cü ildə bir uşaq bağçası hərracda satılıb.
Hökumət məktəbəqədər təhsil müəssisəsinin kəskin çatışmazlığını bəyan edib. Amma özəlləşmə siyasətindən imtina edilməyib.
Bu həftə Heydər Əliyev Fondu məktəbəqədər təhsil müəssisələri ilə bağlı yeni proqram elan edib. Fond ötən illərdə 20 uşaq bağçası və körpələr evinin tikintisini maliyyələşdirib. Fondun keçirdiyi monitorinq zamanı Bakı şəhərində 411 məktəbəqədər təhsil müəssisəsinin olduğu müəyyən edilib. Onlardan 345-i dövlət, 54-ü özəl, 12-si isə müxtəlif müəssisə və təşkilatların tabeçiliyində fəaliyyət göstərən məktəbəqədər təhsil müəssisələridir. Müəyyən edilib ki, Bakı şəhəri üzrə mövcud dövlət məktəbəqədər təhsil müəssisələrindən 137-nin əsaslı təmir olunmasına ehtiyac var. Hazırda 33 uşaq bağçası təmir olunmaqdadır.
Dövlətstatkoma görə, 1 yanvar 2014-cü il üçün Azərbaycanda 1637 dövlət və 40 özəl məktəbəqədər təhsil müəssisəsi var. Burda 112 min uşaq və ya 1-5 yaşınadkı uşaqların 15%-i qeydiyyatdadır. 08B