Vətəndaşlardan pul qoparırlar

Bakı/01.03.21/Turan: Ötən həftə ölkədəki şaxtalı hava açıq məkanda yerləşən borular və mexaniki su sayğaclarında suyun donmasına səbəb oldu. Buz əridikdən sonra bəzi şəhərətrafı ərazilərdə sayğacların xarab olduğu üzə çıxdı. Hadisə yerinə çağırılan “Azərsu” nəzarətçiləri bəzən zədələnmiş sayğacları dəyişdirmək üçün ərazi sahiblərindən pul alır.

Donmuş su sayğacları problemi ümummilli miqyas alıb, “Azərsu”nun 955 Qaynar xəttinə ölkənin bütün bölgələrindən və paytaxtdan şikayətlər gəlir, deyə videoreportajda bildirilir

https://www.xezerxeber.az/news/veb-tv/31452/video-su-saygaclari-siradan-cixib

“Azərsu” ASC-nin nümayəndəsi Anar Cəbrayıllı reportajda donmuş sayğacların yenisi ilə əvəzlənməsinin abonentlərin hesabına aparılacağını deyib. Halbuki əvvəllər o, zədələnmiş sayğacların dövlət hesabına dəyişdiriləcəyini demişdi.

Şaxta ərəfəsində “Azərsu”nun rəsmi saytı sayğacın içərisinə su daxil olmaması üçün sayğaca daxil olan suyun kranını bağlamaq və suyu boşaldan borunun kranını açmağın vacibliyi barədə vətəndaşlara xəbərdarlıq yerləşdirilmişdi. “Azərsu”nun ikinci tövsiyəsi: suyun dayanmadan axması və donmaması üçün kranlar bir az açıq qoyulmalıdır.

Ancaq vətəndaşlar hər gün bu saytdakı məlumatları oxumaq məcburiyyətində deyillər və günlərlə axan su üçün yeni, yüksək tariflə ödəməli olacaqlar: 1 kubmetr su üçün 1 manat.

“Azərsu”nun xəbərdarlığı sayğacların təhlükəsizliyinə görə məsuliyyəti vətəndaşlara xatırlatmaqla bitir. Xəbərdarlıqda sayğacların təmiri və ya dəyişdirilməsi üzrə maliyyə yükünün vətəndaşların üzərinə düşməsindən bəhs edilmir.

“Saray Bağları” bağ massivində torpaq sahəsinin sahibi olan Kamal Əli şaxtadan əvvəl pul qoparılması cəhdi ilə qarşılaşıb. Vətəndaşın 2020-ci ildə əldə etdiyi ərazidə 1331924020000 nömrəsi ilə qeydiyyata alınmış, işləməyən köhnə su sayğacı olub.

2021-ci ilin yanvarında əraziyə çağırılan nəzarətçi sayğacın nasaz olduğunu təsdiqləyib və bildirib ki, K. Əli ya “Azərsu”dan yeni bir cihaz almaq üçün pul ödəməli və ya bazardan sayğac almalıdır. Abunəçinin ASC-nin buna görə məsuliyyəti barədə etirazına cavab olaraq ona deyiblər ki, qurumda yeni sayğac yoxdur və nə vaxt olacağı məlum deyil.

Daha sonra K. Əli 09.02.2021-ci il tarixdə vətəndaşlara su sayğaclarının dəyişdirilməsi və quraşdırılması xidmətlərinin qeydiyyatı üçün Sumqayıt “ASAN Xidmət”inə üz tutub. Lakin dövlət tərəfindən geniş reklam olunan “ASAN Xidmət” dəllal kimi hərəkət edərək vətəndaşa problemin həlli üçün Sumqayıt sukanal idarəsinə - “Azərsu” bölməsinə müraciət etməyi tövsiyə edib. “Azərsu” nəzarətçisinin pul tələb etməsi barədə işçiyə məlumat verən vətəndaşa təkrarən deyiblər ki, qurumda yeni sayğaclar yoxdur.

Kamal Əli fevralın 6-da Sumqayıt Sukanal İdarəsinə poçt vasitəsilə nasaz sayğacın pulsuz əvəzlənməsi tələbi ilə məktub göndərib.

Nazirlər Kabinetinin 2014-cü ildə qüvvəyə minmiş (fərman N262) "Sudan istifadə qaydaları"na əsasən, fiziki şəxslər üçün su sayğaclarının quraşdırılması, təmiri və dəyişdirilməsi dövlətin hesabınadır, hüquqi şəxslər (mağazalar, ofislər, müəssisələr və s.) bu işlərin xərcini özləri ödəməlidir.

Maddə 2.1.8-də deyilir ki, istehlakçının təqsiri olmadan zədələnən suölçən cihazı ödənişsiz qaydada təmir edilir, həmin suölçən cihazı təmir etmək mümkün olmadıqda isə ödənişsiz qaydada başqası ilə dəyişdirilir.

Bundan əlavə, 6.5-ci bənddə fiziki şəxslər üçün sayğacların quraşdırılması və dəyişdirilməsinin “Azərsu”nun hesabına pulsuz həyata keçirilməsi təkrarlanır.

6.10-cu bənddə sayğacların dəyişdirilməsi müddəti göstərilir - 15 gün və fiziki şəxslər üçün onun pulsuz dəyişdirilməsi müddəası yenidən təkrarlanır.

Hökümət tərəfindən təsdiqlənmiş bu qaydaları nəzərə alanda “Azərsu” təmsilçisinin vətəndaşlardan öz günahları olmadan zədələnmiş sayğacların dəyişdirilməsi və ya təmirinə görə vətəndaşlardan ödəniş tələb etməsi pul qopamaq cinayətinə bənzəyir. —0—