Baku/07.06.18/Turan: Bu günlərdə professor Cəmil Həsənlinin "Azərbaycanda Sovet liberalizmi: Hakimiyyət. Ziyalılar. Xalq. (1959-1969)" adlı yeni monoqrafiyası nəşr olunub.Adından və xronoloji çərçivəsindən göründüyü kimi, əsər XX əsr Azərbaycan tarixinə Vəli Axundov onilliyi kimi daxil olan bir dövrü əhatə edir.
Oxuculara təqdim edilən bu kitab professor Cəmil Həsənlinin uzun illər apardığı elmi axtarışların nəticəsidir. Əsər xronoloji baxımdan müəllifin on il əvvəl nəşr olunmuş "Azərbaycanda milli məsələ: siyasi rəhbərlik və ziyalılar (1954-1959)" monoqrafiyasının davamıdır. Kitabda ötən əsrin 60-cı illərində Azərbaycanda Vəli Axundov, Məmməd İsgəndərov və Ənvər Əlixanovdan ibarət siyasi rəhbərliyin formalaşması, sosial-iqtisadi və mədəni həyatda baş verən dəyişikliklər, cəmiyyətin Stalinin şəxsiyyətə pərəstiş düşüncəsindən azad olması, ədəbiyyat və sənətdə müşahidə edilən yeni meyllər, yaradıcılıq təşkilatlarında gedən proseslər, Güneyli demokratların Sovet Azərbaycanındakı taleyi, həmin illərdə ateizm təbliğatı və sosial-dini mənzərə, kommunizm quruculuğu və 1963-cü il aclığı, kosmosun fəthi və qarğıdalı epopeyası, Sovet cəmiyyətində narazılığın artması və 1963-cü ilin Sumqayıt hadisələri, 60-cı illərdə Dağlıq Qarabağda gedən sosial-siyasi proseslər və sair məsələlər əhatə edilib.
Əsərdə qeyd edilir ki, sənət və ədəbiyyatda bu illər 60-ıncılar kimi yadda qalıb, lakin bu ifadə yalnız sənətə və ədəbiyyata aid deyil, bütövlükdə düşüncə tərzi və idarəçilik sistemində baş vermiş sovet liberalizminin təzahür forması idi.
Monoqrafiyanın hazırlanmasında müəllif Azərbaycan respublikası və Rusiya Federasiyasının partiya, dövlət, təhlükəsizlik orqanları və hökumət sənədlərinin saxlandığı müxtəlif arxivlərin materiallarından geniş istifadə edib. İlk dəfə elmi dövriyyəyə gətirilən çoxlu sayda nadir arxiv materialları araşdırmanı tənqidə dözümlü, müəllifin fikir və mülahizələrini etibarlı edib. Kitab Azərbaycan tarixi, ədəbiyyatı və mədəniyyəti ilə məşğul olan mütəxəssislər, humanitar ixtisaslar üzrə təhsil alan tələbələr və yaxın keçmişimizin tarixinə maraq göstərən geniş oxucu dairəsi üçün nəzərdə tutulub. -0-
Mədəniyyət
-
Azərbaycanda elektron musiqi səhnəsi son illərdə canlansa da, bu sahədə qadın DJ-lərin sayı hələ də məhduddur. Musiqi sənayesində öz yerini tutmaq istəyən qadınlar təkcə texniki bacarıqları ilə deyil, həm də cəmiyyətin onlara biçdiyi rollarla və gender balanssızlığı ilə mübarizə aparmalı olurlar.
-
Dünyada dayanıqlılıq təşəbbüsləri sürətlə artarkən, Avropa İttifaqının "Yaşıl Gələcək 2025" müsabiqəsi Azərbaycanda gənc innovatorlar üçün ekoloji problemlərə biznes yönümlü həllər təqdim etməyə imkan yaradan bir platformaya çevrilib. Bakıda keçirilən bu müsabiqənin dördüncü buraxılışı Azərbaycanlı gənclərin yaşıl innovasiyalara bağlılığını və yaradıcılığını nümayiş etdirdi, Avropa İttifaqının genişmiqyaslı "Planetimiz naminə" kampaniyasına töhfə verdi.
-
Sənət mübadiləsi və mədəni diplomatiyanın bir bayramı olaraq, Bakıda Ambassador Cultural Club-da “Azərbaycanlı rəssamların gözü ilə Macarıstan” layihəsinin üçüncü mərhələsi çərçivəsində Macarıstanın ənənələrindən və mədəni irsindən ilhamlanan rəsm əsərlərinin sərgisi təqdim edilib. Azərbaycan Respublikasındakı Macarıstan səfirliyi və müstəqil incəsənət platforması «Arts Council Azerbaijan» tərəfindən təşkil olunan bu təşəbbüs iki ölkə arasında sənət və mədəniyyət sahəsində əlaqələrin dərinləşməsinə töhfə verir.
-
Ahmet Güneştekin İstanbul Bələdiyyəsi Feshane Mədəniyyət Mərkəzinin 8 min kvadratmetrlik qapalı salonlarında açılan “İtmiş Əlifba” fərdi sərgisindən bir neçə gün sonra Turan İnformasiya Agentliyinin suallarını cavablandırdı. İstanbulun bələdiyyə sədri Ekrem İmamoğlunun açdığı sərgi 20 iyula qədər açıq olacaq.
Rəy yaz