Çexiyada Azərbaycan, Belarus, Qazaxıstan və Rusiya filmləri təmsil olunub

Praqada ilk “Çexiyada MDB ölkələri kino günləri” forumu başa çatıb. Bu, Avropada MDB ölkələri kinematoqrafçılarının yaradıcılığını təmsil edən illik layihənin başlanğıcıdır.

  Forum MDB Dövlətlərarası Humanitar Əməkdaşlıq Fondunun və Rusiya Mədəniyyət Fondunun dəstəyi ilə keçirilir. Təşkilatçılar “Yaradıcılıq xətti” prodüser mərkəzi, “SINECO s.r.o.”, Azərbaycan, Belarus, Qazaxıstan və Rusiyanın Çexiyadakı səfirlikləri və digər qurumlardır.

  Forumun proqramına Azərbaycan, Belarus, Qazaxısan və Rusiyada istehsal edilmiş ən yaxşı filmlər daxildir.  Filmlər “Svetozor” festival kinoteatrında nümayiş etdirilir. 

  Tamaşaçılar təkcə yaxşı filmlərə baxmaq deyil, həm də iştirakçı ölkələrin kulinariya ənənələri ilə tanış olmaq imkanları əldə ediblər.

  Kinoforum azərbaycanlı rejissor Murad İbrahimbəyovun “Qardaşdan yaxşısı yox idi” filmi ilə açılıb. Filmi rejissor özü təqdim edib. Bir azərbaycanlı ailənin həyatını təsvir etməklə o, yalnız ötən əsrin 60-cı illərinin atmosferini yox, həm də insanın ətraf aləmlə mənəvi yaxınlığını əks etdirib.  

  Filmdə dünya kinematoqrafiyasında yetərincə tanınan Sergey Puskepalis, Nino Ninindze və Yevgeniya Sıqanovanı görmək olar.

  Rejissor həm də “Neft” filmi ilə avropalı tamaşaçılara yaxşı tanışdır. Bu film Venesiyada “Gümüş şir” mükafatını alıb. 

  Azərbaycan proqrama həm də  rejissor Firəngiz Qurbanovanın “Fitnəkar milçək” animasiya filmi ilə daxil olub. Film 2011-ci ildə “Mozalan” studiyasında “Birlik” kinostudiyasının yaradıcı qrupu tərəfindən çəkilib. Ssenari müəllifi Gülşən Tofiqqızı, quruluşçu rəssam Cavid Əhədov, animatorlar Zema və Cavid Əhədovlar, bəstəkar Firudin Allahverdidir.

  2011-ci ilin avqustunda Soçidə keçirilən “Qızıl balıq” XVI Beynəlxalq Uşaq Animasiya Kino Festivalı Münsiflər Heyətinin qərarı ilə rejissor “Yüksək peşəkarlığa görə” xüsusi mükafatına layiq görülüb.  -0-