Yunanıstan Transadriatik boru kəməri üzrə tranzitdən fayda əldə etmək istəyir

Yunanıstan Transadriatik boru kəməri üzrə qazın tranzitindən fayda əldə etmək istəyir. Bu kəmər Azərbaycan qazının Avropa bazarına nəqli üçün nəzərdə tutulub. Çərşənbə axşamı Reuters Yunanıstanın energetika naziri Panayotis Lafazanisə isnadən bildirib.

“TAP layihəsi ilə bağlı dəstəyimizi şübhə altına almayaraq  istəyirik ki, ölkəmiz və xalqımız üçün fayda əldə edək. Hesab edirik ki, bu, müdrik və ədalətlidir”, - P.Lafazanis bildirib.

Reuters energetika sahəsindəki mənbəyə isnadla bildirib ki, maliyyə çatışmazlığı ilə qarşılaşan Yunanıstan bu layihədə pay və ya tranzitə görə haqq istəyə bilər.

P.Lafazanis deyib ki, Yunanıstan hökuməti TAP-ın və İGB (Yunanıstan-Bolqarıstan interkonnektoru) qaz kəmərinin inşasını dəstəkləyir.

Bu yaxınlarda Azərbaycana səfəri zamanı P.Lafazanis ölkənin rəsmi şəxsləri ilə TAP-ın inşasından Yunanıstanın əldə edəcəyi mümkün faydanı müzakirə edib.

TAP Azərbaycanın “Şahdəniz” yatağının işlənməsi üzrə konsorsium tərəfindən Avropa bazarına qaz nəqli üçün marşrut kimi seçilib.

Layihə qazın Xəzər regionundan Yunanıstan, Albaniya və Adriatik dənizi vasitasilə İtaliyanın cənubuna, oradan da Qərbi Avropaya nəqlinə yönəlib.

Boru kəmərinin ümumi uzunluğu 870 kilometrə yaxındır. Boru kəmərinin inşasına 2016-cı ildə başlanması gözlənilir.

ТАР-ın səhmdarları: BP (20%), SOCAR (20%), “Statoil” (20%), “Fluxys” (16%), “Total” (10%), E.ON (9%) və “Axpo” (5%).—0—